荒島日記（新手、後宮甜）（不定期更新）: 戰爭一（2月17日更新）
荒島上的一端
凌晨一時
一個身影快速地前行，走去屬於佢嘅崗位。
「肚痛搞到遲咗十五分鐘⋯希望狄叔唔會鬧我啦⋯」
少年一邊說，一邊加快腳步行走。
少年走到橋邊，而橋嘅另一邊係用木頭搭建而成嘅站崗哨兵塔，離地有成六米高。
佢走過長長嘅橋後，便見到站崗裡面有個人坐係木椅上背對住佢。
「狄叔⋯對唔住⋯遲咗一陣⋯」
坐係木椅上嘅狄叔並無回頭，亦無回答佢，繼續好安靜咁背對住佢坐。
少年以為狄叔嬲咗佢，於是提出。
「狄叔，一係搵人請你飲杯酒啊？我屋企個到仲有半支酒係到。」
狄叔仍然不為所動，少年開始感到奇怪，因為狄叔絕對係一個酒癡嚟，只要一講起酒，狄叔就必定會提起勁，把所有酒通通搶過嚟暢飲。
「狄叔⋯狄叔⋯你唔好嚇我啊⋯」
少年一步一步咁走向狄叔身邊。
每前進一步，少年嘅心臟便跳得更加激烈，站崗裡安靜到只能聽到少年心臟跳動嘅聲音。
少年隻手終於觸碰到上椅上，慢慢咁望向椅上沈默已久嘅狄叔。
「呼⋯嚇死⋯」
少年終於望清楚，原來狄叔係木椅上訓著咗。
少年推一推熟睡中嘅狄叔。
「狄叔，狄叔，夠鐘收工啦，狄叔。」
狄叔隨即半睜雙眼，迷糊咁望一望周圍，再用雙手捽一捽眼。
「唔⋯嚟頂更啊？」
「係啊狄叔，你已經夠鐘收工，可以返去訓，唔洗係到訓得咁辛苦。」
「咁交俾你啦⋯逸豪。」
狄叔拍一拍逸豪嘅膊頭，然後打著喊露，腳步浮浮咁走向站崗外。
叭！叭！叭！叭！
有嘢快速飛入站崗裡面，打中站崗裡面嘅物品，逸豪俾突如其來嘅事嚇到趴係地上，而狄叔亦係依個時候衝入站崗裡面。
「狄叔⋯」
逸豪驚恐咁望住狄叔。
狄叔抬頭望一望站崗裡嘅擺設，全部都被打爛曬，而打爛擺設嘅係一把又一把細小嘅刀仔。
狄叔努力冷靜咁吸口氣。
「豪仔，睇嚟我地遇到突襲⋯」
「咁點算啊狄叔⋯」
逸豪想起上一次嘅戰鬥死傷多人，便感到十分害怕。
狄叔指一指外面嘅長木橋。
「等陣你用盡全力跑返去，得唔得？」
「咁狄叔你呢⋯」
狄叔從袋中抽出一支香菸，逸豪記得，依支香菸係狄叔最後一支菸嚟，狄叔當佢係寶，完全唔捨得食。
「我留係到，我會掩護你嘅啦。」
「點得㗎⋯狄叔⋯你會死㗎⋯」
狄叔聽完，好淡定咁講。
「一個人死，點都好過兩個人死。」
「狄叔⋯要走一齊走⋯」
「冷靜啲豪仔，你要留住條命返去通知大家，如果俾依班人攻陷，我地一直以嚟守護嘅嘢就無曬嘅啦，唔好講啦，依家快啲跑返去。」
狄叔用力推逸豪到門邊上。
「我唔可以睇住你死㗎⋯狄叔⋯」
逸豪用雙手頂著，唔俾狄叔推出去。
「逸豪，你依家仲後生，大把青春，快啲跑，唔係就無機會啦！跑啊！」
狄叔將逸豪推出門外。
「跑啊！再唔跑嚟唔切啦！跑啊！！」
逸豪隨即狂奔，淚水在逸豪嘅眼眶上盪著，逸豪一邊跑一邊回頭，見到狄叔正在用顫抖嘅手努力點著嘴中嘅香煙。
一個好簡單嘅動作，但狄叔卻用咗十幾秒先點得著嘴上嘅香菸。
點著香菸嘅狄叔，亦係依個時候擰轉頭，望到逸豪正在望咁佢，佢吸了一口香菸，然後對著逸豪微笑。
啪啦！！！
不遠處用木做的圍欄發出巨響，圍欄隨即被撞爛一片，一隻壯大嘅犀牛衝入圍欄內，犀牛上坐著一個男人。
犀牛男人擰轉頭向後嗌。
「兄弟們出來！全部一起衝進去！」
騎著犀牛上的男人指揮下，過百人從叢林中跑出，向著已破爛嘅圍欄靠近。
逸豪見十數人已衝入圍欄內，便更加用力奔跑去橋的另一邊。
突然左手臂感到疼痛，佢擰轉頭望，見左手臂嘅衣服已被割破，鮮紅色嘅血液從衣服裡滲出。
「啊⋯」
逸豪痛苦地按著耳朵，因為一把小刀剛剛從逸豪個頭側面快速飛過，割傷佢嘅耳仔。
逸豪用盡全力地奔跑，餘光看到橋下有個男人一直跟住佢跑，並且從衣服裡取出一把把細小嘅刀，以佢為目標不斷掟。
橋下嘅飛刀男人向著佢大嗌。
「你們把文太藏在哪裡！快把文太放出來！」
「食屎啦！！！」
狄叔把站崗裡嘅物品紛紛拋向橋下嘅眾人，飛刀男人見到狄叔後立即轉身。
「夠薑落嚟隻揪啊！仆街！」
「落嚟啊撚樣！」
「係男人就同我落嚟！」
橋下嘅一眾藍衣人不斷叫囂著。
狄叔完全無理會橋下嘅人，不斷把站崗裡嘅物品通通拋下去，最後拋下木凳木檯。
「你們今天不把文太叫出來，你們全都給我死！」
男人從衣服裡再次取出小刀，對準狄叔不斷咁掟。
咚咚咚！
一把把小刀插入站崗的木頭上，不久，狄叔便倒在一邊，挨坐係站崗裡一角。
狄叔痛苦地摸著插在鎖骨上嘅刀身，鮮血不斷從刀刃邊流出，逸豪見到後立即回頭去救狄叔。
狄叔忍著疼痛大嗌。
「唔好返嚟！！！繼續跑！！逸豪！」
「推倒佢！推倒佢！」
橋下嘅藍衣眾人開始推哨兵塔，木造嘅哨兵塔好快便搖搖欲墜。
逸豪淚流滿面咁跪係橋上，看著遠處面色逐漸蒼白嘅狄叔。
「逸豪！我寫咗好多封信，如果你有機會返香港，你記得⋯幫我轉交俾我老婆。」
「幫我同佢講聲⋯我對佢唔住⋯ 」
哨兵塔搖搖欲墜，連接住嘅木橋很快會支撐唔住，逸豪一邊抹著眼淚一邊奔跑，然後飛撲去橋嘅另一邊。
不久，後方傳來哨兵塔倒下嘅聲音，身後嘅木橋也隨即斷裂成兩折⋯⋯
待續