[愛情][少甜]我地係炮友定係情侶【每日00:00更新】: 3b

《女方視覺》
原本我哋約咗十二點正喺紅磡火車站等，但方向感極差嘅我以為紅磡火車站同紅磡西鐵站係有分別嘅，所以搞到12:15先見到佢。

我嗰陣兜咗5分鐘都唔知自己要去邊，之後先打俾佢。

由於佢有極好嘅表達能力，我亦有極佳嘅理解能力，所以又搞咗十分鐘。

今日智朗著左一件白色T加牛仔褸同牛仔褲，不過佢個頭有D亂，感覺就好似趕住出門口梳唔切頭咁，基本上佢個樣同簽名會嗰次一樣，起碼認到佢。

「終於到嗱？」智朗笑住咁同講



「sorry ar~我唔太識路」笑係掩飾尷尬嘅最好工具

「咁我哋行啦！」佢拉住我隻手行

「去邊呀？」雖然眼前嘅佢好似幾好人，但戒心不可無
「有無聽過駱克道公共圖書館呀？」
我搖搖頭
「嗰度少D人，環境靜D，而且仲好近天星碼頭……」佢一輪嘴咁講，但係我就唔太聽得明



今日係星期六，地鐵異常擠逼，好唔容易先見到有兩個位坐低。

「希雯，你平時鍾意做D咩㗎？」佢問

我諗咗一諗「呃…睇書囉！」

「仲有無其他呀？」佢好奇咁問

「我都鍾意…溜冰嘅」以前我都學過花式溜冰，不過因為某些原因而無再學。我將垂下嘅幾條髮絲撥到耳仔後方，「算係學過下嘅」



「咁不如我哋下次去溜冰呀！去圓方或者mega box都得㗎!」

「其實你做咩對我咁好嘅？我地識得嗰幾日，又唔了解對方？」我忍唔住問佢

佢問「咁你介唔介意識多個frd呀？」我拎頭「咁就得啦！」

朋友，咩嚟㗎，食得㗎？