影月良憶(走甜): 越係甜蜜，就越係痛苦

我好大力咁捉緊佢隻手，好驚佢會縮開手，然後我就會尷尬到死。
拖咗一陣，佢都係一啲力都無出過，無縮開，都無握緊，無作出任何回應。
我不禁係度諗，其實我係咪自作多情，佢宜家應該覺得好困擾。
唉.......
我一諗到蕃薯蟲可能會覺得好困擾，我即刻頹左皮。
再拖左一陣，見佢都係無反應，我暗自嘆咗一口氣，打算放開手。
而正當我放鬆之際，佢既手掌突然握緊翻我隻手，好用力咁捉住我隻手，就好似我岩岩捉住佢咁。
好似咩事都無發生，佢繼續睇戲，但係手就同我緊緊咁拖住。
我諗我塊臉果陣應該係紅到呀媽都唔認得，成個純情小處女咁。
個心跳得好快，嘴角都不受控咁上揚。


佢咁做係咪代表...代表...佢都想拖我？
我唔知呢種感覺係咩，我淨係知道我覺得好開心，相比起同阿雨一齊嘅開心完全唔同。
跟著睇嘅成場戲，其實我都已經唔記得咗講緊啲乜，但係喺我嘅印象中，呢場戲，係我人生中睇過最好睇嘅一場戲。
到咗夜晚，因為我地住得好近嘅關係，我地一齊搭巴士走。
喺巴士裹面，我地一直拖住，而我個頭都一直挨住佢個肩頭，好似真正嘅情侶咁。
其實我係算唔算已經係情侶？
但係事實上，我地唔係情侶，我都唔敢開口問佢我地係咩關係，唔想破壞我同佢之間嘅甜蜜時光。
直到就快到站，我終於忍唔住開口問佢：「如果，如果我話我鍾意你，你會點？」
佢猶豫咗一陣望住我講：「我？我都會鍾意你嘅。」
咁阿月呢？


我好想咁問，但嗰句嘢卡住係喉嚨，然後又俾我吞翻入肚，腐爛。
我望住個窗，覺得個心好痛。
我另轉個頭望佢，佢都望住我，
我諗當時我隻應該好紅，佢望實我，眼都唔眨。
「你......」仲鍾唔鍾意阿月？
我真係問唔出。
喺面臨眼淚流出黎嗰刻，我好極端咁，笑咗起身。
「做咩姐？你想點喎。」我笑住咁問佢，但語氣中又略帶哭意，又笑又喊咁問：「唔通一齊咩？你唔係要追阿月咩？」
係我嘅問話之下，佢靜咗落嚟，然後望往另一邊，好似係度沉思緊。
而我嘅內心一直咁不停呼喊，


講啦！講你已經唔鍾意佢，講你想同我一齊，講啦，講啦，講啦⋯⋯
在我強烈嘅注視下，佢都係一聲不響。
終於，到站，佢一粒聲都無出就走咗。
我立刻忍唔住淚水，喊咗起身，係車上，強忍住唔發出聲音，眼淚卻不繼源源不絕咁往下流。
啱啱嘅時光越係甜蜜，就越係痛苦。