[愛情][少甜]我地係炮友定係情侶【每日00:00更新】: 6b(續章)

《張梓謙視角》
「哇！乜你鍾意Karen㗎！你死啦你」佢興奮咁拎住我部機不停咁碌。Karen只係一個掩飾嘅道具，掩飾我真正嘅目標。
「紅都臉曬喎謙仔！唉呀，大個仔啦！」大姐你講到咁大聲，係人都臉紅啦！坐喺前面嘅大叔大嬸已經不滿咁望過嚟，我即刻捂住希雯個大嘴巴。

「你唔好同人講呀！」做戲做全套同高超嘅演技嘅係喺drama club學返嚟嘅技能
「得啦，大家識咗咁多年，我會保守秘密㗎」能夠同女神稱兄道弟嘅大概只有我張梓謙一個。

我喺小學已經識希雯，甚至連佢阿媽都見過。咁耐以嚟，佢無咩秘密我係唔知㗎，上至生活下至健康狀况，我全部都一清二楚。除咗今次嘅狗公仔事件之外。

「我用你部機send隻狗公仔嘅電話俾我呀！等佢知道你有個唔好惹嘅兄弟」講完我就已經send咗嗰個名為簡智障嘅聯絡人俾我自己。


「其實佢都無乜野呀，只係有時有少少過火啫，份人都幾好㗎…」仲夠膽幫佢講好說話，條智障填咗當兵入伍表格未呀？咁大膽去搞我個希雯？
「我唔理，總之你唔好識埋D三唔識七嘅人。我知你好攰好辛苦，但都要愛惜自己㗎，你悶嘅就揾我出街啦揾我傾計啦！」我唔會允許任何人去傷害你，我會以任何身份去保護你一生一世。

佢微微點頭就還返部電話俾我，然後又做佢最鍾意嘅事，就係望窗外嘅風景。

好快就到咗佢屋企樓下，而我都準備走啦，我唔急我一D都唔急。

「上去一齊温書呀，今晚食埋飯先走呀？」希雯問，睇嚟佢已經將約咗狗公仔去自修嘅事忘得一乾二淨
「靚女叫到，Why not？」夜襲少女閏房行動開始~



好啦，其實我唔係第一次去希雯屋企㗎啦，基本上我係間唔中都上佢屋企打機吹水食飯温書，嗰度已經算係我第二個屋企，同埋……

阿媽我唔返屋企食飯啦！