望住醫生檯上面嘅報告,我簡直唔敢相信醫生頭先所講嘅會係事實。呢種事點解會發生喺我身上,我真係接受唔到!

我慢慢步出醫院門口,喺嗰一刻我覺得成個天都係灰色,我嘅人生已經由一片光明變成無晒希望,我好想死呀!

明明喺一個月前,我先至啱啱鬥走咗個老屎忽阿head仲坐正佢個位,點解個天要咁樣嚟玩我去折磨我呀?

諗到呢一度,醫生講嘅嘢又再次纏繞喺我腦海之內。

「古先生,你要有心理準備。」





「我到底有咩事呀,點解我個肚會咁痛㗎?」

「好對唔住,我哋醫院嘅報告已經證實咗…你係一個有子宮嘅男人。」

有子宮?我明明係一個雄糾糾嘅男人,我點會係一個唔男唔女嘅人呀。

正當我嗰陣已經係晴天霹靂嘅時候,原來醫生仲未講完,佢話我之所以會肚痛,係因為體內嘅子宮有膨脹嘅情形出現,亦即係話,我隨時都會爆炸!我不斷追問醫生,但佢只係話現今嘅醫學,實在解釋唔到我體內異變嘅原因,淨係話可以開啲止痛藥畀我去止痛。

有藥又如何,我已經係一個計時炸彈,與其提心吊膽,我寧願即刻就死咗去!





於是我即刻衝出馬路,諗住畀車車死。但係恐怖嘅事情要發生喇。

雖然嗰陣係衝咗出馬路,仲有一部大貨車向我高速咁駛埋嚟,點知我居然無畀車撞死,仲好似嚿磁石咁,一嘢吸咗埋去!

「嘩撞鬼呀!」

貨車上嘅司機睇見我呢個一副尋死樣嘅麻甩佬趴正喺車頭仲碌大對眼望實佢,咁恐怖嘅畫面底下佢就緊係嚇到失魂落魄啦!

司機喺驚慌之下,居然煞車掣當油門,後面嘅車輛統統都收掣不及,全部撞晒埋去部大貨車度,引致多車連環相撞嘅交通意外。





之不過咁樣都仲未完,貨車先前被猛烈撞擊下產生嘅衝力似乎將我之前同部車產生嘅磁力解除咗。就係咁樣我被拋到半空之中,而更可怕嘅境象都隨即喺我眼前出現,我真係估唔到自己一時自私唔想做人,背後牽連嘅後果係會咁大㗎!

當時我喺半空之中,但時間就好似變慢咗咁,仿佛係個天要我睇清楚自己害死咗幾多人咁。

因為呢宗多車連環相撞嘅意外,除咗係一啲私家車呀的士呀巴士等等唔同嘅普通車種牽涉在內,仲有一部大型車輛都被捲入呢宗大車禍裏面,造成咗極其嚴重嘅傷亡。

呢一部車,就係一部運油車。

被捲入車禍之中嘅運油車撞到前面嘅車停低咗之後,再受到後面多輛汽車嘅猛烈撞車,終於個油缸就喺抵受唔住呢股衝擊底下破裂,繼而引致咗一場可怕嘅大爆炸!

熊熊烈火,吞噬馬路上嘅每一部車,我無辦法想像眼前呢個慘況會喺同我有關。

呢啲車連環咁爆炸,爆到我個心戚住戚住,而我亦都跌咗落地下,頭部著地隨即陷入昏迷。

待續...
已有 0 人追稿