[真人真事改編] 我係一個最愛hurt人感情嘅仆街校花: ［第二章］調位

好吧，首先我要形容下呢一位王活勤同學嘅外表先。

佢身高153 (記住，依家係F1)，體重57 (偏肥)。

佢有一個4mm嘅魚蛋頭，蠟筆小新粗眉，眼仔又扁又長，充滿粉刺同黑頭嘅大鼻，同埋一個薄薄嘅嘴唇。

以我嘅角度黎睇 (我係外協)，佢真係好似一個大陸人。

佢呢，呢個人，真係一言難盡。





從小學都中學，佢都離唔開一個「曳」字。

上到呢間中學唔夠一個禮拜，佢已經成為左全校老師嘅頭號通緝犯。佢上堂訓覺、打機，小息係走廊跑、打人......

啊，仲有佢好大聲，唔係一般嘅大聲，佢係非常非常非常非常大大大大大聲！無論你係邊度，都總會聽到一把響亮得黎，又帶點沙啞嘅聲音係度講緊粗口......

我呢，作為一個「乖乖女」，緊係唔會同呢D人有任何接觸同扯上任何關係啦。

好彩我地之前坐得無雷公咁遠，所以佢無論做咩事都唔會牽涉、影響到我。





而我，當然就好順利、好平靜咁過左半個平安嘅F1歲月。

依家，呢位聞名全校嘅王活勤同學，竟然會成為會同我朝夕相對嘅鄰座，我真係十萬個不情願......

算，就當比啲歷練自己，只要唔理佢就得啦。

「Hi，我叫王活勤！」
「Hi。」我hea答佢。
「喂，你好似好多仔溝窩，你有無男朋友噶？」
「哈，係咩，無窩。」「喇，我要同你畫楚河漢界，你唔準過界，因為我唔想同你有任何接觸。仲有，我唔鍾意講嘢，麻煩你唔好撩我傾計。就算你同我講嘢，我都未必會答你。」我即刻同佢畫清界線。




「哦，好啊，睇下點。」佢露出一個賤笑。

完!!!!!!我已經唔想再同佢講嘢啦！佢把聲真係好難聽啊啊啊啊啊!!!!!

「各位同學再見。」「李老師再見。」
「啊！」我大叫，全班人望住我。

搞錯！佢竟然扯我條馬尾????天啊！佢竟然掂我？

「你做咩啊？」我好嬲咁問佢。
「無啊，想同你玩下咯。」講完，佢就衝左出班房。

天啊，我想調位啊！