越界的姐弟戀（甜）: 第四部-第十一章：四人行

越界的姐弟戀第二季

當我仲愁緊點算時，Michael忽然加把嘴講：「Michelle 細佬好嘢wow，果然係醒目氣，竟然識到個靚女女朋友」。之後Michael快速行到家姐旁邊，然後攬住家姐膊頭講：「Michelle ，我地兩個都唔好執輸啫！」

家姐撥開Michael 隻手，好平淡咁講：「再唔行，要遲到啦」。見到家姐一行，Michael立即跟住佢尾。而婉婷見大家都開始行，而我仲繼續發呆，所以拉一拉我隻手：「阿明，唔好發佝瞀啦」。

家姐行最前，Michael行中間，而我同婉婷就行最尾。對於婉婷突然既出現，其實我係有少少唔鍾意，所以我都開口問：「婉婷，做咩無啦啦突然黎我樓下接我既？」

婉婷用委屈既語氣講：「我都只係想感受下同你一齊返學既感覺，而且又未正式見過你家姐，所以...所以咪黎接你，你係咪唔鍾意呀...？」望住婉婷副楚楚可憐既樣，我都嬲唔落：「無...好奇問下啫」



直到返到學校大門口前，家姐望都無望過我一眼。我固然知道，婉婷既突然出現，就彷彿直接一把刀插落家姐到個心到，所以家姐內心應該好唔開心。

到學校大門時，家姐回頭對我輕輕講咗句：「我返課室先啦」，然後頭也不回就走咗，而Michael 自然係跟住家姐走。婉姐見家姐走後，就開口問：「阿明，你家姐一向咁cool架？」

雖然家姐對外人不嬲都係好冷淡咁既樣，但我清楚知道今日既家姐，係因為唔開心先擺出咁冷淡既姿態。我輕輕應咗聲「嗯」後就上樓返屋企，而婉婷亦無再追問。

三點半，下課鐘聲響起。我執齊嘢準備走人時，婉婷行到我側邊：「阿明，我陪你一齊返屋企？」

見到家姐今朝既表現，我當然唔會再比婉婷跟住啦，所以我講：「其實我家姐唔鍾意有外人係到架，我諗...我諗都係唔好啦」。



我一講完，婉婷已經嘟起個嘴，我知咁講多多少少實會傷婉婷心，所以我補多幾句：「而家我家姐逢星期二同星期三放學後，都要留係學校操past paper，呢兩日我陪你返屋企好無？」

婉婷笑返：「一於咁話！咁我地聽日見啦～」。講完後轉身就走。

我落到樓下已經見到家姐企咗係門口等緊，而吊靴鬼Michael都係到。我行到過去，Michael就即出聲：「女朋友仔無跟過黎既？」都唔知呢個Michael係咪有心玩嘢既，我hea應一聲「嗯」後就同家姐講：「我地行啦」。

自從家姐知道我拍拖後，已經唔會再好似以前咁樣撟住我隻手。講真，我內心係有少少失落，但同時都明白當中原因。

本季更新時間為星期一至五，每日一篇。星期六同日將不定時更新。如果星期一至五出現停更，會於星期六或星期日進行補更。