[愛情][少甜]我地係炮友定係情侶【每日00:00更新】: 4b

《女》
好耐都無試過咁開心，天星碼頭陣陣嘅海風吹嚟，可以將學校同屋企嘅所有事拋到九雲屑外。美麗嘅太陽漸漸沉入海平線，黃昏將天空染成橙色，並慢慢轉為深藍，夜幕低垂。

仲有智朗，佢企喺我隔離，無出聲無動作就咁靜靜咁企喺度。原本諗住出嚟還返個人情俾佢，點知俾佢局住飲咗杯廿四味，而家到佢爭我一個人情lu

白色同綠色嘅天星小輪駛入，為數不多嘅乘客魚貫行出。

沉實嘅海浪聲同搖搖晃晃嘅船就好似一首安眠曲咁，越前進就越令人眼瞓，漸漸我敵唔過睡意，意識慢慢飄走。

喺好短時間，我發咗一個夢。



夢裡面喺一片遍佈烏雲嘅天空，陽光被重重雲層遮住，大地變得灰暗。

突然一陣風吹過，密密嘅烏雲被吹走，陽光穿過雲層，透出耶穌光。幾秒後烏雲消失，一片萬里無雲嘅晴空出現，太陽用力散發出屬於佢嘅光芒，耀眼、象徵希望嘅陽光……

「Hailey，起身啦，到尖沙咀啦！」智朗拍一拍我塊臉

原來我喺不知不覺間挨咗落佢個膊頭度瞓著咗。

「你咁攰，不如我送你返屋企呀？」



「唔使啦，我住屯門咁遠，又要轉車，你無謂兩邊走啦！」我婉拒

「咁我送你去搭車呀！」

行去巴士站嘅路上，我哋又傾左好多野，關於學校、興趣之類，唔使刻意去製造話題。

行到去260x巴士站前面發現已經排咗好多人，睇嚟好快有車。

上咗車之後，我上咗上層靠窗邊嘅位，向佢揮手道別，佢亦都目送我離開。



無幾耐，佢send左一張我哋喺自修室自拍嘅相俾我同一條偷拍我飲廿四味嘅影片。我即刻send咗個嬲嬲emoji 同大笑emoji俾佢。同一個三唔識七嘅男仔竟然都可以玩成日，咁睇嚟我終於可以脫離邊緣人呢個名啦！