【慎入.無厘頭重口味痴線故】好對唔住，我哋醫院嘅報告已經證實咗你。。。。。: 落空

「嘻呀~推！」德叔質我食丸啫，有無需要發出一啲咁誇張嘅怪聲呀？

正當我仲諗緊係咩事之際，突然間我感覺到有股熱力好快咁打咗入我個肚度！

「得喇搞掂晒。」

「你到底做咗啲乜嘢呀？」

「頭先我已經將一個短期制磁裝置打咗入去你嘅子宮度，暫時嚟講喇，你係唔會再出現嗰個畀車吸住嘅情況，你可以放心出發喇。」





就係咁樣，我帶住德叔對我嘅期盼以及忐忑不安嘅心情，離開咗德叔間屋，踏上呢條借鴨獻德叔嘅不歸路。

嚟到呢度，有一個好消息同一個壞消息等緊我。

咁就講咗壞消息先，話說我啱啱至知道原來德叔送咗我入嚟赤柱咁遠，但係梁順記間舖就喺新界荃灣嗰邊，咁咪即係玩我？

不過都灰唔晒嘅，因為仲有個好消息就係德叔原來禾桿冚珍珠，竟然安排咗部跑車畀我渣，今次發達啦！

之但係…點解個車匙撳極都同㗎跑車無反應嘅？





於是我唯有沿住間屋咁行，想睇吓有無其他發現，而且一路都繼續撳個車匙喇，終於畀我撳撳吓聽到有聲，部車就喺附近。

我心諗今次實無死喇，點知當我真正見到部車嘅時候，我呆咗喺度。望見眼前一部紅色嘅車，我無諗起太極樂隊嘅紅色跑車，而係諗起另一首歌……

~ I'm in your taxi 踏著熱舞的拍子 載滿意思

係呀係一部紅色市區的士呀！唉咁講真又唔係話真係好差嘅，但係明明嗰邊有部咁靚嘅跑車，佢居然要我做的士狗，實在係令我大失所望。

只係頭都洗濕咗，的士就的士啦唔係仲可以點吖，我已經無得揀。所以我死死地氣打開的士嘅車門，諗住開行turbo趕去梁順記，不過就喺我坐落去個位嗰陣，我見到車頭擺咗個信封喺度。





當我拆開咗封信睇完之後，我至明白點解德叔要我渣的士。

德叔封信係咁講嘅：想你低調啲去渣的士，畀部跑車你太招搖啦，希望你會明白我嘅用意。

我好疑惑佢呢封信係幾時放咗喺度，同埋與其話呢封係信，倒不如話係字條仲好，根本只係將張寫咗字嘅紙碎放入個信封之嘛，真係搵鬼信佢係信。

仲有就係唔好以為德叔真係為咗我好至要我渣的士，佢係為自己咋，字條另一頁寫住：P.S 畀部跑車你渣炒咗你都唔會賠得起！

一睇到呢度真係燥燥地，火滾呀即刻就落車囉，即時隨手就拎起嚿石，想拎去掟爛部跑車，嗰刻我收唔到火，真係行到埋去想掟㗎喇，點知……

待續...