【第十二話】
 
踏出錦葵閣後,雨仍然落過不停,天色昏暗得令人感到消極,令我本來沉重既心情變得更加沉重,我同阿明撐住把遮呆呆咁企係錦葵閣門口,依一刻大家都睇唔清我地既將來,更加唔知道應該點做,都唔知道應唔應該報警。
 
嗯!? 報警!?
 
『阿明,陪我去多個地方。』
 
『仲想去邊?』
 




『新界北總區失蹤人口調查組。』岩岩靈光一閃,令我諗起陳Sir依個人,佢同另一位同事都清楚知道我既經歷,加上佢地去過荒島調查過,我相信佢地應該會知得比我地多,加上佢地係警察,佢地更加清楚知道下一步點做。
 
搭87K巴士去到大學火車站,再坐火車到大埔墟站,出站後坐的士去到大埔安埔里,見到一座警局大樓。當我同阿明入到去,發覺好多部門,一時之間唔知應該點搵好,於是去左問坐檯既警察。
 
『我想搵新界北總區失蹤人口調查組......既陳Sir,依個係佢電話。』我遞上一張Memo紙,寫住陳Sir留比我既電話。
 
『邊個陳Sir呀?』
 
『我唔係好記得佢全名,佢剩係留左個電話號碼比我,但個電話號碼已經停止使用。佢之前跟緊赤洲島單失蹤案。』
 




『等等啦! 我幫你問一問同事。』
 
接著我同阿明企左大約十分鐘,之後有位比較後生既警察過黎問我地:『邊位搵陳Sir?』
 
『係我,佢之前跟緊我單Case。』
 
『你單Case? 咩Case呀?』
 
『之前我係深圳玩獨木舟遇到風浪,之後飄左去赤洲島到......』
 




『哦......我知你地講咩,依單Case都幾特別! 不過你地要搵既陳Sir比人調左部門啦喎。』
 
『比人調走左? 咁突然既?』
 
『唔止佢一個既,有份調查依單Case既人都全部比人調走哂!』
 
『知唔知咩原因? 有冇其他方法搵到佢?』
 
『上層做野我地做細既點會知呀。如果佢留比你既電話都搵唔到既,我諗我都幫唔到你。你地有急事搵佢咩?』
 
阿明突然輕輕捉一捉我隻手,搖頭示意叫我唔好講咁多,我大概明佢意思,於是說:『無,想多謝佢之前幫過我姐。』
 
『仲以為有咩大事搵佢,原來多謝咋!? 警察幫人好正常姐,唔洗多謝既! 如果無咩野既,我返上去做野先!』說罷,個警察哥哥就走左。
 
似乎政府應該知道有未來人既事,而且仲好刻意咁隱瞞,將調查赤洲島既人全部調走哂,而且電話被停止使用,大概唔想果Team人將件事講出去。




 
『如果政府有心唔想比人知,我諗我地點問都好,都搵唔到佢地。』阿明說。
 
『嗯......政府知道都係一件好事黎,最起碼佢地應該有所佈署,唔洗我同你兩個傻更更係到唔知點算咁。』
 
『政府你都信? 許雯同果位巴打兩家人都比人殺左,我諗依家每一分每一秒都有人比未來人殺,政府佈署!?哂鳩氣!』
 
見到阿明一講政府就咁燥底,先醒起佢攪開社運,對依個不知所謂既政府真係恨之入骨,更加唔會期望依個政府會做野。
 
『咁我地應該依家點?』我問。
 
『都夜啦,返屋企啦! 我依一刻有啲擔心屋企人。』
 
阿明踏出警局門口後,隨即打開把遮,然後沉重地同我說:『我絕對唔會比屋企人有事。』
 




我望住佢個對堅定既眼神,個刻覺得阿明將佢屋企人條命睇得仲重過自己條命,但唔知阿明有冇諗過,如果未來既伯母同世伯真係出現係阿明面前,阿明又會唔會殺得落手呢? 雖然係未來人,但畢竟都係自己父母,對自己父母下重手真係一件好難做到同留低好大陰影既一件事,而且殺左未來既屋企人,都唔知會唔會攪到依家既父母消失,一直以來都係未來人殺依個時代既人,但我地從來都唔知殺左未來人既自己會有咩後果。
 
以上既情況都可以套落係我身上,如果未來既阿爸阿媽同芷君出現係我面前,我又會唔會落得手殺左佢地呢? 殺自己好容易,但殺屋企人......唉,但願依件事快啲完結,唔好比我面對依個有違道德既情況。
 
返到馬鞍山後,大家都好急想快啲返到屋企,最後阿明講左一句:『有咩電聯啦!』就跑走左。
 
我都唔敢怠慢,拿拿淋跑返屋企,腦海希望未來人只會選擇性出現,許雯同果位巴打只係個別例子,除左佢地之外,就唔會再有未來人黎。
 
行到屋企門口,已經聽到芷君係到向阿爸阿媽撒嬌,話今晚好想食壽司,如果佢地肯既話就即刻打比我叫我買返黎。企係門口既我,聽到之後都鬆左一口氣,因為我估五年後既芷君唔會仲係咁細路女向阿爸阿媽撒嬌吧!?
 
我開門後,芷君見到我即刻大叫:『哎呀! 阿哥返左黎呀! 唉! 無得食壽司!』
 
『聽日啦! 聽日我買幾盤返黎。』見到佢地無事,我心情都好左好多。
 
『真架?! 阿哥好野! 阿爸阿媽! 阿哥話聽日買幾盤壽司返黎呀!』芷君開心到衝入廚房同阿爸阿媽講,而我都順便入廚房拎罐可樂飲。




 
阿媽見到我後就話:『阿妹要咩你就買咩比佢,你遲早縱壞佢呀!』
 
『拿!阿媽! 依啲唔係叫縱壞! 阿哥鍚細妹係天公地道既事呀嘛!』芷君捉住我隻手,邊挨落我膊頭邊笑說。
 
『你呀! 想食壽司既話,你依家就即刻去溫書! 你就快考DSE架!』
 
芷君即刻扮一個敬禮姿勢,笑說:『Yes Sir!』說罷,就走左入房溫書。
 
『停停停停! 碟蟹等我黎攪啦! 一陣夾到你隻手就大件事啦!』阿爸見阿媽準備幫啲蟹解繩時,即刻阻止。
 
『哦! 咁夾到你就唔係大件事喇喎!?』阿媽即刻反駁。
 
『我地做男人有咩所謂! 係咪呀! 阿峰!』阿爸將個話題扯到我身上。
 




我飲左淡可樂,揚一揚手,然後說:『拿! 唔關我事! 唔好問我!』說罷我就轉身走。
 
『個仔都唔理你! 拿! 我幫你整一隻!』阿媽又搶住做。
 
『唉也! 你唔好攪咁多野啦! 比我攪啦!』
 
『唔得! 唔比我整既話! 大家都唔好整!』
 
『呀.....你真係! 啲蟹我突登買比阿仔食架!等我黎!』
 
『我黎呀!』
 
我企係廚房門口見到兩老咁大個人仲係到耍花槍,唔知點解心裡面感到一陣安慰,見到佢地咁開心,我就會開心。阿爸阿媽同芷君始終都係我最親既人,任何一個有事我都會唔開心。
 
原來我同阿明一樣,屋企人條命仲重要過我自己條命,我好愛我屋企人,唔需要未來既屋企人黎代替佢地,我屋企人只有我眼前既佢地,絕無其他人。即使未來既父母黎左,我都唔會留情,絕對唔會比佢地破壞我地既關係。
 
絕對唔會!
 
【第十二話完】
已有 0 人追稿