親愛的，老師也有喜歡過你: 不讀不回

想我唔嬲佢至奇, 我唔"嬲"佢我地就以後都唔會再見架喇, 信我. 我嬲佢有好多原因.
同佢果種關係真係可以話「剪不斷, 理還亂」, 佢dry咗7年, 唔係有我?
邊度搵個人黎呷佢醋, 佢應該要多謝我先啱囉, 哼, 仲好意思嘅.

講講下, 我又好似嬲爆爆咁, 怪不得佢叫我寬容啲啦. 我望吓個月曆, 仲有兩個星期我就要去歐洲.
突然之間醒起, K之前幫我買機票, 我都仲未過返數俾佢. 所以我就打開WhatsApp諗住message佢,
一打開我哋嘅對話, 見到我上個月尾, 喺日本旅行嘅時候, Send俾佢張圖同埋個訊息佢都仲未睇, 心裏面有少少唔開心.
你知啦, 我玻璃心㗎嘛. 俾人不讀不回, 的確係幾難承受嘅. 呢個時候佢突然之間Online, 心裏面一個小鹿亂撞,
之後見佢offline, 心裏嘆一嘆氣, 心諗, 唉都係算啦, 期待啲咩喎.



不過錢呢啲嘢都係要還嘅, 講過有拖冇欠㗎嘛. 喺你已經俾人已讀不回或者不讀不回嘅情況下, 仲要message佢,
攞佢銀行戶口號碼, 其實心裏面需要莫大嘅勇氣. 最後我都有WhatsApp搵佢, 同佢講 「方便的話比銀行個戶口號碼我過返數俾你, 拖不欠」

發出呢個信息之後, 我又不自覺地等佢回覆我嘅訊息. 我隨手喺枱面攞起另一張明信片, 諗住係佢回覆我嘅呢段時間, 回望下呢段可愛可恨嘅回憶.

Witty

恭喜發財 幾時結婚派利是比我？我個蘿白糕呢？又話整比我食. 留番個比我 等我UK番來同我一齊食.

哥
1/2/2017

望住呢堆明信片, 心諗, 係咪真係咁得閑去旅行. 又冇結婚, 咩事成日避年姐...我年年整咗啲年糕、蘿白糕,
擺到發晒毛你都未翻啦, 仲好意思講. 以前過時過節問我有冇好嘢整比佢食, 蘿白糕、糭都係基本.
你地唔好問我點解我整親都係呢啲嘢食, 後生女通常我鍾意整甜品, 但我就係咁特別㗎喇... 發完牢騷之後, 我又繼續睇封信.

 「嗱, 帶你去食好野, 笑番唔好嬲喇. 記唔記得當年去長洲camp, 你為咗要食, 特登早起都要去飲早茶.
我嗰朝其實想瞓多陣唔想起身, 但難得約到你飲早茶, 我最後都係嗱嗱臨起身. 不過飲早茶呢啲嘢都係可一不可再.」

好多野都係得一次, 有啲早茶想飲多次都無. 嗰年一月凍冰冰, 其實我都好想賴床, 如果唔係L死拉我起身,
我應該會打電話叫佢繼續訓多陣, 唔好去飲早茶算. 仲有, 其實我真係冇佢講到咁咁為食囉.



「前一晚你仲要陪住L係我間房坐, 坐到夜一夜佢都唔肯走, 真係難為你同我.
你就話坐咗一陣自己瞓着咗姐, 佢係咁捉住我傾計, 其實我都好想瞓, 好想叫佢帶埋你返上房,
俾我瞓覺. 我以為你已經好多嘴, 但係佢比你更加長氣.」

死野, 實係嫌人哋長氣又同人地一齊報course啦, 唔好諗住喺度黑下L, 我就唔嬲啊, 一單還一單, 唔好諗住混為一談.

我有拎起手機睇下佢有冇覆我WhatsApp, 佢覆咗, 但係除咗銀行戶口個號碼, 其他咩都無. 樓上啲嘢佢就咁藍剔咗就算. 我都就咁send咗個OK覆佢就算.

心諗, diu, 呢頭send 封咁嘅信俾我, 呢頭又Hea覆我, 想點呀大佬. 激鬼氣咪掉低封信同啲明信片, 就咁掉咗喺自己枱面，都冇心機再睇.