在IG上重遇你: 26

第二十六章

我望下個鐘，原來我同呀Yan傾左三個幾鐘，我好耐都冇同人傾電話傾咁耐。不過每次同佢傾完，個人就冇晒煩惱，仲舒服左好多。我見已經咁晏，就諗住自己煮下嘢食，不過今朝煮早餐已經用埋啲材料，唯有落街買嘢食。

我去左最近嘅茶餐廳食嘢，叫左個炒飯同凍奶茶。食食下，阿輝突然打俾我。

輝：「阿威，我咪同你講過我同Jason佢地組左對球隊，報名參加出面啲比賽」

我：「我記得，不過個時我唔肯定去唔去到，所以冇join到，做咩又問我？」





輝：「其實係有個隊員唔小心扭傷左隻手，短期內都打唔到，加上後日就開打，我又搵唔到人頂。基友，今次你一定要幫我！」

我：「呢排我得閒嘅，不過我雷你地就唔好怪我！」

輝：「有你同我合作。如果都攞唔到第一，我就切咩都得。我地聽日租左場練下波，你就過埋黎同我地練下默契啦！」

食完晏，諗住返屋企嘅時侯，我撞到我老豆同阿媽行緊去街市買餸，結果我俾佢兩個捉埋去買餸。

媽：「呀仔，你個妹有冇同你講佢下個星期二會返香港？」





我：「你講真㗎，佢要返黎！」

爸：「你好似唔想你個妹返黎，咁我同佢講話呀哥唔想佢返黎」

我：「你咪玩我啦，老豆。俾佢知道我咁講，佢仲唔殺左我！」

我呀妹叫馬凱琪，佢係屋企嘅小公主，成家人都好寵佢，而且佢讀書俾我好，又擅長田徑，搞到啲人成日搵佢同我比。我以前成日俾佢蝦，好彩到佢升中嘅時候，我屋企人就送左佢去英國讀書，我先脫離佢嘅魔掌，唔洗再俾佢蝦。今次佢返黎香港過暑假，呢幾個月我都冇好日子過！

食完晚飯，我幫呀媽洗埋啲碗，就諗住返房睇下電影。誰不知我呀妹竟然係呢個時候打俾我，我本來想cut佢線，但一諗到個後果係好嚴重，我唯有聽佢電話。





我：「馬小姐，咁得閒打俾我，唔洗上堂咩？」

琪：「我開始放假啦！係呢，阿媽有冇同你講我下星期二會返香港？」

我：「我知，你返黎咁大件事，你呀爸呀媽仲唔大肆宣佈！想威俾班親戚睇姐」

琪：「咁你會唔會黎接我機？」

我：「就算我唔想去，你都唔會俾啦；就算你俾我唔去，你呀爸呀媽都趕我過去」

琪：「好彩你都仲記得，如果你唔黎，你個暑假都唔洗有好日子過！」

我：「哈哈！唔同你傾住，我去沖個涼先。你洗唔洗同佢地傾下計呀？」

琪：「唔啦，琴日先同佢地傾完，係咁先」