<<坐上前往尖沙咀的天星小輪，迷失在維多利亞港>>: <<迷失三十七>>

「快啲入去，佢哋追上嚟啦！」

我們一行人跑到洲際酒店，在後門的位置找到了入口，幸好大門沒有鎖上，我們順利地進到酒店裡。

「咦？佢哋好似無追上嚟？」

阿康確定所有人都進入酒店後，馬上把大門關上，而那些怪異的發光體則在我們進入酒店後，慢慢地離開，只餘下兩三個發光體在外面巡邏著，大概是在監視我們，不讓我們輕易離開吧。

「成間酒店都黑媽媽，啲怪物匿埋喺邊都唔知，我哋死梗啦，玩完啦！」





「你再出聲我就一槍打爆你個頭！」

阿強似乎已經忘記了在碼頭被阿華用槍指嚇的事實，又再出言不遜，阿華只好再一次拿出手槍來威嚇他。

「打打打，你打死我好啦！打死我就唔駛好似依家咁驚呢樣嗰樣！嚟呀，打死我！」

「好，你要死我就送你一程！」

阿華右手按下手槍的保險掣，似乎真的要取阿強的性命。





「停手，唔好再嘈啦，啱啱阿萍先走咗，係咪要所有人死晒先安樂！」

雖然阿強的確不討喜，但是再這鬧下去，別說離開這個詭異的世界了，連能不能到達海濱花園也是一個疑問。

「阿森講得啱，停手啦，自相殘殺對我哋無好處。」明叔亦開口。

「哼！」阿華怒視了阿強一下，便把手槍放回口袋裡。

而從死亡邊緣回來的阿強，此刻才懂得害怕，整個人發軟坐了在地上。





「哇，哇哇。」就在氣氛弄得很僵之際，一陣哭喊聲把寂靜撕破，那是嬰兒的哭聲。

「哦，乖，乖呀，唔好喊啦，乖。」阿欣溫柔地抱著那個嬰兒，邊搖邊哄他。

「乖啦，唔好喊啦，唔駛驚喎。」阿輝亦在一旁幫忙。

這個畫面使原本僵化的情緒都緩和下來。

「其實佢都算叻㗎啦，跟住我哋跑咗咁耐，都無喊過半句。」明叔像個慈祥的爺爺般看著那個嬰兒。

「佢真係好叻，不過，佢父母突然間唔見咗個BB，一定傷心到死啦。」阿欣邊安撫著嬰兒，使他不再哭喊。

「所以，我哋更加要合作，離開呢個地方，將個BB帶返去佢父母身邊。」明叔輕輕握著嬰兒的雙手，大概是身體的溫度使嬰兒感到安心，他又再次的入睡了。

「的嗒」





「咦？你哋有無聽到？」我環視四周，但週遭環境實在太昏暗，我甚麼都沒有發現。

「做咩呀？我咩都聽唔到喎。」阿康也警戒地四處張望。

「靜啲，唔好出聲，你哋聽下。」我作出噤聲的姿勢，讓他們集中精神。

「的嗒，的嗒」

聲音雖然很微弱，但是，的確能聽到有甚麼東西在我們附近。

「我聽到，係咩嚟？」阿華在聽到後，也緊張地四處張望。

「好似係上面傳嚟。」我指了指上方。





「咁依家點算？」阿康輕聲地問，深怕被發現。

「出面仲有幾隻發光體喺度，應該無辨法出去。」阿華靠近我們進來的大門，窺視著外面的情況。

「有無人嚟過洲際，知道呢度個地形？」我問。

阿華和明叔都示意有來過，但結構是怎樣的他們也記不太清楚了，只知道我們身處的位置，是平常吃自助餐的地方。

「不如咁啦，既然依家都走唔到，我哋搵下呢度有無地方比較安全，等出面啲發光體同怪物走晒，我哋再行動。順便搵下，呢度會唔會有水同嘢食。」我提議。

「但係上面啲怪聲？」阿康緊皺著眉，對那聲音相當在意。

「我覺得可以無視，因為啱啱個BB喊，佢都無過嚟，可能啲聲音只係啲機械聲，又或者係水管聲。」

「唔得，既然係要留喺呢度，就算無辨法排除危險嘅因素，至少都要知道發生緊咩事，唔好唔記得，呢個位置係滿佈紅點嘅。」阿華不同意我的看法。





「我明白，但係咩都唔知咁走上去，可能係另一種危險都未定。」比起把危險因素找出來，我更害怕打草驚蛇。

「既然係咁，上面就等我去啦！你哋留喺呢層搵下有無比較安全嘅位置同埋搵下有無啲有用嘅物資。如果上面安全嘅，陣間我哋再一齊上去。」

「你一個上去咪好危險？唔得！」我急忙阻止。

「放心啦，多人反而會阻住我，我應付到嘅。」阿華自信地說。

「雖然係啫，不過......」

「咁啦，我同你一齊上去啦。」阿康主動提議。

「吓？阿康你......」





「放心啦，我應付到嘅，反而你哋喺下層要小心。尤其係阿森你，千祈唔可以有事。」

「唔好講咁多啦，要上去就快，我始終擔心呢度唔安全。」

經過阿華的催促，兩人吃了點餅乾，喝了口水後，便懾手懾腳地向上走了。