越界的姐弟戀第二季

返屋企既路上,家姐一句嘢都無講過,成程得Michael係到自言自語,不斷講啲爛gag。而返到屋企後,家姐淨係講咗句:「今晚叫外賣」後,就直接入咗房。

其實我都係第一次見到家姐怒氣沖沖咁既樣,再加上氹女仔經驗又唔多,一時之間都唔知點樣做。而之後落黎果幾日,家姐都係咁既狀態對住我,對我非常之冷淡。

更過份既係,係之後果幾日早上返學時,家姐更故意同Michael有講有笑。一睇見Michael同家姐傾到嘻嘻哈哈時,我內心就彷佛被支刺吉住咁。而對於呢種情況,我愈來愈頂唔順,心痛,但又唔知應該點做好。

星期五食過晚飯後,家姐又係直接入房。以往家姐食完飯都會一齊睇陣電視,但自從婉婷果日突然出現後,家姐就無再坐低睇電視。客廳只剩下電視機既聲音,變得冷冷清清,無聊既abctvb劇情變得更加無聊。



人愁時,就好想搵啲嘢黎解愁,所以我選擇咗借酒消愁。我約咗果三條蛋散老死到我樓下個公園到,諗住吹下水。我先去咗7仔買咗兩打啤酒,然後坐咗係公園。

我未等佢地到,就已經打開啤酒自隊。佢地到果時,我已經飲咗兩三罐。因為我同三個老友平時好少會飲酒,而且佢地都唔知我竟然會買咁多,所以見我自己係到飲酒就知道有唔妥。

可能我地四個太熟既關係,好多嘢都係心照,所以佢地三個都坐低,各拎咗罐啤酒打開飲。果然「抽刀斷水水更流,舉杯消愁愁更愁」,我愈飲愈失控,瘋狂地隊酒,三條友睇見我咁既情況驚我出事,所以開始阻止我。

豬肉佬搶走我手中罐碑酒:「唔好再飲啦阿明!」

口水佬:「阿明,係咪婉婷飛咗你呀?唔怕同我地講wow!失戀姐,無咩大不了,仲有我地三個陪你架」



豪仔好緊張咁講:「係囉,唔好再飲啦,有咩事同我地講下啦」

鍾意家姐呢樣事,我點講出口呀...點講出口呀!我無理到佢地,拎咗罐新碑酒打開繼續飲。而唔知幾時,我已經醉到不省人事。當我再次醒過來時,發現我攤咗係自己張床上,而家姐就正用濕毛巾幫我抹頭。

本季更新時間為星期一至五,每日一篇。星期六同日將不定時更新。如果星期一至五出現停更,會於星期六或星期日進行補更。
已有 0 人追稿