<<坐上前往尖沙咀的天星小輪，迷失在維多利亞港>>: <<迷失三十二>>

「咳咳，點解咁大陣味？」阿華來到下層，一陣濃烈的味道向他襲來。

「係喎，頭先都無呢陣味㗎。」阿康亦被這味道嗆得掩著鼻子。

「唔好講咁多啦，啲鹽係邊？」

阿康帶著阿華來到承載著鹽的地方，那地方明顯被好好保護著。

「阿華，你覺唔覺得有啲奇怪，點解呢架船上面會有鹽，而且，仲好似係特登收埋咁。」





「我估，係瑪雅人嘅計劃嚟。」

「咩意思。」

「你諗下，瑪雅人之前派人入嚟做調查，雖然唔知道實行咗幾耐，但話唔定，佢哋已經發現到對付啲怪物嘅方法。所以先會收埋啲鹽喺度。」

「既然知道方法，點解佢哋唔將混入地球嘅間碟捉出嚟？」

「或者，佢哋已經試過，只係無諗到，啲扮成人類嘅怪物弱點，會係喺後頸。」





「咁又係，正常都唔會特登撥開啲頭髮灑啲鹽上去後頸。」

「阿康，如果呢啲真係瑪雅人留低嘅工具，我哋不如搵下仲有無其他有用嘅嘢。」

「好，不過要快，我哋仲要上返去，我擔心架船會愈飄愈遠。」

「三分鐘，我哋分頭搵下有無啲有用嘅嘢，無嘅我哋即刻返上去。」

阿康點了點頭，兩人便分開行動，而阿華則像是有意圖地走向駕駛室似的。





「點呀，有無搵到啲咩？」

「我搵到啲餅乾同樽裝水，我只係拎咗兩支同少少餅乾，驚拎太多會唔方便行動。」

「我喺駕駛室搵到把刀仔，仲有支手槍，雖然唔知有無用，但我都係拎住先。而最重要嘅係，我搵到張地圖。」

「地圖？」

「係尖沙咀嘅地圖，上面有好多地方畫咗紅點，我諗係用嚟提醒我哋唔會接近。」

「太好啦！咁陣間我哋就唔駛擔心去咗啲危險嘅地方。」

「嗯，我哋快啲上返去啦，如果唔係走唔甩就慘啦。」

「好。」





阿康接過阿華的小刀，兩人回到上層去。

「明叔，你想我點做？」我問。

「如果隻怪物嘅主要目的係殺你嘅話，我喺度諗，如果你離開咗碼頭，佢好有可能會追上去，咁阿康佢哋就可以順利跳過嚟。」

「嗯，我都係咁諗。咦，阿康佢哋上返嚟啦，唔估咁多啦，我直接試下啦！」

我把褲袋裡的硬幣通通放在手上，然後狠狠地扔向那觸手怪物。

「白痴，我走先啦，你慢慢玩啦！」

我邊跑邊回頭看著那怪物，但那怪物久久未有行動，難道這並不能把他引開？





幸好，在我快要離開碼頭時，我看到明叔給我發出的訊號，即是說我成功把那怪物引開了。

「好，即管跟上嚟啦！」

我朝著碼頭外一直跑去，然後繼續向著海傍方向跑去。

但我卻發現，那觸手怪物卻沒有跟上來。

我待了一會兒後，仍然看不到任何怪物追上來的縱跡。

「弊，中計！」

我馬上轉身跑回碼頭，希望能提醒他們小心。

可惜，已經太遲了。