要生存，就要殺死自己: 第十話
【第十話】
『轟隆，轟隆』
巨大既打雷聲將我驚醒，強風從窗口吹入黎，吹得窗簾不斷飄盪，陣陣冷風令我不禁有點陰寒。
我起身關一關窗，望一望個鐘，顯示時間為 11:34 AM。都就快到中午十二點，但天色反而開始昏暗，雨落得好大，不斷拍打對面馬鞍山運動埸既天蓋，發出『啪啦啪啦』既雨聲，感覺好似就快世界末日咁。
打開房門，照舊屋企又無人，阿爸阿媽返工，芷君又唔知去左邊，出面橫風橫雨仲出去玩，難得放假好應該留係屋企溫書。打開雪櫃拎左罐可樂黎飲，企係大廳窗口位，望住啲雨愈落愈大，大得好似一塊白布一樣將眼前所有景物都遮掩住。既然天氣咁差，不如今日唔好出去，因為我最討厭落雨出街既感覺。
坐落梳化，開著部電視留意有冇新聞報導旺角新填地街既事，我亦都用手機開高登Apps睇下果個Post有冇更新到。
最後咩都無報導，果位巴打都無再留言。
" 橫掂你遲早都比自己殺! "
腦海再一次浮現出中年男人對我講過既說話。我唔想做下一個受害者，如果我一放鬆，隨時命都無，我一定要知道真相係點，但如果我自己一個人去查既話，隨時死左都無人知，我需要一個戰友，於是我即刻打比劉啟明。
『喂! 阿明! 係Hall到?』
『今日放假呀，琴晚返左屋企啦!』
『咁就岩! 發生左件大事! 電話唔方便講，落黎傾! 頌安商埸門口等。』阿明正正就住係我對面棟樓，好多時我地都會約埋一齊返學。
『咁大雨仲叫我出黎? 你玩野咩!』
『總之出黎啦! 真係有野發生呀!唔講啦! 總之下面等啦!係咁!』說罷，我就拎左把遮出門，我今日一定要查清楚發生緊咩事。
當落到去頌安商埸門口，等左一陣就見到阿明。
『陪我去旺角先。』
『下? 出旺角? 我著緊拖鞋喎! 你又唔早講!』
『行你就行啦!』之後我地先搭87K巴士到大學火車站，再搭東鐵線火車去旺角東。一路上我將琴晚既經歷重新講多一次比阿明聽，仲將高登個Post比埋佢睇，但佢仍然仲未接受到。
『你不如打電話比果位巴打啦! 可能佢無事呢! 再唔係幫佢報警啦!』阿明說。
『唔得，佢用左133打黎，無來電顯示，我搵唔返佢，報警都無用。』
『會唔會真係假膠呀?』阿明邊說邊用手機按緊高登個Post，雖然佢說話仍然帶有疑問，但從佢既語氣黎講，佢似乎開始相信，因為佢見到對方係八日前已經講緊件事，照計假膠都唔會玩咁耐。因為一個有心玩野既人，最想見到就係一班人既反應，所以好想急不及待咁快啲見證自己既成果，所以八日時間實在太長。
『你覺得呢?』我反問佢。
『總之去到你講果條街再講。』阿明望望火車外既景色，天色昏暗得恐怖，雨仍然落得很大，令到阿明不禁有點心寒，腦海不斷回想起琴日阿明係美心同佢講既經歷，阿明打從心底希望唔好真係有事發生。
當我地到達旺角朗豪坊後，再行去奶路臣街方向，終於到達左新填地街。當我地到左之後，已經發現有一架去元朗既小巴泊左係到，依個位置正正就係果位巴打需要去既小巴總站。
我地沿住直線慢慢行果位巴打曾經行過既路，行左大約兩個街口終於比我地發現一間叫宏業工業設備既鋪頭。我同阿明再回頭望望小巴總站方向，不禁感到無奈，暗嘆地說:『如果當初佢無行錯方向既話，一早已經到左小巴總站。』
『算啦，唔好再望，聽你講佢係前方見到另一個自己，即係話佢會調頭走，大約跑左幾分鐘就遇害，我地繼續沿住條路行應該搵到唔少線索。』說罷，阿明就撐住遮繼續行。
我望住阿明既背影，不禁笑了，因為佢終於對依件事感到興趣，有阿明加入，至少可以多一個人分析同比意見，因為我好怕自己真係會亂諗野。
我地一直行，竟然比我發現新填地街285變電站，我都係第一次見有依間野既存在，之前Google都無圖睇。
『嗯? 有十字路口，果位巴打沿住直線行定係向住唔同方向行?』我地行多幾步就發現有個十字路口。
『應該直線，一個處於極度慌張既人比人追殺，個腦應該咩都無諗，只有繼續向前跑。不過為安全起見，我地一陣行哂所有路口佢。』
『嗯。』
我同阿明行哂所有十字路口既街，一路上不斷仔細咁望住地下睇下有冇發現，但發覺咩都無，連少少血跡都無，情況同當日係荒島一樣，許雯身中多槍，但竟然一啲血跡都無，最後連條屍都消失埋。
阿明撐住把遮慢慢屈低身，摸下地面，然後說:『依家落緊大雨，話唔定啲血比雨水沖散哂。』
『但如果比雨水沖散既話，姐係代表啲血跡本來存在。既然存在，應該一早比人發現。』
『可能條屍比人處理左，順便清理埋啲血跡。』阿明邊摸邊說。
接著阿明轉頭同我講:『你放心，我唔係唔信你，我只係想用比較科學既角度去睇依件事姐。』
『咁你依家係咪信有依件事?』
『嗯，你講到似層層咁，好難唔信喎。同埋......』阿明好似有野想講。
『同埋咩?』
阿明企起身沉重地同我說:『同埋如果真係有依件事既話，唔單止許雯，仲有你同我，什至全世界每一個人都有另一個自己。如果對方真係置我地於死地既話，我地每一個人都會有生命危險。』
突然天空閃左幾下雷電，接著又傳來一陣巨大既雷聲:
『轟隆，轟隆』
阿明抬頭望向天說:『唔知有冇黑色暴雨呢? 估唔到就黎冬天都會落大雨。』
『我依家想搵一個人。』
阿明聽到之後，再拍拍我膊頭說:『行啦，我地去搵佢。』說罷，就行係我面前。
『你知我想搵邊個咩?』
『許雯呀嗎!行啦! 好大雨呀!』阿明邊揮手邊說。
『果然利害，劉啟明。』我暗暗地說。
係火車上面，我同阿明再一次分析件事，首先我地假設對方係大我地至少五年既未來人，我地亦都同意對方目的係想殺我地，至於動機仍然未知，但諗唔明點解另一個許雯唔親手自己殺，反而由一個中年男人出手，但基於果位中年男人曾經暗示過有第三者指示，我地都唔排除係未來既許雯買兇殺人。而跟蹤果位巴打既人，我都幾肯定未來既巴打，最正路既係未來既巴打親自殺返，而唔係買兇殺人。
『買兇殺人依個理由都幾合理，你諗下許雯咁弱既人，唔好話拎把刀殺人，殺隻螞蟻都唔敢啦佢!』阿明講野雖然誇張左，但不無道理，話許雯殺人我都唔係好信。
『但你有冇諗過一樣野，如果未來既我殺左依家既我，咁未來既佢咪都會一齊死埋?』我將我琴日諗既野講比阿明聽。
『你問我......我問邊個!? 不過你咁諗都係一般Common sense既諗法，個世界可能唔係我地咁諗得咁簡單，一切都可以唔合常理。』
『你又岩，就係有班未來人黎左......依一樣野就已經唔合常理。』
傾傾下，好快到左頌安邨，我地向住許雯所住既錦葵閣行去，我地要問清楚許雯究竟發生咩事。係等升降機期間，我不禁問一問阿明:『喂......你唔驚既咩?』
『驚咩呀? 許雯都驚? 我一隻手都揪得嬴佢啦!』
『老老實實，上次見佢個陣真係幾恐怖，感覺好似唔同左人咁。』
『唔係化......你咪鬼嚇我。』
升降機到左17樓，當我地踏出去時，又聽到數下巨大既雷聲:
『轟隆，轟隆』
我同阿明你眼望我望，大家都無出聲，慢慢行去許雯屋企門口，同琴日一樣，成條走廊都好死寂，無任何人走過，比我感覺陰陰森森咁，只有段段雷聲同啪啦啪啦既雨聲。
我深呼吸一下，定一定神，冷靜下自己，再望下阿明，阿明點頭示意無問題，我就再慢慢伸手去禁門鐘。
『叮噹!』
【第十話完】