荒島日記（新手、後宮甜）（不定期更新）: 賠償

高佬佳望一望旁邊營地既女仔後便講。
「喂！大陸仔！搶你地食物既又唔係我！係啲女仔啊！嗱！唔關我事㗎！」

「都唔關我事⋯我無攞過你地啲食物⋯」
被女伴攙扶起身既肥豬劉好辛苦咁說到。

啲女仔聽到後即刻轉頭望高佬佳。
「嘩⋯你咁講嘢既⋯係你話我地幫你手⋯山洞裡面既食物歸我地⋯」

「咪係囉！係你叫我地幫手㗎！」



「這樣欺負我們都有⋯」

「正衰人！」

高佬佳懶理啲女仔既說話。
「總之啲食物唔係我攞既啦！佢地食曬啲食物！叫佢地自己負責！」

肥豬劉突然講。
「食物都俾佢地食曬⋯佢地還唔到食物⋯就叫佢地用身體還俾你囉⋯」



肥豬劉一講完，所有營地既女仔全部怕醜咁望住我同達叔，有啲仲無啦啦撥一撥頭髮，好似想誘惑我地咁⋯

突然感覺到右手邊有股殺氣，係辣椒妹同雪兒⋯佢地翹住雙手，並且用好鄙視既眼神望住我，雪兒塊面仲黑曬，彷彿想殺咗我⋯⋯

「好了，食物這件事不關我們的事，小兄弟，你就找這些女生要去吧。」
肥佬陳講完便轉身想離開，高佬佳同肥豬劉亦都想跟住離開。

嗷嗷！嗷嗷！



來福帶住狼群發惡地吠叫，並且露出尖牙利齒，令佢地三個感到害怕，唔敢行出人群外面。

我指住營地其中一個女仔。
「講！邊個叫你搶啲食物既！」

「係佢兩個啊⋯」
個女仔好害怕咁指住肥豬劉同高佬佳。

突然其中一個女人搶住答。
「是他們兩個說，只要能捉住她們全部人，你們山洞裡面的食物就歸我們。」

「你呢！你呢！你呢！」
我再問多幾個女仔，佢地全部都係指向高佬佳同肥豬劉。

我橋住雙手講。


「咁得啦，你地兩個山洞裡面既食物，全部攞曬出嚟俾我地。」

高佬佳同肥豬劉聽到後，雙眼即刻凸曬出嚟，高佬佳咁發惡。
「我都話唔係我地攞你食物！憑咩要我攞自己啲食物賠俾你地！」

肥豬劉忍住痛搭話。
「咪係囉⋯又唔係我攞你地既⋯仲要獅子開大口⋯攞曬我地啲食物⋯你要我地以後食咩啊⋯」

我憤怒咁講。
「你覺得依家仲有得俾你地揀咩！」

肥豬劉斷斷續續咁講。
「喂...大陸仔...凡事留一線好喎...」

「係囉！做人唔好咁得寸進⋯⋯」


高佬佳未講完，我叫來福吠佢幾聲，即刻嚇到唔敢講落去。

「你地搶我既嘢！打我既人！唔見你地留一線？總之你兩個唔將啲食物賠返出嚟！營地所有人唔洗旨意離開！」

「陳總⋯」
高佬佳同肥豬劉苦臉哀求肥佬陳幫拖，肥佬陳正想講嘢既時候，我指住佢。

「你再加把口，就連你山洞裡面既食物都要攞出嚟！」

肥佬陳即刻用命令既語氣同佢兩個講。
「你們兩個山洞裡的食物快拿出來吧！我還要等著回去睡覺呢，其他女生，進他們山洞把食物都拿出來！」

「陳總⋯」
高佬佳再次哀求肥佬陳，但肥佬陳完全無視佢，開始指揮啲女仔入佢地兩個山洞，突然佢拉住其中一個女仔咬耳仔，然後個女仔點點頭便跑入山洞。



「喂⋯你地做咩攞我啲食物啊⋯喂⋯」
與高佬佳共住一個山洞既MK傑，躺係床上動彈不得，只能眼白白睇住啲食物被帶走。

達叔舉手自薦。
「東哥！我去監察佢地做嘢！」

肥佬陳原本諗住叫啲女仔收埋啲食物，只攞一小部份嚟敷衍我地，點知達叔會走去監察啲女仔。

高佬佳同肥豬劉望向肥佬陳，肥佬陳只嘆了一口氣，並無講嘢，高佬佳同肥豬劉知事情敗露，無奈地低頭。

肥豬劉同高佬佳此刻欲哭無淚，望住自己山洞啲食物一堆又一堆咁攞出嚟，個啲罐頭，個啲魚乾，係佢地辛辛苦苦得返嚟既，依家全部都要攞曬出嚟，肥豬劉既女伴們更早已哭成淚人。

「嘩！都幾多嘢食喎！今次發啦！」
達叔走出嚟，然後特登大大聲講，要令肥豬劉同高佬佳難受。



堆罐頭裡面有茄汁豆、沙甸魚鹹牛肉罐頭等等，雖然無肥佬陳山洞個堆罐頭咁多，但都接近一半，夠我山洞食足個幾月。

「阿生⋯我地以後點捱啊⋯嗚⋯」
肥豬劉其中一個女伴跪地痛哭，肥豬劉憤恨望住啲食物被攞出嚟，發誓一定要報仇。

我拍一拍手。
「大家仲唔快啲多謝高佬佳同肥豬劉！」

「多謝你地！」
辣椒妹同達叔佢地恥笑地對住高佬佳肥豬劉鞠躬，肥豬劉同高佬佳嬲到面紅耳赤。

四眼妹佢地見已經平安無事，於是想帶隊離開，我見到後立刻叫停佢。
「四眼妹！你地去將啲罐頭同食物平均咁分成三份，另外個一份俾你地自己。」

四眼妹佢地驚訝咁望住我，我微笑示意要佢地分食物，然後講。
「你地山洞啲食物都俾佢地搶曬，而且依一份係你地應得既。」

四眼妹瞬間熱淚盈眶。
「嗯⋯多謝⋯多謝⋯」



待續