係我仲未反應過黎之際,Michelle 溫柔地伸咗條脷出黎,舔著我既雙唇...

我終於回過神黎,雙手搭住Michelle 膊頭推開佢

我 :「Michelle ...我心入面得一個人,而果個人係我表妹,林婉婷!」

Michelle :「我知..但我唔介意呀...我只要你係我身邊就夠...」

我:「Michelle ...」



腳步聲由遠至近,好彩老母出黎救場姐

老母:「呵呵,有無阻咗你地兩個呀? 阿明呀,聽日d食材準備得7788架啦,你落樓下買聽日BBQ既野飲啦」

我:「收到!即刻落去買!」

Michelle :「阿明,我陪你去買呀」

老母繼續補刀:「都好呀,芷澄你陪明一齊去啦。你地兩個慢慢,唔急呀,Auntie 仲要準備夜晚果餐,你地8點前返黎就得」



老母真係Michelle 既‘好幫手’!

我同Michelle 一路上一句野都無講,因為我就係唔知點面對Michelle ,我都好驚我太絕情會傷到佢心...

-去到超市門口-

Michelle :「阿明,我都係走先啦,你幫我同Auntie 講返聲唔好意思...」

面對住咁尷尬既場面,我真係唔識處理,初戀就係表妹,我自己個感情經驗真係好少,睇到Michelle 咁,我又心軟起黎:「Michelle ,陪我買完野飲食埋飯先走啦,我哋係中國好隊友,仲係朋友黎架嘛!」



見到Michelle 笑返,我都放心返d。而且經我咁講一講,兩個人之間好似無岩先咁尷尬。

Michelle有返小小笑容:「係呀!我地係groupmate,仲係朋友黎!」 。

於是我地就一齊推住架車仔周圍兜。

我:「你有無咩係特別想飲架?」

Michelle :「檸檬茶唔錯呀」

我:「我都鍾意飲,咁買一pack先」

見Michelle 好似正常返,可以變返有傾有講,我個心都安樂d。

-買完野上返樓-



我大聲咁由廳嗌入去廚房:「媽,野飲買完啦,洗唔洗放雪櫃呀?」

老母:「睬鬼你囉,洗唔洗咁大聲」

老母見到Michelle 拎緊一袋野飲,即刻沖前:「哎呀,芷澄快d放落地下,好重架」,之後推Michelle 去梳化坐低:「你好好咁坐低休息下」

老母對住我講:「d野飲唔洗好雪櫃啦,我地有大既保溫箱,聽日去買冰雪住d野飲就得,你先將d野飲放廚房先。」

我:「喔」

Michelle 見到:「不如我都幫手搬d呀」

老母:「芷澄唔洗你,等阿明佢自己搬入去就得。」



我心中叫苦,天呀,我老母係咪真係我老母黎...

搬完野飲後,Michelle 就入咗廚房幫我老母手煮飯。

過咗一陣,老豆係房出返黎,坐落梳化到,係煙盒拎支煙出黎點著,吸咗一大啖

老豆:「衰仔,享齊人之福係咪好爽?」

我:「邊有...」

老豆:「你老母當晒芷澄係新抱咁濟,比婷婷見到都唔好受呀」

我:「我知...但阿媽佢份人..」

老豆:「你已經有婷婷,你要盡快搵個機會同芷澄講清楚佢」



我:「我會架啦...」

老豆:「而家你d後生真係呢,做事成日拖拖拉拉,一d都唔似你老豆我。想當年你老豆我,幾多條女追我呀,我一樣照搞掂....」

老母拎住盤菜係廚房出黎一見到老豆食煙:「死佬呀,都叫你唔好係廳食煙,要食去廁所開抽氣袋」。老母講過唔比老豆係廳同房食煙,因為會整到好大浸煙味,所以一見到,就會狂插佢

老豆:「係係係,收到!即刻熄!」。講完即走入廁所避戰。

老母:「好快d出黎呀!要開飯啦!」。講完再行返入廚房。

-食完飯後,我送Michelle 返到佢屋企樓下-

Michelle :「阿明,我到啦」



我:「我仲有d野想同你講...」

Michelle :「我知你想講咩架啦!但你可唔可以陪我多一陣?」

我都驚Michelle 會太傷心,唔知會做出d咩:「得呀,無問題呀」

Michelle 拉咗我去7仔買咗成打啤酒,之後我地兩個坐咗係Michelle 屋企附近既公園。

我:「Michelle ,唔好飲太多呀...」。我地兩個坐係公園,一句野都無講。而Michelle 不斷係咁飲,已經飲咗成半打,成個人都醉醉地...

Michelle 喊住講:「點解...點解我..我鍾意一個人有錯咩...我都只係想搵一個錫我既人...阿明...我鍾意你呀...你點解要..要咁對我...」。一路講,一路飲。

我將Michelle 手上支酒搶咗過黎,但佢又拎另一支繼續飲:「Michelle ...唔好再飲啦,你醉啦...」

Michelle 成個人趴係我身上:「我...我..我無醉呀...」。之後就完全醉咗係我身上...點搞呀大佬...

我係Michelle 身上個手袋摷咗佢支鎖匙出黎。

之後我大聲小小係Michelle 耳邊問咗好多次:「Michelle ,你住幾樓...咩室呀...」

Michelle :「17..B室」

Michelle 唔太重,我單手就可以攬住佢行路,而佢就成個人挨晒落我到,我另一隻手就拎住佢手袋同鎖匙。
已有 0 人追稿