「醒啦,大陸仔。」

係唔係有人叫咁我?

「醒啦,大陸仔。」
把聲音再次傳嚟我耳邊。

係雪兒把聲嚟!但點解我乜都睇唔到?眼前只有漆黑一片,雪兒,你係邊啊雪兒!

「哎呀!你仲想訓到幾時啊,快啲醒啊,大陸仔。」


聲音剛停止,耳仔感受到痛楚,係俾人用力扭轉耳仔造成既痛。

痛到我睜開雙眼,望到雪兒坐係旁邊嬲霸霸扭我耳仔。

原來我啱啱處於夢裡面,唔怪得見唔到雪兒,嚇得我,我仲以為雪兒遇到咩嘢危險。

「我醒左啦我醒左啦⋯唔好再扭。」
我摸住被扭到通紅既耳仔,然後坐起身。

雪兒見我醒左後,就走旅行袋到攞出幾舊鰻魚乾,然後遞俾我。


「成日都咁懶訓⋯叫極都唔醒⋯」

「對唔住。」
我慢慢啃食手中既鰻魚乾。

今日既天氣晴朗,有舊大白雲遮擋住個太陽,令我地唔會因為熾熱既陽光而感到酷熱。

火堆早已熄滅,只剩下一縷白煙,尋日搵到既乾柴亦都早已用盡。

雪兒用手咪我塊面。


「唔好發呆啦,食完要繼續搵達叔㗎。」

係喎,唔記得左我出嚟既目的係要搵達叔⋯要嗱嗱臨食飽繼續去搵佢。

我快速啃食手上餘剩既鰻魚乾,然後走去溫泉邊梳洗一陣,便攞起旅行袋,帶住雪兒繼續尋找達叔。


係好耐以前,啲華人認為幸福,就係頭上有片瓦,腳下有塊地,身在家鄉,然後開枝散葉,非不得已先會離鄉背井,漂泊半生,我地抱住熱切既心,踏足偏遠既世界角地。

歡迎大家繼續收睇「尋找達叔的故事」。


我同雪兒慢慢咁行落山,走向依邊既森林,見到個森林咁大,搵達叔真係同大海撈針無乜分別⋯⋯

半個鐘後,我地終於落山,然後我從旅行袋攞出開山刀,繼續係沿途既樹木上留低一條條刀痕做記號。



而雪兒攞住弓箭,不斷觀察住周圍,我亦都左望右望,生怕會有野獸突然跳出嚟襲擊我地兩個。

行左五六分鐘,個森林一隻動物都無,實在太奇怪,理應咁大既森林,應該會有唔少動物係到棲息先啱,但依家卻一隻都見唔到⋯

「大陸仔⋯你覺唔覺個森林好奇怪啊?」
雪兒一邊講,一邊好緊張咁環顧四周。

「你係講見唔到大小動物出現?可能係大雨過後,所以啲動物驚會再落大雨,先無出嚟⋯」

我咁講係想令雪兒唔好咁緊張,但我自己依家已經緊張到死⋯⋯

我用手抹走頭上因緊張而冒出既汗水,唔可以俾雪兒見到我慌張既樣,如果佢見到我慌張,佢肯定會俾我更加慌張⋯

雪兒突然望住我。


「其實⋯咁大個森林⋯我地點樣先搵得到達叔?如果我地漫無目的咁行,可能要行一兩個星期,先可以搵到達叔⋯」

其實我自己都唔知點樣先可以搵到達叔⋯依個森林實在太大⋯但係達叔係我兄弟,我唔可以放棄佢。

正係到思考點樣答雪兒依個問題既時候,天上突然傳嚟叫聲,打破寧靜,嚇到雪兒即刻攬住我,我攬住雪兒蹲係地上。

嗡!嗡!嗡!

數個巨大黑影從我地背後飛過,我抬頭一望,有三隻龐大既鳥類動物飛去同一個方向,望多一陣,依三隻鳥類動物係禿鷹嚟。

佢地飛去個方向,大概五百米距離,有一隻禿鷹係個到盤旋,我諗依三隻禿鷹係想飛去搵係個到盤旋既同伴。

雪兒一邊望住禿鷹一邊講。
「原來係鷹嚟,但好似同我地上次見個隻唔同既?」



「上次個隻係獵鷹,依三隻係禿鷹嚟。」

「禿鷹?個頭禿禿地無毛個隻?」

「無錯!就係依隻,禿鷹通常聚集一齊出現既地方,就會有食物係個到,佢地好少主動去襲擊獵物,佢地會食大獵物,最鐘意食腐肉,所以多數都係等獵物死亡,佢地會係天空盤旋或者係地上觀察,等待獵物死亡後,就去啃食獵物啲肉。」
估唔到依咁島都有禿鷹係到⋯

「原來係咁~」
雪兒聽完後覺得好神奇咁。

咪住⋯

禿鷹⋯聚集⋯盤旋⋯死亡⋯獵物⋯

達叔應該係個邊!



我即刻拖住雪兒隻手走去禿鷹集合個方向,望住啲禿鷹係個位置不斷盤旋,佢地肯定係到等獵物死亡!

「大陸仔⋯做咩行依個方向啊⋯」
雪兒邊跟住我邊問。

「我覺得達叔係個邊,啲禿鷹應該係發現達叔係個到,所以先集合埋一齊。」

行左唔夠一分鐘,突然雪兒停低腳步,好驚青咁指住一邊。
「大陸仔⋯你睇下⋯」

我望去雪兒指住個方向,見到有一堆白骨,我走上前看,係野豬骨頭(野豬個長牙)同埋疑似係人類既頭骨⋯

從疑似人類頭骨、野豬骨頭上既血跡顏色可見,都係死左好一段時間,可以確定副骨頭唔會係達叔嚟。

「唔好驚⋯慢慢跟住我行。」
我安撫害怕到攬實我顫抖既雪兒。

我地慢慢繼續行去禿鷹盤旋個方向,沿途有唔少白骨屍骸,有啲白骨中長滿野草,成個森林都充滿住死亡既氣息。

愈嚟愈接近禿鷹盤旋既位置,突然聽到前面有人既呼叫聲。
「有無人啊⋯有無人啊⋯有無人係到啊⋯」

雪兒瞪大雙眼望住我。
「係達叔把聲嚟!」

達叔仲識講嘢,證明達叔仲生存咁!但係達叔既呼叫聲卻令人感覺到絕望⋯

於是我地兩個跑去聲音個方向,望住天上既禿鷹係聲音既方向盤旋,估中左!果然佢地係盯著達叔。

「達叔!達叔!」
我地一邊跑一邊大嗌。

「邊個⋯東⋯東哥!東哥!我係到啊!東哥!」
達叔認出我把聲後激動咁大嗌。

跑左一分鐘,我地終於走到達叔個邊,達叔坐左係一棵高大既樹上,而旁邊幾棵樹有九隻禿鷹企左係到,天上亦有一直見到個四隻禿鷹係到盤旋,佢地雙眼都係一直望住樹上既達叔。

原本垂頭喪氣既達叔,見到我同雪兒過嚟搵佢,雙眼瞬間通紅落淚,然後一邊抹眼淚一邊講。
「東哥⋯唔⋯東哥⋯估唔到會見得返你地⋯我以為⋯我會死係到⋯」

「傻既咩!走啦,我地返去啦,你兩個老婆仔等你返去好耐啦。」

達叔準備要爬落嚟,原本笑笑口既佢,突然變面色鐵青,然後激動緊大嗌。
「東哥!小心後面啊!跑啊!」

我同雪兒回頭一望,有隻四肢發達既動物係十米外既樹後面盯著我地,佢成身泥土般既黃色,身上既斑紋,嘴角露出鋒利既牙齒⋯

鬣狗⋯

隻鬣狗突然發狠,喪跑到我同雪兒既位置,我捉住雪兒隻手瘋狂咁跑。

鬣狗⋯唔係應該得非洲大草原先會出現既咩⋯點解荒島會有鬣狗㗎⋯⋯



待續
已有 0 人追稿