在IG上重遇你: 10

第十章

雖然帶走左Bobo，但我唔知應該送佢返屋企先，定係搵個地方比佢休息下。正當我苦惱緊嘅時候，阿輝突然點左盞明燈比我。

輝：「你個fd應該返唔屋企，又冇可能去你屋企，不如上我個到先，等佢抖下、醉醒先算？」

我：「阿輝，你屋企方便咩？唔怕煩到你屋企人」

輝：「其實我搬左出黎住好耐，只係冇同你地講，費事比你地上黎搗亂」





我：「你真係我好『基友』，多謝你呀！」

阿輝揸車的確好穏，Bobo成程都冇嘔，仲訓得好舒服。不過我唔明佢到底為左邊個「仆街」而飲到咁醉，搞到佢咁唔開心，我真係想隊冧條「仆街」。

好快我地去到阿輝屋企個停車場，我直接揹起Bobo，費事拖住佢行。阿輝見到我咁做都呆左呆，不過佢知事態嚴重，就行快幾步去開門。我地上到阿輝屋企之後，我將Bobo放係梳化，跟住叫阿輝用熱水浸毛巾，敷係Bobo個額頭上，等佢散緊啲酒氣。

阿輝淥左個杯麵比我，我先醒起自己未食晚飯，我坐埋去飯枱，阿輝又開始八卦我。

輝：「唔怪得知你唔溝女神，原來係外面收埋左個『蘿莉』。阿威，你真係情場高手！」





我：「佢唔係我女朋友，佢只係我以前嘅小學同學」

輝：「淨係朋友咁簡單？見你咁緊張人，又英雄救美，你話你對人冇嘢，我諗盲嘅都唔信」

我無言以對，我驚我再講落去會「越描越黑」，到時真係「水洗都唔清」。阿輝見我唔應，係到陰陰嘴笑，好似佢咩都知咁。

我幫Bobo換過條熱毛巾嘅時候，佢一手扯住我件衫，仲話：「你唔好走，唔好同我分手」

我唯有捉住佢隻手，話：「我唔會走，你繼續訓啦！」講完佢又靜返落黎，我諗個男人對佢好重要，令佢「潛意識」都諗住箍煲。阿輝話佢訓先，有咩再叫佢，結果連我自己都不自覺地訓著。





大約早上七點幾，Bobo醒左。

Bobo：「呢到邊到黎？我唔係應該係酒吧咩？點解我會係間屋」

輝：「你訓醒啦！等我沖杯熱茶比你解下酒先」

Bobo：「你係邊個？點解我會係你屋企，你對我做左啲咩？」

阿輝：「你望下地下係邊個先？你咪知我係邊個？」

Bobo望下地下，發現原來係我。佢先鬆左一口氣，心諗：「我以為自己比人執屍，原來阿威帶左我走」阿輝攞埋杯熱茶同埋止痛藥，放左係茶几上。

我比佢地嘈醒左，於是問Bobo：「你點呀？琴日你飲到咁醉，個頭係咪好痛？」

Bobo：「食左止痛藥，冇咁痛啦。不過，今次又要麻煩你。」





我：「雖然我知你唔想提，不過我…我係想知點解你會飲到咁醉？」