【慎入.無厘頭重口味痴線故】好對唔住，我哋醫院嘅報告已經證實咗你。。。。。: 雅緻

就係咁樣，我哋講吓講吓已經嚟到梁順記嘅門口啦，但係間舖落晒閘點算好呢？其實為咩事我要呢個時候至諗呢個問題，根本我就算無遇到咁多事，就算可以用最快時間趕到去梁順記都好，佢哋喺嗰陣都係收咗舖過晒營業時間，所以我諗若然無遇到呢位二小姐，我應該要好肉酸咁當街當巷拍道閘掛。

點都好啦今次真係因禍得福，亦係我第一次有種感覺係嗰個交通警嘅死係絕對無白費，如果我知道佢係邊個，將來一定會搵日去浩園拜一拜佢，當係多謝返佢啦。

唔係得佢阻一阻我，我都唔會咁好彩可以撞到呢位二小姐啦。

不過我嘅運氣都有可能係用到嚟呢度為止，唉跟住會發生咩事真係好難預料，點都好喇我哋依家終於要行入呢個虎穴——梁順記。

「媽，食得飯未呀？」





「咦雅緻你返嚟喇？」

原來我到呢一刻先知道呢位二小姐嘅真名，但聽落呢個名都唔錯呀，幾順耳喎。

「咦呢個阿叔係邊個呀？」

如果我無估錯嘅話，呢個著住魚網絲襪嘅老太太，應該就係梁崔氏啦。

「喂喂雅緻呀，你阿媽叫緊邊個呀？」我細細聲咁喺佢耳邊度講。





「我都唔知呀，會唔會係講緊你呀？」

「仲眼瞪瞪咁做咩呀，我係講你呀，你係咪雅緻以前啲中學老師呀，哦你係江Sir，係你啦係你啦。」

佢講乜嘢江Sir呀，雖然我已經唔係二十出頭，但點睇都唔似係個阿叔啦吓嘛，頂多係中佬一名啫。

「乖女你今日有客人點解唔一早同我講呀，等我預備多隻燒鴨出嚟宴客呀嘛。」

「咩話？你嘅意思係今日餐飯無燒鴨？」





「Shut up!估唔到你為人師表都咁無禮貌嘅，睇唔到我同個女講緊嘢㗎咩？」

「媽呀你唔好怪佢啦，佢真係好鍾意食燒鴨㗎，不如……」

本以為雅緻幫我開口可以容易啲喇，點知我咁諗原來係大錯特錯！

「不如？我話你係不孝！竟然想打隻燒鴨嘅主意？」

嘩梁崔氏想摑個女呀，我想出去擋，但趕唔切啦。

「唔好呀阿媽對唔住呀。」

待續...