在IG上重遇你: 12

第十二章（Bobo的視點）

我係羅穎妍，Bobo。我中學時期係讀女校，平時除左接觸爸爸一個異性之外，基本上冇機會接觸異性。直至我入大學，先再有機會同異性接觸。個時班fd話入大學一定要玩O Camp，我就報左學生會嘅大O，亦因為咁我認識左我嘅初戀男友，Derek。

我好記得第一次見佢，係O Camp嘅第一個活動。個時我好怕羞，唔敢同其他人講嘢，係Derek最先同我講嘢，我都因為咁先開始留意佢。Derek份人好樂觀，又好識帶動氣氛，慢慢我對佢產生左好感。不過真正令我同佢一齊嘅係入Camp個晚嘅營火晚會。

Derek：「Bobo，你自己一個咁慘，你班fd呢？」

我：「佢地話要去識其他組嘅男仔，走晒出去啦」





Derek：「咁你呢？你唔跟埋佢地去」

我：「我想自己係到睇下星星，平時係市區都睇唔到咁靚嘅星空」

Derek：「介唔介意我同你一齊睇星星？」

我點頭，佢坐係我隔離嘅時候，我個心竟然跳得好快。

Derek：「個星空真係好靚，如果可以同我鐘意嘅人一齊睇，我諗真係人生一樂事」





我：「咁你唔搵佢黎睇？」我竟然有少少失落，原來佢有鐘意嘅人

Derek：「我唔敢搵佢，不過我依家咪同佢睇緊囉」

我：「依家同你睇緊，我唔見嘅？」等等先，依家同佢睇緊嘅咪係我，佢鐘意我？

Derek：「Bobo，雖然同你唔係識左好耐，但我第一眼望到你就已經鐘意左你。你可唔可以做我女朋友呀？」

我第一次比人表白，根本唔知點做反應，淨係識點頭，我地就一齊左。我班fd就話我唔聲唔聲就出pool，真係古惑。我同Derek拍左差唔多三年，頭個一年我地都好恩愛，經常係班fd面前放閃。





我記得我地拍拖一週年嘅時候，佢同我去左間西餐廳食飯慶祝。食完飯我地就係附近行下街，我地行到一間精品店嘅時候，我比櫃中嘅心型吊墜吸引住。

Derek：「你鐘意呢個吊墜咩？望到眼都定埋」

我：「你唔覺得好靚咩？不過好貴啊，我唔捨得買」

我地行開左冇耐，Derek話肚痛，叫我自己行下先，佢要去洗手間解決下。過左十幾分鐘，佢先出返黎，不過手上攞住左啲嘢。

Derek：「啱先見你咁鐘意個吊墜，所以我走返去買比你」

我：「你做咩嘥錢買比我姐，我又冇話要」

Derek：「咁我攞返去退錢啦！」

我：「你敢咩？你買比我，就係我㗎」





Derek：「我幫你帶起佢啦！」所以個心型吊墜係好有紀念價值

但係到左第二年，我地開始有好多爭吵，有時甚至會鬧分手，不過係其他人眼中，我地依然係模範情侶。

只係去到近排，我終於忍受唔住，因為比我發現佢同第二個女仔搞曖昩。初時我都唔知對方係咩人，直到有次，我同班中同去街嘅時候，無意間見到Derek同我最好嘅朋友Angel拖著手出街。我開頭扮唔知，後來我忍唔住去逼問佢。

我：「你同Angel好熟咩？點解個日見到你地去街？」

Derek：「個…個日只係…只係咁啱撞到姐」

我：「Derek，你唔好再講大話啦，我個日親眼望到你地兩個拖住手行街。點解你要咁對我，我對你唔好咩？」

Derek：「對唔住呀，Bobo！我一時把持唔住，先同Angel做啲咁嘅嘢，你原諒我啦！我唔會再同佢聯絡啦！」





我見Derek好似誠心改過，就諗住原諒佢一次。點知原來人做錯一次，就冇可能改到。好快我又發現佢又同Angel一齊去玩，今次我冇再比機會佢，我直接同佢講分手，我連佢解釋都唔聽，我將佢所有嘢都Block晒，等佢搵唔到我，因為我唔想自己又心軟，又比機會佢。