在IG上重遇你: 25
第二十五章
我：「你地唔洗理我，我自己亂講嘢姐。你地返上去啦」
我自己行返去嘅時候，本來諗住今日同阿輝講清楚自己都鐘意Bobo，點知未講清楚，Queenie又同我講埋呢啲嘢，搞到我唔知點應付。結果，我成晚都冇訓過，不停諗自己究竟對Queenie嘅感覺係咩，對Bobo又係咩感覺？
第二朝八點幾，我就已經起左身，不過成間屋又係冇人，得個兩隻貓訓係窗台邊。整左份早餐食完，就同兩隻貓玩左陣。今日冇人約我，所以我諗住係屋企打下機，晏少少再搵下人出下街。本來諗住自己玩，點知俾我見到阿Yan在線上，我就邀佢玩幾場LOL。
Yan：「咁都俾你撞到我上線，真係黑仔！」
我：「呢啲可能就係緣份」
Yan：「點解緣份唔俾個靚仔我，要俾我一個傻仔？」
我：「Yan，我有啲嘢想問你？」
Yan：「睇黎你又有嘢煩緊？又係感情問題？」
我：「你講得冇錯，又係感情問題！」
Yan：「咁我地傾電話啦」
退出遊戲之後，我搵返佢個號碼，我先醒起我對上一次同佢傾電話係一年幾之前，個次就係佢嘅感情問題。
我：「喂，係咪阿Yan呀？」
Yan：「你真係白痴，你打我電話，仲問我係咪阿Yan？」
我：「咁耐冇打俾你，有啲唔慣姐！」
Yan：「咁你有咩問題呀，等姐姐解答下你」
我：「我前排係小學聚會遇返個女仔，佢同以前一樣冇變過，跟住因為發生左幾件事，搞到我開始對佢有好感，最慘係佢話小學個時鐘意過我，我就真係愛上佢。點知，我有個大學嘅女神，本身我同佢好少交流，因為阿輝約左成班人睇戲，我開始左同佢嘅接觸。我對佢本身冇任何想法，點知有日佢問我『鐘意Bobo多啲定佢多啲』，搞到我都唔知點應佢好？究竟我應該點做！」
Yan：「睇黎你都幾麻煩下，不過問心，你最鐘意邊個先？如果你連自己個諗法都唔清楚，你就冇解決問題嘅一日」
我：「其實………我兩個都有好感，但係如果有高低之分，我諗我會揀Bobo多過Queenie。 唔知點解我再一次見返Bobo，我竟然有啲開心，跟住同佢經歷左幾件事之後，我仲好想保護佢，唔想再見到佢喊。相反，我對Queenie嘅好感在於佢係女神，我要對佢好啲，唔好失禮人。雖然後來同佢越黎越熟，但我同佢好似始終有段距離，我唔敢做過界嘅事！」
Yan：「有女神Queenie你唔揀，你反而揀個小學同學Bobo，點解嘅？」
我：「其實呢，如果要講點解我揀Bobo，可能要講返小學個陣嘅事。」
—————————————————————————————————————
時間點：小學三年級
個日係Bobo轉校嘅第一日，老師係全班同學面前介紹緊佢。
X老師：「各位同學，今個學期開始，我地會有新同學加入我地班，大家要好好對待新同學呀！新同學，介紹下自己先」
Bobo：「大…大家…好，我叫羅穎妍，英文名係Bobo，因為搬屋所以要轉校，希望可以同大家做好朋友」
X同學：「穎妍，你就坐馬國威同學隔離個位」
呢個係我第一次見面嘅情景，我仲好記得佢好怕羞。我同佢講嘢嘅時候，佢好細聲咁應我，塊面仲要紅過紅蘋果，真係好可愛，搞到我忍唔住好細力搣下佢塊面。不過，我發現原來佢俾班同學仔蝦，仲孤立佢一個，唔同佢玩。
有一次，我俾老師罰留堂，留到五點幾先走得。我行經女洗手間嘅時候，我聽到有人係裡面喊緊，我見呢層冇晒學生，加上以前成日傳學校四樓女廁好猛鬼，咪八卦行入去，睇下係咪真係有鬼。
始終有啲驚，我慢慢由門口行入去，聽到最裡面個廁格有人喊緊，我咪細細聲問：「有冇人係裡面呀？有嘅可以應下我」
我見冇人應我，唯有慢慢向最後一格前進，結果我發現係Bobo匿埋係到喊。佢喊到對眼腫晒，手上本書又俾人畫到花晒，我竟然有啲嬲嬲地。
我：「你有冇事呀？洗唔洗陪你搵老師？」
Bobo：「我……我冇事，你唔洗理我。費事連累你俾人蝦」
我：「點會連累呢！不如我同你去搵班主任講啦，好唔好？」
Bobo：「真係唔…唔洗啦」
我：「咁你唔好喊啦，再喊就唔靚女，出黎洗個面先」
Bobo：「多謝你呀，你係第一個肯幫我嘅人。不過，我想問點解你會入左女廁呢？」
我：「我聽到喊聲，以為有猛鬼係到，咪入黎睇下。你新黎唔知，聽聞以前有個女老師係到吊頸自殺，搞到四樓女廁好猛鬼」
Bobo：「你…你…講真…定…講假？唔好嚇我呀！」
我：「佢…佢…依家係你……後面呀！」
Bobo俾我嚇到即刻衝上前，攬到我實一實，仲問我佢走左未。我第一次同女仔有咁親密嘅接觸，搞到我心跳得好快。
我：「佢未走呀，仲好大隻咁攬住人。咪係你囉，無膽鬼！」
Bobo：「衰人，你呃我。我唔同你講嘢啦！ 」
雖然同佢關係好左，不過被欺凌嘅情怳依然持續，有時我又係女廁門口聽到佢喊，我個時發誓唔要再俾佢流多一次涙。直到今次，我終於忍唔住，衝左出去同個班人打起上黎，因為佢地今次過份到將Bobo啲書收埋晒，仲同埋班高年級生一齊玩佢。我同佢地打到連隻牙都甩埋，最後老師介入，我同打架個班都俾人記左個大過同停課一星期。好在嗰次之後，Bobo冇再比人欺負，但我同佢就開始俾人傳係兩公婆，真係好尷尬。
—————————————————————————————————————
Yan：「原來你同Bobo中間有段咁嘅故事，唔怪得知你會咁保護佢啦！」
我：「但如果我同Queenie咁講，我會唔會冇左一個好朋友呢？」
Yan：「我諗唔會咁易，話晒人地係女神」
我：「你又啱。話時話，你又點呀？同你男朋友點呀？」
Yan：「做咩冇啦啦問我嘅嘢？你顧好你自己先啦！唔講啦，我要出街啦，拜拜！」
我：「咁好啦，下次再同你傾過，拜拜」