【慎入.無厘頭重口味痴線故】好對唔住，我哋醫院嘅報告已經證實咗你。。。。。: 德叔

到我醒返嘅時候，我發現自己已經喺醫院裏面。

「乜又係你呀古生？」再次送入同一間醫院嘅我，又再次遇到呢位驗出我男兒身但有子宮嘅主診醫生。

「陳醫生，點解又會係你嘅，我撞親個頭無理由關你事喎。」

「我知呀但依家醫院真係忙到一頭煙，六十八車連環相撞仲大爆炸，死咗成過百人，仲有三十幾個傷者喺急症室同手術室搶救緊，我嚟呢度嘅目的就係要同你講你個頭無晒事，我哋醫院又已經無晒床位，你最好同我扯啦吓！」

「如果我唔扯呢？」其實我係想試吓佢，因為我懷疑佢係知道一啲嘢，事關佢頭先叫我走嘅時候，我留意到佢神色有啲古怪，好似有嘢瞞住我咁。





「咁就唔好怪我唔客氣啦！」

呢個人唔係陳醫生，我肯定！

假冒嘅陳醫生從醫生袍內拎出一支手搶想要殺死我，到底依家發生咗咩事，佢究竟係咩嘢人，點解佢要假冒陳醫生仲要追殺我？

我喺呢一刻已經諗唔到咁多，喺假陳醫生已經對我開槍嘅情況下，我只好馬上逃離病房，不斷咁跑，不斷咁跑，但我發覺自己跑極都係走廊圍圈，一直都無跑到出去。

終於，我跑到無力仲失去知覺，喺走廊嗰邊倒地不起。





「你醒喇？」今次我終於都唔喺醫院，而係喺一個不知名嘅單位裏面。至於喺我眼前出現嘅，係一個大約五六十歲嘅男人。

「你到底係咩人呀，點解我會喺呢度㗎，係你捉我嚟㗎？」

「我估你一定係好想知道今日以嚟發生喺你身上嘅究竟係咩一回事……」

我當然想知道發生咩事喇。就係咁呢位叫德叔嘅老人家開始向我講返件事。

原來頭先喺醫院假冒陳醫生嘅人就係德叔！而我之所以會迷失喺醫院走廊，係因為佢開槍嗰刻我已經中槍，仲要係中咗佢嗰啲帶有迷幻藥成份嘅麻醉槍，所以我先至會出現嗰啲異象。





「真正嘅陳醫生已經畀人殺咗，但我可以向你保證，下毒手嘅人絕對唔係我。同埋我想同你講，你得罪咗一啲你唔應該得罪嘅人，亦都因為咁，你至會搞成今日咁樣嘅地步。」

我得罪咗嘅人，唔通……無理由嘅，就算得罪咗個老屎忽，都無理由會咁大件事呀。

「後生仔雖然我唔知你喺度諗緊啲咩，但我可以同你講，你子宮嘅事係因為有人向你落咗咒，仲要係一個極其狠毒嘅咒，如果你想解咒嘅話……」

「咪住先，你究竟係咩人呀，雖然你口口聲聲話幫我，但我完全唔清楚你係一個咩人，我點知你會唔會都係想害我㗎？」

勢估唔到德叔聽我一講，竟然會大發雷霆。

「你一係信一係就唔好信！你唔信大可以即刻走，咁個咒都可以隨時就應，你即刻可以爆炸！」

佢竟然知道我呢個咒知道得咁清楚，睇嚟佢真係有啲料到。

「要同你講嘅話，到適當時候我就自然會講。」





既然德叔執意隱瞞身份，我都唔再逼佢啦，因為喺呢刻我好想為自己做過嘅事贖罪，如果可以解咒，或者我會選擇自首，向警方講明一切。

於是，我誠心向德叔請教解咒嘅方法，希望佢可以幫到我。

德叔搖搖頭，我初時以為佢想反口，原來佢係想同我講返一段刻骨銘心嘅往事……

待續...