在IG上重遇你: 28

第二十八章

今日三點先比賽，我地提早兩個鐘頭，傾下一陣間嘅出場陣容，順便再練下啲手感同默契。我地入到場館，見到對面隊已經到齊，仲要有成班女女黎打氣。我隔離嘅大杰即刻話：「屌，人地連女都帶埋黎，我地連打氣團都冇，心淡啦！」

我：「屌，咁容易受世俗影響！我地今日唔炒佢地三十分以上，我去食晒佢啲女女」

Ming：「咁好為難你姐，所以我決定同你一齊去食晒佢啲女女」

輝：「你地可唔可以認真啲？就算炒唔到三十分，我地都要食晒佢啲女女」





大家：「隊長英明，一於食晒啲女女！」

不過對面隊班人真係幾弱，熱身嗰時見到有幾個連運球都做唔好，佢地仲要著咁多裝備，真係笑L死我地。裁判示意比賽要開始，我地按啱啱嘅策略，阿輝同Jason唔洗出場，由我(PG)、細杰(SG)、呀Dee(SF)、大杰(PF)加埋呀Ming(C)，作為先發嘅五人組。我地五個人平均身高1.87，而對面最高嘅目測只有1.84，我地高度都玩死佢。

結果成場比賽，我地單方面虐殺對方，呀Ming同我攞到「雙雙」嘅成績，比分為70-35，成功炒佢地三十五分。不過係我地比賽緊嘅時候，Jason同幾個替補竟然成功抄到班女女牌，有個仲約到下次比賽過黎睇，搞到場上嘅我地揼心口。

Jason：「你地場上咁努力，我地場下一樣咁努力」

Ming：「我地就出汗水，你地就出口水，你地開心啦」





替補A：「咁都要你地嘅英姿幫我地吸引到班女女先得，我地先可以食到女！」

我：「呀Ming，你認住佢地班仆街，搞到幾多兄弟冇得溝女，冇得出pool」

輝：「你條友唔好係到煽風點火，明明你自己身邊咁多女，你又唔介紹佢地俾人識！」

Dee：「阿威，係咪真㗎，阿輝講嘅係咪真？你有好多女！」

我：「全部都係輝哥啲fd，同我完全冇關係」





輝：「我地唔好咁容易因為女嘅問題而傷大家感情。今日我地贏對方三十五分，我決定請大家食餐好！」

大杰：「今晚我唔得，約左女朋友食飯。下次先再食過」

Ming：「大杰，你幾時有女朋友？點解你會出到pool，點解呀！」

我：「大杰，你走先啦！你再唔走，我驚你俾呀Ming佢地碎屍萬段」

我同阿輝護送大杰走，呀Ming同呀Dee就頽左，仲不停話大家一齊做單身狗，歧視所有有女朋友嘅男人。我地幾個笑住咁行去餐廳食飯，途中Bobo又send啲美食相俾我。

Bobo：「你份手信——石狩鍋，好好食呀！！😍😍」
我：「你真係好賤格，好彩我都唔輸蝕😁😁」我影左張海鮮焗飯俾佢睇
Bobo：「你搞到我好想食呀😳😳」
我：「俾你止下渴，等你返黎我帶你去食最好味嘅海鮮焗飯🤤🤤」
Bobo：「一言為定♥♥」





唔知係咪我警覺性太低，呀Ming望住我whatsapp，我都唔係好覺

Ming：「唔怪得知阿威會放走大杰，原來佢自己都有女，真係冇天理！」

我：「我個fd姐，係咪咁都唔得先」

Ming：「如果係fd會用『心心』符號，你當我係白痴呀！」

Dee：「燒死佢！燒死佢！」

我：「我諗送你地去青山好啲」

輝：「又係到講咩，我應該冇miss到任何嘢」





Ming：「有人send『心心』符號俾你個好兄弟，佢仲話係普通朋友，邊有普通朋友會send『心心』？」

輝：「阿威，係咪Queenie呀？」

Dee：「我諗唔係，個名係B字頭，肯定唔係咩Queenie！」

我心諗今次真係仆街了，我俾兩條仆街害死啦！！