在IG上重遇你: 22

第二十二章

阿輝話為左方便大家，佢就租左架七人車，做我地一日嘅「柴可夫司機」。佢叫我地全部人係旺角集合，方便入清水灣沙灘。我地約左十點左右出發，費事太晏會冇晒燒烤爐嘅位。我兩個堂妹一早黎左我屋企等，佢地兩個興奮到不停搞我兩隻貓。

我：「好啦！我地個司機就快到，我地落去下面等」

芷穎：「Jessica話佢地到左朗豪坊，我地不如去搵佢地啦」

我：「咁我叫佢係埋個fd係朗豪坊等」





我地攞齊嘢就出發，行到朗豪坊個時，我已經望到Bobo同佢個妹Jassica，仲有Queenie已經到左。今日Bobo同Jessica都著白色連身短裙，兩姐妹行埋一齊似到十足十，而Queenie就著鬆身Tee配熱褲，成個線條非常突出。望住佢地幾個，真係眼都凸，都知望左定望右。

我：「大家都好準時，我地架車差唔多到，等多幾分鐘就得」

等緊嘅時候，Bobo靜靜雞行埋黎同我講嘢。

Bobo：「阿威，你係咪專登約埋你女神黎，都話你想溝人啦！」

我：「唔係我叫，係阿輝個衰仔爆響口，我唯有叫埋佢黎」





Bobo：「咪扮啦！借個fd黎過橋，你咪又係公器私用」

我：「你再亂講嘢，我就唔比你上車，等你望住我地去」

Bobo：「我唔識自己搭車咩！」

芷欣：「你兩個係後面講秘密都唔預我地」

我：「話明秘密就唔可以有太多人知啦，死蠢！」





芷穎：「堂哥，你唔洗介紹下你個朋友比我地識咩？」

我：「唔記得左添！佢叫Queenie，係我大學同學，我地系嘅民選女神，比你兩個嘅所謂女神有認受性得多」

Queenie：「你地唔好聽你堂哥亂講，你地兩個先係女神」

芷穎：「堂哥，聽到未？我地先係女神」

我：「人地俾面你先咁講姐。唔好講住，車到左啦！」

阿輝租左架銀白色嘅Toyota七人車，我地上晒車，就出發去清水灣沙灘。我坐車頭，Bobo同Queenie坐中間，而三個妹妹就坐車尾。女人果然好快熟絡，佢地五個好就傾到唔停，而我同阿輝就吹水。

輝：「冇諗過Bobo有個妹妹，同佢一模一樣」

我：「佢阿妹同我堂妹係同學添，你又有興趣？」





輝：「收皮啦，我對小妹妹冇興趣」

我：「今日辛苦你啦，要做一日司機，仲要冇得飲酒」

輝：「今晚等你慰勞我啦，基友！」

大約半個鐘，我地就去到目的地清水灣一灘嘅位置。佢地幾個一支箭就衝左出去，得返我同阿輝兩個係到搬嘢。好在今日唔算多人，啲燒烤爐仲有好多空位。我地兩個好似螞蟻搬家咁，不停來回攞嘢，搞到我地未玩已經濕晒。

佢地五個女仔完全唔理會我地兩個，已經衝左去沙灘玩，不過望住佢地玩得咁開心，我都好耐冇試過咁樣，今日就放過佢地啦！