在IG上重遇你: 31

第三十一章

返到屋企，放低左啲行李之後，我就同阿妹去左朗豪坊食嘢，順便行下街。

琪：「冇返黎香港幾年姐，真係變左好多。好多以前嘅舖頭都唔見左，淨係得返啲藥房、大企業」

我：「連我地以前成日去嘅餐廳都執咗笠，真係好懷念間嘢嘅椒鹽魷魚鬚！」

琪：「仲有芝士焗肉醬意粉，啲芝士多到嚇死人！」





我：「搵日我帶你去食邪惡嘅芝士料理，滿足下你個芝士愛好者」

行完成條西洋菜南街，我個銀包都俾阿妹用到一蚊都冇。佢買左幾件新衫，同埋少少化妝品，本來佢仲想買，好彩個時阿媽打電話問我地去左邊，我先可以避過一難，唔洗變窮鬼。

返到屋企，我阿爸阿媽即刻捉住阿妹，不停問佢嘢，而我就完完全全俾佢地遺忘。不過算啦，佢地成三年冇見面，今日終於唔洗隔住個電話傾計，我俾佢地遺忘都冇所謂。

我幫阿妹放好啲嘢係佢間房，之後就去左沖個涼，費事等間同佢地爭廁所用。到我沖完涼出黎，佢地仲係到傾緊，我都唔知佢地可以傾幾耐。返入房，我望到電話有whatsapp，唔係Bobo搵我，而係我近排唔想面對嘅Queenie。

Queenie：「Steven，聽日得唔得閒？」
我諗緊應該點覆佢，話唔得閒又好似避開佢，話得閒又唔知見面嗰時點面對佢，真係好頭痕！係我諗到入晒神嘅時候，突然間有隻手從後攞左我部電話。





琪：「阿哥，有女約你，你仲唔快啲應承！睇下叫咩名先」

我：「咪玩啦，攞返部電話黎」

琪：「等我幫你應承啦！」

我慢左一步去阻止佢，佢已經幫我打左ok，跟住又將個問題俾返我去煩。

Queenie：「見你唔覆我，以為你係到避我添😣😣」




我：「我啱啱去左沖涼，先咁遲覆」
Queenie：「我聽日想去荃灣試間新嘅餐廳，可唔可以呀？」
我：「好，咁聽日你想幾點去？」
Queenie：「不如十二點係荃灣地鐵站等」
我：「👌👌」
Queenie：「咁聽日見😊😊」

媽呀！究竟聽日我要點面對Queenie呀！