[愛情][少甜]我地係炮友定係情侶【每日00:00更新】: 假日特別篇
回憶
「爸爸,你要去邊呀?」天真嘅小女孩望住高大嘅爸爸問
爸爸望向星空,然後答:「爸爸會去一個好遠好遠嘅地方」
「咁即係邊度呀?」
「你望下個天」個爸爸指住天上最明亮嘅星星「我會去嗰粒最光最靚嘅星星嗰度」
「咁可唔可以帶埋我同媽咪去呀?」小女孩以渴求嘅目光望住爸爸
「唔可以呀,媽咪會喺度永遠陪住你。如果你之後想揾爸爸呢,就望住嗰粒星星同我講嘢,爸爸一定會聽到㗎!」
小女孩點一點頭,然後將目光投向閃爍嘅星星,口中哼唱起《小星星》,臉上帶住微笑。
一星期後,爸爸搭咗一架黑色嘅車走咗,無再返過嚟……
一個女人嘅臉上滿佈淚痕,揸住紙巾擦拭雙眼。
「媽咪,你做咩喊呀?」小女孩望住佢嘅母親
「爸爸…爸走咗呀……」個女人帶住濃烈嘅哭腔回應
「爸爸只係去咗嗰粒好光好閃嘅星星咋嘛!」小女孩望向窗外嘅陰沉嘅天空「只係而家好多雲雲遮住啫,遲D就會見到佢㗎啦!」
媽媽喊得更加大聲,然後佢攬住小女孩:「希雯,你應承我唔好好似爸爸咁去嗰粒星星度呀,你要陪住媽咪㗎!」
小女孩微笑住點一點頭,投入母親嘅懷抱。