在IG上重遇你: 14

第十四章

考完試差唔多一個星期，我就做返自己老本行，就係幫人補習。因為已經六月，好多學生要考試，我接左五個學生去補習，有三個係小學生，另外兩個係中學生。因為我比較拼搏，所以每日都係由十二點開始，補到夜晚八至九點，中間食晏時間好短，我甚至選擇唔食。有時候太夜，我都會送埋個學生返屋企先，所以班家長對我嘅印象幾好，甚至會推薦我比其他家長，令我嘅客源一直存在。

今日黎補習嘅得中學生芷晴同佢妹妹芷欣，因為班小學生考完試，佢地家長話比佢地放下假，搞到我冇左賺錢機會。而我約左佢地兩姐妹三點係Starbuck等，我好早係個到霸位，費事晏啲冇位。好快就到三點，我見到佢地都行緊樓梯上黎。

芷晴：「堂哥，你又係到做『毒男』，睇動漫」

芷欣：「堂哥，你再唔搵女朋友，會一世孤獨㗎」





我：「就算我孤獨一世，我都會搵你兩個陪」

晴&欣：「變態堂哥」

佢兩個由細到大都鐘意同我鬥嘴，我都已經冇感覺，所以我直接選擇無視佢兩個人。我地溫左差唔多三個幾鐘，我將所有佢地唔明、唔清楚同唔熟嘅地方，一次過解釋得一清二楚。我見佢地複習緊啱啱嘅課題，溫得咁入神，於是諗住落去買幾杯咖啡去奬勵下佢地。

排緊隊嘅時候，有人拍我膊頭，我望一望後面，原來係Bobo同一個著校服嘅女仔。

Bobo：「咁啱嘅，阿威。你自己一個？」





我：「唔係，我同堂妹佢地補緊習。你呢？」

Bobo：「冇呀，我見阿妹溫書溫得咁辛苦，咪捉佢出黎抖抖氣，等我介紹下，佢叫羅穎詩， Jessica」

我望下個女仔，佢同Bobo真係差唔多一模一樣，不過佢高過佢家姐，所以望落佢好似大個啲。難得遇到Bobo同佢個妹，我就請埋佢地飲咖啡，因為冇晒位，我就提議佢地去我地張枱坐。上到去，我堂妹芷晴個樣好驚訝，原來Bobo個妹穎詩係佢同學。

芷晴：「Jessica，點解你會係到嘅？」

穎詩：「 我同我家姐出黎抖抖氣，你溫緊書呀？」





芷晴：「啱啱堂哥幫我地兩姐妹補完習，依家休息緊」

跟住佢地三個就雞啄唔斷，係咁傾計，而我就同Bobo吹下水。

Bobo：「阿威，你星期三得唔得閒？」

我：「個日唔洗返工，應該就得閒」

Bobo：「我想你陪我去藝術館睇畫展，我班fd去晒旅行，我又唔想自己一個人去，你有冇興趣？」

我係到諗緊去唔去嘅時候，我兩個堂妹又加把口。

晴：「堂哥，你係唔係想唔去，人地女仔出到聲，你拒絕人會好hurt人㗎！」

欣：「咪係，難得有靚女約你去街，你就快啲應承啦。唔係，你就變做『毒男』啦！」





我：「你兩個衰妹，如果我冇人要，你地都唔洗指意可以出pool」

晴&欣：「你好惡毒呀！」

Bobo：「你地幾個感情真係好，我好羨慕呀 」

穎詩：「阿威哥哥，你快啲應承我家姐啦！唔係今晚佢返去又係我耳邊騷擾我，搞到我冇得訓」

Bobo：「羅穎詩，你講我壞話，今晚返去你就知死！」

穎詩：「快啲救我呀，我唔想今晚死呀！」

結果我係兩邊疲勞轟炸下，選擇投降，應承左Bobo同佢去個畫展。