在IG上重遇你: 15

第十五章

我地坐到大約八點就走人，一路行去地鐵，我就發現啲人經常回頭望佢地四個。冇計，我兩個堂妹都算係女神級別（佢地自稱學校中嘅女神），加埋Bobo同佢個妹樣子甜美，回頭率百分之一百。不過，我feel到班人用仇恨嘅目光望住我，搞到我都有啲唔好意思。

到左地鐵站，Bobo兩姐妹就去搭地鐵，Bobo臨入閘前又提多我一次。

Bobo：「阿威，記住星期三要陪我去畫展，唔好甩底！ 」

我：「知啦，唔洗係咁提」





穎詩：「咩係，你洗唔洗咁長氣呀？成個阿婆咁」

Bobo：「今晚你會死得好慘」

我：「拜拜啦！」

跟住我送埋堂妹佢地返屋企，我先完成今日嘅工作。返到屋企，已經九點鐘，阿媽留左碗湯同小小餸菜比我，不過佢地唔係屋企，可能去左公園散步。我食完之後就洗乾淨啲碗，沖完涼就返房準備打下LOL。上線之後，我見到阿輝、Jason同埋幾個同學都在線上，本來諗住同佢地玩，不過我竟然見到個ID：「寂寞的人」上線，我就即刻邀請對方雙排。

我：「好耐冇見你上線，Yan」
Yan：「係你好耐冇上線姐，傻仔」




我：「屌你，唔好再叫我做傻仔」

阿Yan係我係網上識嘅一個女仔，雖然冇同佢見過面，但唔知點解同佢傾計係好舒服，佢亦都知道我好多袐密，我亦都知佢好多嘢。一開始，我唔知佢係女仔，因為一直用文字交流，直到有次我提起不如用語音傾，先知道佢係女仔。

我同佢玩左幾場之後，佢話聽日要返早，所以下線先。我問佢幾時再上線，佢話下個星期得閒啲，叫我下星期差唔多時候上線，應該會撞到佢。

之后連續幾日，我變左全職廢青，雖然阿輝有叫我出街，不過我見天氣咁熱，就唔出去玩。本來諗住宅係屋企，宅到星期三，點知我屋企人約左大伯一家食飯，我冇得唔去。一去到，兩個堂妹即刻捉著我問嘢。

芷穎：「堂哥，你聽日同Bobo姐出街，緊唔緊張？」





芷欣：「算啦，家姐。堂哥佢係愛情白癡，唔會有感覺㗎！」

我：「你兩個係咪想死，話我係愛情白癡」

跟住大伯、大伯娘同我老豆、阿媽一齊出現，大伯見到我，就開始問長問短，結果一問到我有冇拍拖，我就知出事啦，我兩個可愛嘅堂妹又開始幫我加鹽加醋

芷穎：「阿爸，你都唔知堂哥佢有女仔約出街，佢仲想拒絕人添」

芷欣：「個姐姐好靚女，但堂哥竟然無動於衷，都唔知堂哥係咪鐘意男人」

大伯：「阿威，你………」

我：「大伯，你唔好聽佢地亂講，我性取向完全正常，但個女仔只係我朋友」

大伯：「真係朋友咁簡單？」





好彩呢個時候我老豆叫大伯唔好問咁多，跟住佢地轉移目標向佢地兩姐妹，我先避過一劫，唔係我諗成餐飯我應該會噎死，或者驚嚇死。