「咪住,呢啲咩嚟㗎?」

交通警望完個車尾箱,然後就退後咗兩步,仲抆槍指住我!

「咪郁!我叫你咪郁,雙手慢慢擺頭後面,快啲呀!」

個車尾箱到底有啲咩呀,點解件事會變成咁㗎,我想叫救命呀。

「係係,無錯,係DB,呢度位置係荔枝角對開青葵公……」





「喂!唔好呀!」

點會咁樣㗎,生命再一次喺我面前轉瞬溜走,雖然我係好趕時間,但我都無諗過要死人㗎嘛。

只可惜現實就係咁殘酷,啱啱個交通警已經畀一部高速駛過嘅密斗貨車撞死咗啦!

而更令我難過嘅係,呢一單並唔係意外,交通警嘅死…原來係同我有關。

密斗貨車將交通警輾過之後,本來我以為個貨車司機一係就停車報警,一係就不顧而去,但佢兩樣都無做到。





佢雖然有將部車停埋一邊,不過佢之後落咗車,仲行埋嚟我身邊。佢叫我快啲走呀,叫我快啲去梁順記。

原來,德叔佢始終都無完全去信任我,佢一直都派人沿路跟蹤住我,睇吓我會唔會出事,終於就跟到嚟呢度,睇住我遇到呢個大麻煩。

「咁你都唔駛殺人㗎,佢都係打份工啫。」

「我咁做都只係逼不得已,我哋係唔可以畀差佬知道車尾箱有啲咩㗎!」

就喺佢講完呢句說話之際,我眼角偷望咗車尾箱一眼,隱約間我好似睇到裏面有一個人形狀嘅物體……





「好喇你都唔好再問落去喇,呢度就等我嚟執手尾,你快啲趕去梁順記先,到時你就返去搵德叔啦。」神秘司機一邊講,一邊就已經好快手將個車尾箱閂返埋,好明顯就係唔想我再偷睇裏面收埋咗啲乜嘢。

於是,我懷住於心有愧嘅感覺上返去部的士度,準備離開兇案現場。

「記住,邊啲嘢先係你應該做,我相信你明白我意思。」嘩佢駛唔駛呀,我都走㗎喇咁都仲要兇吓我?

跟住我一路渣住部的士入去荃灣,一路係咁諗到底好唔好遲啲搵個機會去開開個車尾箱,睇吓入面到底有啲咩嘢喺度呢。

咁我諗諗吓越諗就越失神,終於就真係出事喇。

「哎呀好痛呀。」我一個唔留神差啲撞到個女仔,不過我已經煞行車㗎喇,只係佢依然畀我嚇到仆咗喺度啫。

「對唔住呀我無心㗎,你無事呀嘛?」

「無事?你睇吓我成條手臂擦損晒啦唉唔係啦都係報警喇。」





我一聽到報警呢兩個字就驚驚地,驚嘅已經唔係自己會點,而係我驚咁搞落去頭先嗰個貨車司機又會走出嚟攞人命,到時我又再背負多次幫兇嘅罪名,我真係唔想咁呀。

「你有咩要求我都可以應承你,但真係求吓你唔好報警呀!」

「你真係乜嘢都肯應承?」呢個女仔竟然對住我陰陰嘴笑。

佢咁樣到底係對我有啲咩企圖呢,不過就咁睇落佢個樣都斯斯文文,又唔似係啲會圖謀不軌嘅人,既然係咁就搏一搏應承咗佢先再算啦。

「咁好喇,我要……上你部的士!」

「吓咁樣呀呢層我唔係咁方便喎。」

「咁好囉我報警。」





呢個女仔真係好刁蠻呀,但畀佢報到警就隨時累死佢,算啦我忍,佢要上車就上到夠喇。

「先旨聲明,我唔係的士司機嚟㗎吓,有咩事嘅話我諗保險唔包㗎。」

「得喇唔好咁長氣喇,我唔該你開車啦。」

「其實我有啲趕時間,你介唔介意講聲你去邊等我可以快啲送你……」

好聲好氣同佢講,諗住大家好來好去,點知佢竟然同我玩嘢,話要入機場,我一聽到即刻嚇到飲泣起上嚟。

「你唔係呀嘛男人老狗喊呀,算啦算啦依家我仲未想返屋企,你同我周圍兜吓,我轉頭同你講我要去邊喇。」

似乎男人有時只要肯放低身段,話唔定就會有意想不到嘅效果,例如今次咁囉。

如是者我真係載住佢周圍咁兜,不過同時都慢慢接近荃灣嗰邊,當然我咁做其實就無乜意思,如果佢話要去銅鑼灣,咁我就算有幾近荃灣都無用喇。





又或者調返轉咁講,佢夠膽死話要去舞雷公咁遠嘅話,我就掟佢落車…都係唔得,佢實記得個車牌,而且德叔亦唔見得會幫我頂,唉都係唔好亂諗,希望一陣會有奇蹟啦。

待續...
已有 0 人追稿