荒島日記（新手、後宮甜）（不定期更新）: 帶領

我坐係山洞口發吽豆，搬過嚟嘅營地女仔，有啲企係佢地嘅山洞前執行李，有啲坐咗係空地上曬下太陽，亦有啲企係樹林邊睇下有無野果。

佢地表面上好似做咁自己嘢，但雙眼就不時望向我同達叔嘅山洞。

此刻我感覺自己好似警匪片裡面個賊王，而佢地就係警察扮出嚟嘅路人。

「唉⋯」
我企起身伸個懶腰，佢地全部人即刻停低做咁嘅嘢，全神貫注咁望住我，好似怕自己一唔留神就會錯過啲咩。

我慢慢咁走去河邊方向，即刻聽到背後有密集嘅腳步聲，我加快腳步行，後面嘅腳步聲立刻急促起嚟。



洗唔洗跟得咁密⋯

我走入河邊樹林裡面，係樹林裡左穿右插，啲女仔亦都跟住我跑入樹林，我仲聽到跌低嘅聲音。

我立刻回頭。
「我屙屎啊，係唔係都要跟埋嚟？」

幾個女仔聽到後瞬間面紅，然後就掉頭快步走返去空地個邊。



旁晚

「東哥東哥⋯」
達叔急促咁從佢山洞個邊跑過嚟。

佢然後左望右望，見到附近營地搬過嚟嘅女仔仍然望住我地，觀察我地一舉一動。
「東哥⋯入去講⋯依到無方便⋯」

「乜嘢事咁神秘⋯」



達叔拉住我走入山洞裡面。
「東哥啊⋯啲女仔做咩走曬過嚟依邊㗎⋯今日我行去邊佢地就跟到邊，無曬自由啊東哥⋯」

「你仲好意思講！就係因為你！」

「關⋯關我事？」
達叔感到愕然。

我篤住達叔個人頭豬腦。
「就係因為你中午個陣，搵咁多食物返嚟，搞到啲女仔覺得我地容易搵到食物，所以索性搬曬嚟依到，睇吓有無機會跟住我地搵食！」

達叔瘋狂躲避。
「啊⋯東哥⋯我都唔想㗎⋯」

「你知唔知啊，我今日去樹林開大個陣，佢地都跟埋嚟⋯食飯個陣啊⋯佢地仲要行到嚟我地旁邊，望住我地食嘢啊⋯有個仲眼甘甘好可憐咁望住秋儀，搞到秋儀差啲要分食物俾佢地⋯」



「咁依家點算啊⋯東哥⋯」
達叔欲哭無淚。

「有辦法解決嘅⋯」

「係咩辦法啊東哥⋯」
達叔好緊張咁望。

「就係⋯⋯」










第二日朝早


空地上聚集曬營地搬過嚟嘅女仔，佢地全部坐曬係地上。

「嗯呵⋯」
達叔慢慢走到眾人面前，見到咁多人望住佢，個樣有些少緊張。

「大⋯大家⋯早晨⋯」
達叔緊張到講嘢斷斷續續。

我地其他人就企係一邊，睇住達叔講嘢，而達叔嘅女伴係旁邊幫達叔打氣。


「加油啊⋯阿達⋯」

「加⋯加油⋯」
紫霜亦都有跟住講。

唔夠一分鐘，達叔就已經滿頭大汗。
「大家⋯今⋯今日嚟搵大家⋯嘅目的⋯係見大家一直⋯以嚟都搵唔到食物⋯於是我同東哥⋯傾過⋯決定帶大家⋯去捕獵⋯」

眾多女仔擺出難以置信嘅表情。
「真係㗎？真嘅？」

「我無聽錯啊嘛？」

「係真嘅⋯我地決定中午⋯就出發⋯中午個陣⋯大家就係依到集合⋯」
達叔一講完，眾女立刻歡呼雀躍。





到咗中午，所有女仔都係空地上集合，就連原本仲住係營地嘅女仔，亦都嚟到我地嘅空地上，佢地手上提著大小不一嘅桶準備裝蟹同貝殼，而無桶嘅女仔，就唯有攞一件件衫嚟包住啲食物。

啲女仔裝束差唔多一樣，都係著曬運動裝，頭戴住鴨嘴帽嚟遮太陽，有幾個仲戴住太陽眼鏡。

「大陸仔⋯你睇吓。」
四眼妹目光注視著人群背後。

我沿住四眼妹目光望去，見到人群嘅最後面，係高佬佳同肥豬劉佢地，佢地見到我地望向佢地方向，立刻好尷尬咁笑一笑，然後便得低頭。

「我去趕走佢兩個。」
辣椒妹想走上前去，我即刻捉住佢。

「我都估到佢地會跟埋嚟，無所謂啦，泥地個到蟹夠我地所有人食幾個月。」

達叔拍一拍手，原本喧嘩吵鬧嘅人群立刻鴉雀無聲，所有人注視住達叔，俾咁多人望住，達叔又再開始緊張。
「大⋯大家⋯出⋯出發！」

「好！」

我地沿住條河走向下游方向，由於帶住一大班女仔，所以十五分鐘嘅路程，足足走咗半個鐘，我地先終於到達泥地對出嘅樹林邊。

不過啲女仔唔知自己行咗咁耐，因為佢地全程係到談天說地，唔講仲以為依家係冬季學校搞大尾篤BBQ旅行。
「我要捉十幾隻返去！」

「蟹呢？邊到有蟹？」

我同達叔無回答佢地，而係帶佢地走入樹林裡面，慢慢穿過樹林，走到泥地邊，眾人一見到泥地上成千上萬嘅蟹後，紛紛發出驚嘆嘅聲音。

我擰轉身對住大家。
「好啦！首先捉蟹之前！我地⋯⋯」

我仲未講完，便有六個人影從人群中跑出嚟，佢地以最快嘅速度跑入泥地裡面，各個猶如賽跑冠軍。

「好多蟹啊！發達啦！」
高佬佳同肥豬劉異口同聲，跑向蟹群方向，生怕遲入一分鐘，自己就會少好多收穫咁，肥豬劉嘅女伴們亦攞住大小鐵桶緊接隨後。

佢地幾個過咗唔夠一分鐘，就係泥地上手舞足蹈，佢地並唔係因為開心到跳舞，而係俾蚊咬痛到亂跳，各個嘴裡發出慘叫聲。

「佢⋯佢地發生乜嘢事啊⋯」
眾女對高佬佳同肥豬劉佢地嘅行為感到奇怪。

我無奈咁擰返轉對住眾人。
「唉⋯入去泥地之前⋯先聽我講嘢先⋯⋯」



待續