親愛的，老師也有喜歡過你: 訊息和morning call

路過佢story見到佢好難得咁post咗野, 我又忍唔住多口問佢去咗邊.

我: 去咗邊？
K: 泰
我: 又去. 一個？
K: Ys
我: 一個唔悶咩...
K: 過來
我: 考試
K: ...
我: 小心比雞啄

K: ==
 

一個月去咁多次泰國, 仲要一個人去, 有啲咩可以做吖...哈哈, 佢之前已經好慘, 比我笑佢第日會臨老入花叢,
依家仲要俾我知道, 佢成日單身寡佬一個月去泰國咁多次, 好難怪我笑佢 “石罅米比雞啄”喎, 哈哈.

吖仲有, 你地冇睇錯, 我哋平時texting啲對話真係咁. 見到面就兩個都口若懸河, 一講到message要打字, 大家對手都好似殘廢咁.
但其實係好耐之前, 大約四年之前, 我哋D對話冇咁hea㗎...真係唔會好似而家咁...

「長洲早茶前一晚我叫你morning call我, 其實我都係想一起身就聽到你把聲. 雖然你叫醒我嗰陣又唔係話特別溫柔, 但係有個人肉鬧鐘叫醒自己都幾幸福.」



頂, 鬧鐘. 已經賤到將我物化. 不過又啱嘅, 成件事係幾正嘅, 大佬, 有條女日日call自己起身, 但佢又唔係自己女朋友喎,
唔使焗住投資時間同金錢落去, 但當自己想有人填補心靈空虛嘅時候, 又有人陪. 條數計落, 都真係幾抵. 嗱, 我就係成日做埋啲咁蝕底嘅嘢嫁喇.

「嗰排多得你日日Morning call我, 我先唔使日日 “飛的”返工. 計落你冇功都有勞嘅.
你以前成日都對我噓寒問暖, 事事關心, 嗰陣晚晚都要等埋你個good night, 我先瞓得着.
老實講, 我差少少就搭沉船. 但我嗰陣又扮到唔稀罕咁, 浪費晒你一番好意.」

喂, 咩事啊. 無啦啦拎晒所有野出嚟講, 係咪有絕症啊？定係有抑鬱症啊？
死啦, 上次見面叫佢有咩事要搵我傾唔好屈住屈住, 咪陣間屈到自殺, 我會喊死㗎.


而家又走來寫埋D咁嘅嘢, 唔係真係有問題呀嘛...唔好死呀大佬, 我都會掛住你㗎.

「可能我嗰陣對你實在太過冇心裝載, 所以你依家先唔係好理我. 你依家send得比我嘅message通常都淨係問機票,
一係都離唔開果幾句, "最近點?"、"死得未?"、"搞咩?"、"幾時見?", 你成日話我hea覆你, 其實你啲message唔係好我好多囉.」

咩叫「唔係好理我」, 好似係有人已讀不回我先囉...大佬, 依家啲人講嘢本末倒置嘅. 我依家都覺得好委屈㗎, 比個良心你當狗肺.
我仲要成日都有冤無路數咁, 我覺得自己都好慘㗎, 你個冚家富貴有冇關心過我啊？

仲有啊, 講咗十萬九千次我出年想去秘魯, 叫咗佢得閑望到有平機票就話聲我知, 反正佢無時無刻都望住啲機票幾時特價㗎啦.
我次次提, 佢都耍走我, 喺度話咩成日都有平㗎啦, 心諗, 唔順便幫我睇埋嘅, 就唔好再係我面前講到自己幾勁, 點樣成日執到啲平機票！

「有時我都好懷念以前嘅我地, 晚晚都message, 朝朝都morning call. 不過好似有啲嘢永遠都回不去了.」

知道回不去就算吧啦師兄. 即使某程度上我係幾鍾意佢都好, 但當我諗深一層, 嗰陣俾佢當正女朋友咁洗, 攞嚟當鬧鐘,
都係因為我入世未深、經驗尚淺, 先會俾佢玩到. 我哋呢種咁嘅關係維持左成五年, 係對自己真心嘅, 早就係埋左一齊啦.


有啲嘢, 唔屬於你, 就係唔屬於你㗎喇！學佢話齋, 「凡事寬容一點、看輕一點」.