親愛的，老師也有喜歡過你: 匿名信

又係我witty, 我一直都好好奇, 點解我每一段感情, 都係一個羅生門事件,
明明都係同一段情, 但就有好多個唔同嘅版本,
而學校入面啲人就往往咁中意食花生, 縱使我已經畢業3年.
可能始終講師生戀, 都係比較爭議性掛.

話說我四月尾去日本之前, 趕住出都寫晒《咁樣算唔算師生戀》,然後放上紙言.
你知啦, 中意老師喎, 曖昧不明喎, 好嚴重㗎嘛, 雖然我同我娘親平時咩都傾,
但講到師生戀呢啲心事, 你點開口同屋企人講啊, 嫌命長咩...




最信得過嘅屋企人都唔講得, 更何況朋友呢, 係人係鬼你都未知啦,
咁所以我先穩姓埋名咁打咗我嘅心事上紙言, 咁end up又有3千個人睇咗我個故事喎,
感覺好爽, 好似同咗3千個樹洞講咗呢個故事3千次.
同一件事講咁多次, 緊係可以釋懷啦痴線. 唔講就話會鬱到精神病姐...

咁係我未釋懷之前都寄過三次名信片比佢, 第一次係2016年6月係北京寄出,
第二次係2017年6月係西藏寄出, 第三次係2018年4月係日本寄出.
次次我都係匿名寄比佢, 北京果次佢收到有話比我知, 即使上面冇我名.
西藏果張寄咗成10個月, 但連我自己都冇收到, 大佬徒步行去都到啦, 我諗張野都寄咗去天堂...
但上面我寫咗千字文比佢, 有好多剪不斷理還亂嘅東西, 打算一次過問清楚佢, 但似乎連個天都唔想佢收到...咁就算啦



我係日本返咗來都兩星期, 佢係泰國旅行完都應該返咗來一星期喇,
有一日我收信嘅時候, 發現咗信箱有一封信, 你知呢個冇乜人寫信、個個月淨係收到啲銀行月結單嘅年頭,
當你係信箱搵到封家書咁款嘅野, 緊係特別興奮同時亦會好好奇係邊個寄比自己.


當我一打開個信封, 入面有好多張名信片同一封匿名信, 心諗, 邊個啊...寄咩埋啲咩比我啊...
出於好奇心, 我立馬翻到最尾望下個下款. 喂！名呢？冇名嘅喂！得個日期, 寫住 5/5/2018