荒島日記（新手、後宮甜）（不定期更新）: 鬣狗
我拖住雪兒瘋狂喪跑，雪兒不時回頭望後面，睇下隻鬣狗有無追上嚟。
「個隻咩嚟㗎！點解佢豹唔似豹！狗唔似狗㗎！」
雪兒驚慌咁講。
「個隻係鬣狗嚟⋯快啲繼續跑先⋯」
我回頭望隻鬣狗，發現佢同我地距離仲係好遠，但我記得睇國家地理頻道介紹，佢應該係跑得好快先啱。
突然背後方向既達叔大嗌。
「你老味！有種就食撚左我先！」
達叔跳落樹下，然後隨地執起舊石頭仔，一嘢擲向鬣狗，狠狠打中鬣狗個頭部，鬣狗停低回頭望達叔，見到達叔係到挑釁佢，嬲到咬牙切齒。
嗚！
鬣狗跑向達叔個方向，達叔驚恐到掉頭狂跑，快速爬返上棵樹上。
達叔走落嚟引誘鬣狗，係為左製造機會俾我同雪兒，要好好把握依個機會。
隻鬣狗真係跑得好慢喎⋯同動物世界介紹佢個陣好似兩回事咁既⋯⋯
「雪兒，趁依家爬上樹先。」
說罷，我用手抱起雪兒，雪兒好吃力咁爬上棵樹到。
雪兒爬上棵樹到後，我從旅行袋中抽出把開山刀，然後就將個旅行袋交俾樹上既雪兒。
「好危險，點都唔好落嚟啊。」
雪兒好擔心咁問。
「你去邊啊⋯」
「我要去救達叔。」
「大陸仔！唔好就咁過去啊！返嚟！」
雪兒係樹上係咁嗌我，但我頭也不回走去達叔個邊。
鬣狗唔係靠爪去捕獵，而係靠佢十分鋒利既牙齒，再加上佢非常發達既下顎，一但俾佢咬住既獵物就好似鱷魚一樣，唔洗旨意離開佢個口。
所以我一定要睇清楚佢既攻擊，唔好俾佢有機會咬到我。
鬣狗跑到達叔個棵樹下面，抬頭望住樹上既達叔，我望住鬣狗既背影，見到佢左腿有少量鮮紅色既血跡。
唔怪得佢跑得唔快啦，原來佢其中一隻腳受左傷。
達叔繼續係樹上挑釁隻鬣狗，而我小心翼翼，慢慢咁靠近鬣狗，隻鬣狗一直望住達叔，完全唔知道我從背後走過嚟。正面同鬣狗搏鬥就肯定打唔贏，唯一贏佢既方法就只有背後襲擊佢，俾佢一個致命傷，令佢無機會還手。
達叔見我慢慢靠近，於是更加賣力去挑釁隻鬣狗，不時伸腿去引誘隻鬣狗，搞到鬣狗凌空跳起想咬達叔隻腳。
我距離鬣狗仲有五米，只要再行多三米，就可以即刻斬佢個鬣狗頭。
愈嚟愈靠近隻鬣狗，我亮出把開山刀，達叔緊張到流曬大汗，可能驚自己可能會害死我，我繼續慢慢靠近，突然腳下傳來「咔嚓！」一聲。
仆街⋯
依個時候先踩爛枯枝發出聲音⋯
隻鬣狗瞬間回頭望住我，我嚇到出曬冷汗，鬣狗個樣變得面目猙獰，嘴裡不斷發出磨牙既聲音，我即刻撒腿搏命跑。
「東哥！跑啊！」
樹上既達叔拼命大嗌。
跑唔夠幾秒，隻鬣狗就撲倒我係地上，手中既開山刀跌係一邊，我一轉身，佢就已經跳到我身上，然後用強壯既手同腳壓住我唔俾我逃走。
佢凶狠咁望住我，然後露出佢好大既牙齒，下顎果然非常發達，口水不斷從牙縫中流出嚟，流出嚟既口水帶有強烈既腐肉氣味，猶如擺放數日既臭雞蛋一樣，令我有啲反胃作嘔⋯
嗚～！
佢突然吠了一聲，然後張開血盆大口，佈滿數多鋒利無比既牙齒，如果佢咬落我個頭到，我個頭骨幾秒後肯定會碎裂。
佢真係好撚聰明⋯知道咬爆我個頭我就會必死無疑，唔會再有無謂既掙扎。
佢嘴裡噴出一股惡臭，比啱先既口水臭幾十倍，我聞到幾秒就已經好唔舒服，胃酸瞬間逆流到喉嚨，我忍唔住對隻鬣狗嘔吐，將胃酸顏射到鬣狗面上。
鬣狗隻眼沾上我既胃酸，佢隨即走開一邊，用手係咁抹走面上既胃酸，我爬去一邊，執起跌係旁邊既開山刀，點知鬣狗再次撲過嚟，對準我喉嚨既位置咬落嚟。
我瞬間反應得切，舉起開山刀擋住依一下，鬣狗就咁咬住左我把開山刀。嗱！唔咬頭而咬我既喉嚨，你睇下佢幾識搵致命傷⋯
你好聰明，但咬住我把開山刀會係最蠢既做法，既然你咬住我把刀，咁我唯有從你個嘴到斬落去啦！
於是我用力推開山刀，點知鬣狗咬住把刀身實一實，把刀完全拉扯唔到，真係估唔到隻鬣狗咬合力可以勁到咁既地步⋯
我唔可以俾佢咬死㗎⋯但係佢實在太難對付⋯同佢長時間鬥氣力我只會輸⋯但係要點樣先可以殺到佢⋯
鬣狗更加用力咬實把開山刀，並且開始用牙拉扯把刀，想從我手中搶走把刀⋯再咁落去⋯我一定會死係佢嘴下⋯
正係到苦惱點對付鬣狗個陣，突然一支箭飛左過嚟，射入鬣狗既肚到，痛到鬣狗即刻鬆口。
機會嚟喇！飛雲！
我用開山刀，用力係鬣狗口中揮了一刀，鬣狗個嘴即刻噴出鮮血，鮮血跟住刀尖係空中划成一條弧線。
嗚⋯鬣狗個樣變得十分痛苦，無曬之前既兇狠氣勢。
雪兒係十米外既樹上射了依一箭救左我，即刻抹走臉上既冷汗，鬆了口氣。
果然對射箭好有天份，十米咁遠都射得中隻鬣狗⋯⋯
鬣狗合埋個嘴掉頭就跑，鮮血仍然從嘴角流出，可能失血過多，佢開始行唔穩，腳步浮浮東倒西歪，我見佢仲未死去，即刻追上去揮刀。
無幾步就追上佢，然後用手中既開山刀，係佢背隻划上一條又一條刀痕，每一下都令佢皮開肉綻，有啲位置斬既深度，令骨頭暴露係空氣中。
嗚！
鬣狗痛到張嘴大叫，然後噴出大量鮮血，無幾耐就倒在地上不斷抽搐。
天上樹上既禿鷹聞到大量鮮血既氣味後，隨即飛過嚟依邊，係我頭頂呀呀咁叫，並且盤旋觀察我同鬣狗既情況。
「你班粉腸果然係嚟想執雞。」
我望住天上既禿鷹們。
「多謝東哥走咁遠嚟救我。」
達叔走過嚟，然後對住我不停鞠躬感謝。
「唔洗，我⋯⋯」
我未講完，雪兒就衝埋嚟掛左我一巴。
雪兒嬲霸霸咁望住我，淚珠吊掛係眼角。
「叫左你唔好亂咁嚟既啦⋯你差啲就俾佢咬死⋯」
有唔少禿鷹飛左落嚟，圍住鬣狗既屍體不斷兜圈，突然天上既禿鷹發出刺耳既叫聲，地上既禿鷹隨即飛走。
達叔驚恐咁望住周圍。
「發⋯發生咩事⋯」
待續