在IG上重遇你: 07

第七章

琴晚比老豆開解完，我成個人都冇晒事，加上通宵左好多日，結果我訓到一點幾先醒。我見到高佬輝係手機同whatsapp不停咁轟炸我，我知道自己真係兇多吉少，但都要覆下佢電話。

我：「Sorry，基友。琴晚太好訓，搞到今朝唔知醒。」

輝：「屌你老味，比人踩完仲可以咁好訓，你抖M嚟㗎？」

我：「小小苦楚等於激勵，我似咁易比人打沉咩？」





輝：「收皮啦，上次比女飛你唔係飲到斷晒片，仲話冇左佢不如去死。」

我：「過左去就唔好提。我依家趕過黎，得未？」

輝：「唔洗啦，知你今日約左女女，放你一馬，玩得開心啲」

既然佢放過我，咁我就訓多陣先。不過咁啱阿媽返黎，我冇得再訓，唯有起身做下嘢。

媽：「你唔係話返去打波咩，做咩仲係屋企？」





我：「我訓過龍，咪唔去」

結果我阿媽就叫我幫佢抹乾淨啲窗，同埋洗埋啲風扇。我有少少後悔冇去打波，不過都無所謂，當減輕阿媽啲工作量。去到六點左右，我就換好衫準備去搵Bobo。今次我又早左到尖沙嘴，大約六點半就去到海港城。我見時間尚早，於是走左去誠品書店行下。跟住我收到Bobo嘅whatsapp。

Bobo：「我差唔多到尖沙嘴，你去到邊？」
我：「我到左，依家係誠品行緊」
Bobo：「咁我一陣去誠品搵你😊」
我：「👌」

行左大約十分鐘，我見到有個傻妹係門口位望黎望去，我靜雞雞行過去，正想嚇下佢嘅時候，我手機突然間響，佢即刻擰轉頭望，我嘅行動失敗左。





Bobo：「你唔會諗住嚇我？」

我：「點…點會呢！我諗…住叫你」

Bobo：「好有可疑」

我：「唔好諗咁多，你今日要請我食咩？」

Bobo：「食日本菜，有冇問題？」

我：「冇問題」

同Bobo食完日本菜之後，本來諗住走，不過Bobo話想行陣街，我又唔好意思自己走左去，唯有「捨命陪君子」。我地行到一間精品店嘅時候，Bobo望住櫃上嘅一個心形吊墜，不過好快佢就行開左。





我：「你鐘意個吊墜咩？」

Bobo：「唔係，只係諗返起啲嘢姐……」

我見到Bobo好似唔想提，所以我冇再問落去。但我地之後成段路都冇再傾計，我送左佢去搭地鐵，而我就選擇行返旺角。