==================================================================
 
第二次。
 
那是我第二次躲開趙燈路的吻。
 
不是因為太突然。
 
那麼,是因為什麼?
我為何要躲開TLC的吻?


 
趙燈路,到底想告訴我什麼?
 
「Jairus好勁喎。」嚴少諾把手機接駁到電視,一同觀賞著趙燈路之前寫的網劇,「佢套網劇出哂名喎。」
 
...竟然還真的來得及在七月內播出。
這個新人組合到底是有多趕?
 
「咁條橋係幾okay既,會吸引人想繼續追落去。」我也一同看著網劇,「又有愛情,又有奇幻,又有夢想,d觀眾最中意既素材合哂一齊,又加上有靚仔靚女睇,都紅得有道理。」
 


雖然我一直都不否認。
作為一名編劇,趙燈路真的非常出色。
 
當然,我想那經紀公司也運用了不少市場手段。
 
「佢勁野啦,而家出左第一集,就已經咁大關注。」嚴少諾依然專心地看著螢幕,「離緊應該好多job接。」
 
...那麼,我又要幫忙畫分鏡圖了嗎?
 
想到這裡,又突然不覺得替趙燈路而開心了。


 
「阿諾,唔好掛住睇啦,開飯啦。」
 
聲音...
從廚房傳來。
 
「啊,我都幫手...」我也立刻站了起來。
「唔洗啦,願兒姐姐,你同我繼續睇啦。」嚴少婷把我拉回沙發坐下,「佢地會幫手嫁啦,你過門都係客,幫手既話佢地會仲唔好意思。」
「但係...」
「放心啦,你再離多幾次既時候,就會可以幫手。」嚴少婷繞住了我的手,「所以,你多d上離啦。」
 
...真的,非常像是個妹妹的性格。
 
越來越覺得,很有劉婉情的影子。
 


「姐姐,你識得個編劇嫁?」嚴少婷期待地看著我,「可唔可以話比我知,最後張宇宙可唔可以同南流星起埋一齊?」
 
...不。
他們,最後...
 
陰陽相隔。
 
雖然很想這樣說。
 
「編劇既大忌,就係講自己作品既結局比人地聽。」我微笑看著嚴少婷,「乖啦,自己睇既話未仲好睇。」
「...但係,好想知道個編劇係一個咩人。」嚴少婷細想了一下,「我覺得,如果我識得佢,話唔定會愛上佢。」
 
...不。
你大概只會想把他吊起來毒打一頓。
 


「啱啊,Jairus真係好型。」嚴少諾在端出飯菜時經過了我們,「呢種文青型既,好多女仔中意嫁。」
 
...是我太不懂得欣賞嗎?
為什麼,我從來都不覺得趙燈路是一個如此吸引的人?
 
「真係嫁?」嚴少婷的雙眼像是會發光的那樣,「哥哥,我想識佢—!!」
「人地有女朋友...」嚴少諾本來正在微笑著,但說到這裡,卻突然停住了。
 
我的思緒,也停住了。
 
對了,趙燈路,他已經有女朋友了。
...與嚴少諾,正在共用同一個女朋友。
 
「佢同你差左成六、七年喎。」我尷尬地笑著道,「乖啦,婷婷,唔好同呢d叔叔拍拖,你阿哥會擔心死。」
「明明就係我拍拖,又唔係哥哥拍拖...」嚴少婷不滿地嘟著嘴,「哥哥成日都唔比我識出面d男仔,又唔比我夜翻屋企。」


「唔準嘈,過離食飯。」嚴少諾把飯放好在飯桌上,「你都唔知出面d男仔起度猴緊你d咩。」
 
...一種保護瀕危動物的節奏嗎?
 
「又唔係個個男仔都係咁—!!」嚴少婷更是反駁著,「唔通哥哥同願兒姐姐一齊,又係猴緊佢d咩?!」
 
沒有想到的被點名,使我一時反應不過來。
再次回想了一下嚴少婷的話,我才忍不住笑了出來。
 
「總之就係——」嚴少諾正想回應嚴少婷的話,立刻留意到了我的反應,「...願兒?」
「Sorry,我冇心,但係有d好笑。」我笑著搖了搖手,「係囉,咁哥哥你同我一齊,又係猴緊我d咩呢?」
 
嚴少諾聽到我的問題,更是驚慌了起來。
 
「我,我唔係啊,我冇呢個意思!!」嚴少諾緊張地解釋著,「雖然我都唔係好男仔,但係,但係我真係冇猴住——」


「得啦。」我笑著打斷了嚴少諾的話,「婷婷,你哥哥講得啱,識男仔要帶眼識人,尤其你咁cute,你阿哥就更加會擔心你比人呃。」
 
在這個家庭中長大,我害怕婷婷會把嚴少諾這種男生當成是隨處可見的男生。
明明遇上的機率極低。
 
「飯!飯——!!」
 
嚴媽媽把嚴少峰帶了出來,讓他能一同吃飯。
 
「願兒,你唔介意大佬一齊食飯啊可?」嚴媽媽小心地向我問道。
「梗係唔介意啦,你地都唔介意我一齊食。」我理所當然地回答著,「頭先大佬起入面做咩?」
「佢彈琴啊,大佬好中意作歌。」嚴少婷解釋著道,「佢好有音樂才華嫁,係高智商既自閉症患者。」
「咁好叻喎,我見佢仲識得自己食飯。」我微笑觀察著嚴少峰,「唔係個個都得嫁。」
「得就係得,但係唔識同人相處,出街又會嚇親人呢。」嚴媽媽嘆著氣道。
「比d時間佢啦,佢可能未覺得安全姐。」我也像其他人一樣拿起筷子,「我唔客氣啦。」
「如果個個都好似你咁唔介意既話,咁就好啦。」嚴媽媽還是沒能打起精神來。
「係個社會對佢地太多偏見姐。」我開始夾著菜,「其實大佬作歌真係好既話,都可以試下拎出去賣嫁。」
「佢邊有咁叻啊...」嚴媽媽一下子否定著,「係呢,你送果個冰滴咖啡壼好好用。」
「伯母中意就好。」我再次報以笑容,「如果d咖啡飲哂既話,可以話比我地知,我同阿諾再去買。」
「中意,好中意。」嚴媽媽笑得更開了。
 
這個滿足的笑容...
 
或許,其實嚴媽媽想要的也不多吧。
 
簡單的一小件事...
也能被哄得非常開心了。
 
「阿諾搵到個咁好既女朋友,我都放心哂。」嚴媽媽幸福地笑著,「阿諾,諗住幾時同願兒結婚。」
「噗——!!!」嚴少諾本來正安靜地吃著飯,卻因為這個問題而噴了一桌的飯,「咳、咳咳—!!」
「哥?!哥哥你有冇事?唔好死啊~」嚴少婷也驚訝地看著嚴少諾。
 
忍笑忍得快要噴出淚來了...
 
「有冇事啊?」我拿了一張面紙,遞向嚴少諾。
「唔該,冇事...」嚴少諾接過面紙,擦著剛才噴出來的飯,「媽,我同願兒都係開始左一個幾月,你唔好嚇親人。」
 
...明明你好像比我還嚇倒的樣子啊?
 
『咚———!!』
 
房間內,傳來一聲有什麼東西掉下的聲音。
...有微微的迴音。
 
嚴少峰立刻停下吃飯的動作,跑進房間。
 
「咦...?」我也立刻反應過來,跟著嚴少峰。
「願兒,冇事,應該係部吉他跌左落離。」嚴少諾也站了起來,「部吉他食唔住牆,成日都係咁。」
 
...正解。
的確是吉他掉下來了。
 
可是......
 
「做咩?好似好驚訝咁?」嚴少諾走到我的旁邊。
「...你地大佬......」我呆呆地看著眼前的畫面,「平時,都係咁樣,空手調樂器既音?」