<<坐上前往尖沙咀的天星小輪，迷失在維多利亞港>>: <<迷失三十八>>

「好啦，我去搵下呢層有無啲有用嘅嘢。你哋留喺度啦。」我對其他人說。

「唔得，你一個人去，有咩事咁點算？」明叔說。

「明叔，我知道你哋擔心，但係多人行動都未必係好事。阿欣要照顧BB，明叔你頭先行路明顯慢咗落嚟，我估你應該對腳有啲事係咪？再加上，都要有人留喺度睇住後門，唔好畀啲怪物追入嚟。所以，我一個行動反而會好啲。」

「佢要去咪畀佢去囉，反正咪又係死路一條。」阿華離開後，阿強的嘴又不安份起來。

「但係......」明叔仍然替我感到擔憂，但腳痛的事實卻令他無法強跟著我。





「我，我同你去啦。」想不到一直都很安靜的阿輝，竟會主動地說要跟我一起行動。

「吓？你睇住阿欣好啲喎。」

「唔駛擔心，我會照顧好自己。阿輝，你同阿森去啦，小心啲。」

「既然係咁，好啦，我哋會盡快返嚟。」

結果，我們一行七人加上一名嬰兒，就這樣分成三組，在這個未知的領域裡，進行探索。





雖然說要調查，但這裡原本是吃自助餐的地方，放眼過去，只能看到滿滿的餐桌和椅子。

「就咁望過去，好似淨係得啲枱枱櫈櫈咁。」我邊走邊說，卻聽不到任何回應，看來這小子真的有夠沉默寡言。

「不如咁啦，我哋分開行，快快手手搵下有無啲咩可以用啦。」我實在忍受不了被一隻無聲的幽靈跟隨其後，故提議分開調查。

「唔得，你係我地可唔可以成功離開呢度嘅關鍵，我一定要保護你。」想不到阿輝竟會這麼執著，我還以為他是那種不會在乎他人的人。

「無事嘅，你睇呢度乜都無，雖然係暗咗啲，但應該無事嘅。」





「唔得！我應承過阿欣，我一定會帶佢離開呢度，所以我就算死，我都會保護好你，等佢可以返去原本嘅世界！」

想不到，這個看起來沉默寡言，一臉冷漠的年輕人，竟會願意為了他的女朋友做到這個份上。

「估唔到你會為咗你女朋友做到呢個地步。」

「女朋友？」

「阿欣嘛，佢唔係你女朋友咩？」

「佢......唔係我女朋友，佢只係一個我對佢唔住嘅人。」

昏暗的環境下，雖然無法看清楚阿輝的表情，但從他的聲調和語氣，聽得出他也有很深的原因。

「對佢唔住？」





「無錯，可能因為呢件事，我先會嚟到呢個世界。但係阿欣佢唔應該屬於呢度，佢應該更加自由，我一定要帶佢離開呢度！」

「停！」

「做咩呀，係咪有怪物？」阿輝緊張地站到我身旁。

「唔係，你有無聞到一啲味，一啲香味。」

「香味？咦？好似有，喺左邊。」

我們同時朝左邊看，在不遠處有一道虛掩著的門，香味正是從那邊散發出來的。

我倆對望了一眼，然後靜俏俏地走到門前，探聽著內裡的情況。





「入面好似無怪物喺度。」我盡力壓低聲線，阿輝點頭附和。

當我想把門推開時，阿輝則拉著我的手臂，阻止了我。

「等我入去先，你喺呢度等。」

話音剛落，阿輝沒有理會我同意與否，便把我拉開並進到門內。

無可奈何下，我只能在門外等著阿輝，畢竟要是真的出了甚麼意外，我也能想辨法處理。

寂靜的環境下，時間的流逝好像特別緩慢，每秒鐘也像是度日如年般。

正當我快要按捺不住，跟阿輝一起進到門內時，眼前的門被打開了，門內的阿輝向我揮手示意。

「點呀？」





我跑進門內，發現竟是一個像是廚房的地方，四周放著很多不同的食材。

而香氣的來源，則是桌子上放著一大鍋一大鍋煮熱了的料理，其中散發著濃烈香味的，是一鍋黃色的料理，那種香氣，似乎是咖哩。

面對著這誘人的香氣，肚子不期然發出「咕咕」的叫聲。

大概是很久沒有嘗到食物了，我的手已伸向那鍋咖哩，卻再一次被阿輝阻止了。

「真係要試？」

的確，在這種詭異的世界，突然出現了眼前這些美食，正常也會感到奇怪吧。

是陷阱？還是這裡有其他人存在？





然後，我們還沒有來得及細想，廚房內的另一道門，竟傳來了「咔嚓」的聲音，有誰要進來了！