「佢地之所以會咁,係因為泥地裡面有蚊,個數量仲要多到可以嚇親你!」

啲女仔聽到後起曬雞皮。
「吓⋯咁我地點算啊⋯」

「有方法!」

眾女立刻望住我,雙眼係到祈求我講個答案出嚟。
「咩方法?」



「就係⋯⋯」
達叔立刻打眼色,四眼妹同佢啲女伴將幾個女仔推落泥地,令個幾個女仔全身沾滿爛泥。

「喂⋯做咩啊⋯」

某個女仔用手不斷抹走面上嘅爛泥。
「啊⋯好污糟啊⋯好臭啊⋯」

「要洗走佢⋯」



四眼妹眾人立刻張開雙手,擋住去河邊嘅路,唔俾佢地離開。

「我就知道你地肯定會嫌污糟,但我想講,依個係唯一驅蚊嘅方法。」

見到啲女仔陷入沈思嘅狀態,四眼妹無奈地搖曬頭。
「要靚定要命,你地自己揀啦⋯」

辣椒妹大大聲講。
「你地繼續考慮啦!佢地幾個已經帶住啲蚊群跑咁過嚟!」



我地所有人望辣椒妹指住個方向,見到高佬佳同肥豬劉正在飛奔過嚟,而一大堆蚊群係後面跟住。

「救⋯救命啊!!!」
肥豬劉痛苦地撕吼著,佢個頭已經紅腫一片,其中一隻眼更腫到睇唔到,如果唔係佢高大肥胖嘅身型,真係認唔到佢係肥豬劉。

高佬佳塊面滿佈飛蚊,飛跑過嚟嘅時候突然跣低,大字型咁趴落啲爛泥到,抬起頭個陣,成塊面已經沾滿污泥,嘴巴不斷吐出爛泥。
「唔!啊!水啊!我要水啊⋯」

「你地諗吓,啲蟹肉幾咁肥美,幾鮮甜,依家就擺係你地眼前,食唔食到就真係睇你地。」

眾女雙眼望住泥地嘅螃蟹,吞下一啖又一啖口水,而肥豬劉逐漸逼近過嚟,我開始叫雪兒等人退後,免得俾肥豬劉引嚟嘅蚊群襲擊。

我執起舊石頭,向肥豬劉嘅膝頭哥飛去,肥豬劉哎吖一聲,便趴落泥地上,佢身邊嘅爛泥立刻四濺。

「我要食蟹我要食蟹!」


其中一個女仔突然好似發癲大聲咁講,然後便跳入泥地碌嚟碌去,令身體所有部位沾滿爛泥。

其他女仔望住沾滿爛泥個女仔衝入泥地裡面,瘋狂咁捕捉泥地上橫行霸道嘅螃蟹,執大小不一嘅貝殼生物,見到佢無俾蚊咬到慘叫,亦紛紛跳入泥地令身體所有部位沾滿爛泥。

「衝啊!」
眾女如喪屍般衝向蟹群,遠處嘅蟹群立刻四散逃命,場面十分混亂,無幾耐,啲女仔便捉起螃蟹,將啲蟹掉入自己嘅桶、衫裡面。

肥豬劉同高佬佳見到泥地上突然多咗咁多女仔,而且佢地不斷用爛泥塗滿全身,瞬間明白塗滿爛泥可以驅蚊,於是攞起爛泥往自己身體抹去。

肥豬劉嘅女伴們見到各個都用爛泥抹去身體上,已經唔在乎污唔污糟嘅問題。


與此同時

某處海域上




汪洋大海中有艘船在航行,但艘船嘅速度十分緩慢,彷彿在尋找什麼。

萬里無雲嘅天空,與大海已連成海天一色,猛烈嘅陽光開始照耀艘船上,甲板上嘅人立刻走回船艙內避暑,只剩下一個新丁軍人仍在觀察。

「不⋯不是吧⋯」
新丁驚訝地放低甲板上嘅望遠鏡,快速地跑向船上其中一個房間門前。

新丁用手輕輕敲打房門。
「上將⋯上將⋯我有急事找你!」

「進來。」
新丁打開房門,一個睇衣著打扮就知地位甚高男人坐在裡面,正在扣著衣服上嘅鈕扣,而旁邊浴室傳嚟沖涼嘅聲音。



新丁緊張地望向浴室,地位甚高嘅男人立刻咳了幾聲,男人雙眼先回望返佢。
「不用理會,這麼急找我有什麼事?難道有新的發現?」

新丁即刻敬禮。
「報告上將!我⋯我在甲板上!發現一個好奇怪的海域!」

「好奇怪的海域?」

「是的!」

「好!現在帶我去看看!」
新丁帶住上將快速走到甲板上,然後佢尋找剛才見到嘅海域。

「就是這!」
新放低望遠鏡,上將立刻低下頭看。



上將嘅瞳孔立刻放大。
「這海域,簡直和大衛劉船長曾經描述的海域一樣,沒錯了!應該是這裡!」

望遠鏡望去的遠方海域,有一處是被一團迷霧烏雲籠完全罩住嘅海域,烏雲裡時不時出現閃電,同四周海域的藍天白雲形成強烈嘅對比。

上將面色凝重起嚟。
「不斷出現暴風雨的海域⋯⋯幫我傳達給駕駛艙,往這海域方向航行,我想要近距離觀察一下。」

「遵命!」



待續
已有 0 人追稿