在IG上重遇你: 29

第二十九章

雖然成餐飯大家有講有笑，但我見到阿輝好似神不守捨，搞到我都唔知點面對佢。我想借今次機會同阿輝攤牌，但又驚搞到大家以後冇兄弟做。食完飯，呀Ming同呀Dee話要去老蘭飲酒，強行捉左細杰一齊去，而我因為太攰就冇同佢地去。阿輝話車埋我出旺角，我費事俾阿輝覺得我避緊佢，就跟左佢上車。

開頭我地兩個都冇講嘢，我內心不停掙扎，究竟同唔同阿輝講清楚我對Bobo嘅感情。點知我未出聲，阿輝就快我一步講嘢。

輝：「阿威，今日佢地話同你send whatsapp嘅女仔，係咪Bobo」

我：「係。你想問咩？」





輝：「我記得我問過你，你有冇鐘意左Bobo？嗰時你答我冇，但係依家呢？」

我：「其實嗰次你問我，我自己都唔肯定答案，不過後來有兩個fd解答左我呢嗰問題，我先諗清楚左」

輝：「我明白，所以……我唔會同你爭」

我：「其實你唔洗咁，你都可以去追佢，我地公平競爭！」

輝：「阿威，我唔同你爭，唔係讓你，係我發現我將Bobo投射左落我前度。我只係想……贖罪姐」





我：「你有冇事？做咩又提起佢！」

輝：「冇事！到啦，你返去啦」

雖然我唔識阿輝嘅前度，不過我聽佢啲fd講過，阿輝個前度係一次交通意外中死左，自此阿輝就冇再拍拖，淨係周圍flirt女。今日係解決左同阿輝嘅問題，但我好似搞到阿輝諗返起啲傷心事，我真係正衰仔。睇呢我要好好咁開解下阿輝，費事佢又困死係個過去。

本來諗住呢幾日搵阿輝飲下嘢，點知我老豆阿媽話我阿妹就快返香港，要買返啲新用品俾阿妹用，我唯有做下乖乖仔，連續做幾日工人。而我同Bobo就keep住日日whatsapp傾計，佢不停send啲旅行相俾我，搞到我真係好想去旅行，跟住我問佢幾時返香港，佢話下個星期二。我個時都冇留意原來佢同我阿妹係同一日返香港，直到去機場前我先醒起。

*近排實左太忙，冇時間更新，不過今個星期會變返一日一更，希望大家繼續支持😊😊