在IG上重遇你: 32

第三十二章

(咁遲先更新，真係唔好意思😞😞）

琴晚不停發夢，不停諗起Queenie問嘅問題，佢重重覆覆咁問我到底揀佢定Bobo，又話再唔俾答案佢，佢就死俾我睇，真係想嚇死我！

阿媽見我起左身，就叫我陪佢去街市買餸，今晚要煮餐好嘅俾阿妹食。我見反正冇嘢做，咪陪阿媽去，順便去食個吉野家早餐。果然為左阿妹，阿媽買左好多餸菜，樣樣都係阿妹最鐘意食。我都有少少妒忌屋企人咁鍚阿妹，鬼叫佢係屋企嘅小公主，每個人都好鐘意佢。

跟住成個朝早，我就不停咁煲劇，煲到十點左右，我收到Jenny姐嘅whatsapp





Jenny：「衰仔，今晚過黎打牌，唔好再話唔得閒」
我：「今晚？幾點先？」
Jenny：「十點幾開始」
我：「應該得」
Jenny：「同你講定先，我叫左幾個單身少女一齊黎😈😈😈」
我：「咁益我😂」

今日預早少少出門口，費事好似上次咁要Queenie等我。不過今日都唔知用咩心情黎面對佢，如果未發生嗰日嘅事，我咪可以繼續當佢係我女神，依家都唔知當佢係咩好？

雖然預早出門，不過我都係啱啱好到，結果又好似上次咁，佢已經到左。今日佢嘅衣著成個鄰家女孩feel，上半身係米白色嘅Tee，再加條裙褲，睇到我失哂神。





Queenie遠遠望到我，就慢慢行過黎。佢攞隻手指篤住我塊面，跟住話：「你又遲到啦！仲要係咁望住我，咸濕仔！」

我面都紅晒，唔敢回應佢。為左轉移話題，我即刻問佢嘢。

我：「你要去邊間餐廳食嘢？」

Queenie：「咁心急，你未食早餐咩？」

我：「唔係，我唔想陣間太多人，要企係等姐」





Queenie：「講到咁，我依家就帶你過去」

雖然佢話帶我過去，不過我有預感佢會盪失路，結果我地行左三十幾分鐘都搵唔到。我有少少唔耐煩，Queenie見到我咁樣，就不停睇google map，希望快啲搵到間餐廳。

我：「Queenie，再咁搵落去都唔係辨法，不如俾我睇下個地址啦！」

唔知係咪我語氣有啲重，嚇到Queenie差啲手機都跌。我望完個地址，先發現我地一開始就轉錯路口，難怪行左咁耐都搵唔到。好快我地就行到去，因為間餐廳係新開張，所以唔多人排隊食，我地等左十分鐘就入到去。