親愛的，老師也有喜歡過你: 有啲嘢，講左出口就收唔番

我拎住疊名信片同匿名信, 心諗, 最憎人懶神秘 (完全冇發現自己都寫好多匿名信比人),
我又翻一翻去信封望下, 又睇下個上款. 如果唔係上面白紙黑字寫住我個名, 我都會以為自己收錯信.

望住啲筆跡, 好熟悉, 但其實個個大人寫啲字都咁蹽草㗎啦,
特別係果啲中醫師、跌打師傅, 佢地肯定自己係寫緊字, 唔係寫符? anyway, 我開始睇封信 

「親愛的Witty, 幾時同我去旅行啊！最近又忙咩啊！幾時得閒同我食飯？」

一望到呢句就知邊個啦, 邊個會咁大膽叫我陪佢去旅行啊除咗K之外.
不過我個人覺得佢呢句野同你好嗎冇咩分別, 永遠都係得個講字,


次次去到目的地先send張相或者寄卡比我, 咁樣實係約埋我去旅行啦.

「記唔記得2015年我喺英國寄比你果副puzzle, 我果陣係背面寫住叫你
“長大了, 事事要寬容啲”, 冇諗過你打後果幾年真係寬容到好似唔記得咗我咁」

果副puzzle我緊係記得, 雖然細細副, 但係幅圖係雪景, 砌咗幾耐先可以反轉睇啲字啊大佬.
講到咩寬唔寬容啲, 我睇完冇耐都唔記得啦, 加上果陣又有男朋友, 咁正常都唔會對第二個男人咁上心啦,
加上你又唔係淨係對我「咁好」, 我點知你搞咩姐...你對其他人都曖曖昩昩咁, 我仲咁上心咪煩著自己.

「果陣係英國趕飛機我都特登要去寄啲野比你, 因為應承過你嘅野, 我絕對唔會唔做.」



哇！多謝晒喎！咁多年來話帶埋我去旅行果啲係咩嚟㗎？姐係隨口噏嘅, 冇意思嘅？

「果陣諗住等你收到張卡, 再約你出來食飯, 同你傾下過去、講下 “將來”, 可惜你當時心有所屬.」

我睇到呢句, 個心都離一離, 應該話係酸咗一酸...其實點解一次兩次你都要離場喎...或者佢冇信心？或者佢始終覺得一個人都好好？

「我知道當刻冇可能, 亦明白有啲說話講咗就收唔番, 所以果陣我選擇咗冇同你講到. 對唔住, 因為我唔想失去一段咁令人開心、舒服嘅關係.」

其實講到尾都係時間錯咗姐, 我都好清楚你搵我黎攝嘅, 唔洗講對唔住喎. 不過依家你寫封咁嘅信, 一樣收唔返, 你依家又唔怕面阻阻咩？



「有時會諗, 如果我地年紀唔係差咁遠, 到底我地仲會唔會咁friend、你又會唔會睬我. 我過住呢種流離浪蕩嘅生活都七年, 有時有你陪下, 我覺得我嘅世界唔係得返自己.」

我頂你個掣, 開到口話明搵我攝咁講喇下嘛, 所以面對呢種hihi八十後, 認真你便輸了.

「每次我一個去旅行, 都會買野比你食同埋寫卡比你, 因為我知你真係好中意食野, 但我更想帶你周圍去食, 可惜, 我憑咩身分、咩角色去同你出走.」

有時真係好嬲佢, 原來呢啲想法佢一直都收埋係心入面, 頂, 我男朋友都換咗兩個啦呢6、7年, 咁多次機會, 係要依家先講.

「次次啲卡嘅下款都要勉強地寫上"哥"字, 其實我真係唔係好想咁寫, 但又諗唔到可以寫咩. 事實上, 如果你要我再用呢個"下款"​, 我寧願匿名​.」