在IG上重遇你: 08

第八章

我琴日係咪講錯嘢，搞到Bobo唔係好開心，我係唔係要同佢講對唔住呢？我望住whatsapp，諗緊應唔應搵佢嘅時候，突然Jason係我耳邊講嘢。

Jason：「搞咩咁頹呀，Steven？成堂唔係發緊夢，就係望住部手機發呆。係咪得罪女友，唔敢搵人？」

我：「哪有女！不過我講左啲嘢搞到人地唔開心，諗緊同唔同佢講對唔住？」

Jason：「咁個人一定對你好重要，唔係你都唔會咁心不在焉」





Bobo對我好重要？可能因為搵返個好熟嘅小學同學，所以我唔想咁快失去佢。諗諗下，Jason講嘅嘢都有道理，我都係搵下Bobo先。

我：「個日真係對唔住，搞到你唔開心」
Bobo：「😅😅其實唔關你事，係我自己嘅問題😯😯」
我：「唔係我問你，你唔會諗返起，所以我都係有錯😔。」
我：「不如我請你食餐飯當陪罪？」
Bobo：「不過近排好忙，就比你欠住先😊😊」
我：「好，你幾時得閒就搵我啦」

同Bobo講完之後，我個心都定一定，起碼知道佢冇嬲左我。不過，我竟然有啲介意個心型吊墜對Bobo有咩意義，會令佢咁唔開心。但依家唔係時候問佢，都係等有機會先問。





因為就快考試，所以我同阿輝佢地組成左個溫習小組，一齊溫書，希望summer唔洗retake，可以盡情去玩。不過，唔知係咪阿輝條友想我分心，佢竟然叫左Queenie過黎。

我：「屌，你係咪想我retake呀？做咩叫埋Queenie黎？」

輝：「唔係我叫，係佢話想跟埋黎，可以問下問題。嗱，我又比機會你，你今次要好好把握！」

Queenie行埋我隔離，問：「介唔介意我坐你隔離？」

我：「你唔嫌棄就得啦！」





Queenie：「我點會嫌棄呢？你係高材生，我有好多問題要請教你架」 又係佢個招牌笑容，真係甜死人。

雖然同女神坐係好緊張，不過因為佢不停問題，所以我慢慢放鬆左，可以同佢對答如流。我地成班人溫到十點幾，我見大家都開始恰眼瞓，所以叫大家走，而阿輝佢地超無義氣就走鬼左去，留低我同Queenie兩個人。

Queenie：「今日真係麻煩你，幫我釐清返晒啲concept，依家已經明白晒」

我：「唔洗客氣，反正我都係當複習一次」

我送左Queenie返左宿舍之後，我先行去地鐵站搭地鐵。我見到阿輝係閘口等緊我，佢一黎就問我同Queenie啲嘢。

輝：「點樣，溝唔溝到女神呀？我比左咁多機會你」

我：「咪玩啦，溝女神咪姐係去做兵！我冇興趣做兵」





輝：「但你唔覺佢對你有興趣咩？特登坐你隔離，又唔見佢坐Ryan同Jason個邊？」

我：「佢要問我嘢，緊係坐我隔離」

輝：「頂，都唔知話你白痴定情商低，你都係自己返去諗清楚啲」

雖然阿輝講嘅嘢好似幾有道理，不過我依家唔想去開始第二段感情。我有啲驚左拍拖，唔知係咪因為Hazel個拜金女搞到我咁。