<<坐上前往尖沙咀的天星小輪，迷失在維多利亞港>>: <<迷失三十一>>

「阿康，你跳過去先啦，我留最後。」

「好，你幫我將個BB綁喺我身上，我再跳過去。」

「無問題。」

就在阿華幫忙把嬰兒綁在阿康身上時，他們兩人同時聽到「竊竊，竊竊」的聲音。

「阿康，你聽唔聽到？」阿華警戒著四周。





「嗯，有啲奇怪嘅聲。」阿康也四處張望著。

「好似喺船外面傳嚟。」阿華走到船的邊緣，想弄清楚那是甚麼聲音。

「小心！」阿康大喊的同時，用力把阿華拉到自己身旁。

只見一條又一條像是觸手的東西，在船外慢慢冒出來，然後左右晃動著，感覺就像是小輪無故長出了這些觸手似的。

「呢啲係？」





「係怪物，同陳德昌一樣嘅怪物！」

兩人說話期間，觸手快速地撞向兩人，阿華的動作比外表看上去更為嬌健，成功避開撞擊。

而阿康由於要顧及嬰兒的狀況，他只能以較小的動作避開撞擊，但亦因為這樣，他的右手被觸手擦過，流出了鮮血。

「阿康，你無嘢呀嘛？」

「無事，不過，我哋跟住點做好。」





「一係我試下引開佢，你搵機會跳過去。」

「我諗應該行唔通。如果佢係打算殺死我哋，佢應該會繼續追過嚟，但係佢無咁做，我估，佢只係想拖延時間同埋唔畀我哋過去碼頭。」

「唔通我哋只能夠等死？」阿華看著那些觸手，又望了望那些逐漸逼近的發光體，無奈地搖了搖頭。

「咪灰心住，你同我一齊落去下層。」

「落去下層？」

「無錯，陳德昌有講過，鹽可以令佢哋嘅行動力降低，我頭先上嚟之前，就發現下層有好幾袋嘅鹽，因為頭先太心急返上嚟，所以只係袋咗少少。不過，事實證明，啲鹽對阿May係相當有用！」

「橫掂都無其他辨法，即管試下啦！」

兩人心念一轉，便打開了往下層的大門，快速地往下走。





「明叔，佢哋兩個唔見咗呀。」

在碼頭上的我們，看到那觸手怪物蛭伏在船身上，本已擔心兩人的安危，此刻看到他們消失了，該不會已經被殺了吧？

「我諗佢哋落咗去下層啫，應該無事嘅。不過，再拖落去都唔係辨法，就算嗰隻怪物唔對付佢哋，啲發光體都會追到佢哋。」

「有啲咩係我哋可以做？」我緊皺著眉，思考著有沒有任何幫助他們的方法。

「仲諗咩呀？唔好等啦，再等落去我哋都有危險，不如我哋走先啦！」阿強看到怪物出現後，便一直嚷著要離開碼頭。

「唔得，我點都要等埋佢哋！你與其係度嘈，不如幫我諗下有無咩方法可以幫佢哋啦。」

「幫咩啫，你睇唔睇到呀，怪物嚟㗎！我哋手無寸鐵，咩都做唔到㗎，快啲走啦！」阿強在不知不覺間，已離開我們甚遠，相信只要任何一人附和他，他便會以最快速度逃離這裡。





「唔走得。」明叔此時也開口。

「點......點解唔走得呀？再唔走就無機會㗎啦！」

「乜你肯定出面係安全咩？」明叔一句說話，便令阿強安靜下來。

「而且，我硬係覺得，隻怪物有啲奇怪。」

「奇怪？」我問。

「你見唔見到隻怪物身上面，好似有啲布碎。」

「咦？有，有呀！」

「覺唔覺得有啲熟口面，就好似，嗰個假嘅阿May件衫咁。」





的確，仔細一看，那些布碎的花紋，跟阿May穿著的衣服是同一款式，相信這並不是甚麼巧合。

「你想講，呢隻嘢就係阿May？」我意會到明叔的意思，他也點了點頭。

「阿May頭先明明夠膽對你郁手，但係依家變咗做怪物，反而無對阿康同阿華出手，你話係咪好奇怪。」

的確，若這怪物真是阿May，他應該會毫不猶豫便痛下殺手才對，為甚麼他到現在還不動手。

「如果無我估錯，怪物係唔可以殺死我哋。」

我們都看著明叔，用眼神詢問為甚麼有這樣的猜測。

「你哋諗下，如果啲怪物要殺我哋，喺船度仲邊駛搞咁多嘢。陳德昌都有講過，呢個世界需要能量去維持，而我哋係呢個世界重要嘅能源，所以佢哋唔會直接殺死我哋。而阿森，你本來就唔屬於我哋呢邊嘅人，所以阿May先會想殺咗你。」





明叔的猜測十分有道理，但是對現況看似並沒有甚麼幫助。

「所以，我有個諗法。」

明叔看著我，難道他希望我充當誘餌。