【慎入.無厘頭重口味痴線故】好對唔住，我哋醫院嘅報告已經證實咗你。。。。。: 鴨皮

勢估唔到呢巴掌就快要摑落去嘅時候，梁崔氏似乎唔忍心打女，所以臨急收停咗，不過啲掌風太強震到雅緻跌咗落地下，成個人坐咗喺度。

「今次就當係對你嘅小懲大戒，睇吓你仲敢唔敢唔記得今日呢個咁重要嘅日子！」

「我記得，我當然記得啦，我點會唔記得呀。」

老實講，連我呢個外人都睇得出雅緻佢真係唔記得咗今日係咩日子啦，我真係唔知佢可以點算好呀。

好彩天無絕人之路，就喺我仲擔心緊佢呢次再講唔出今日係咩日子而會畀阿媽真打嘅時候，有一個人及時出現幫佢化咗呢一劫。





而呢個咁關鍵嘅人，咪就係佢家姐囉。

嗰陣雅緻諗極都諗唔到今日係咩日子，好在有佢家姐咁啱喺廚房出細妹解圍，好順口就講咗今日係咩日子喇，原來係佢哋爸爸嘅波斯曆法生忌，認真估佢唔到。

呢件事無聊係無聊㗎喇，好地地做乜要做波斯曆嘅生忌呢，不過梁崔氏似乎好著緊喎

「好在有家姐你咋，話時話阿媽又搞乜嘢呀……」

「我諗佢係太掛住爸爸啦，所以咪諗呢啲藉口想我哋記住爸爸囉。唉我都唔想見到佢咁樣㗎，你之前喺外國讀書唔知咋，嗰陣啲生忌死忌仲多呀。」





我真係估唔到，原來佢哋兩姊妹係咁可憐，到底我係咪仲應該攞佢哋隻燒鴨呢？其實唔攞嘅話最多都係返去繼續捱德叔嗰啲長篇大論嘅愛情故事啫，相對佢哋嘅處境，咁樣都無乜太大不了吖。

但如果我真係喺呢度攞走祭佢哋阿爸嘅燒鴨，分分鐘引起倫常慘案，我實在唔可以咁自私嘅。

「哦咁樣咋嘛，萬事有商量。」

佢哋兩姊妹搞咩呀，仲同梁崔氏講我想要燒鴨嘅事？

「果然都係家姐開口好好多。」





「其實阿媽重點都係想你知道今日係嗰啲乜乜曆嘅生忌啫，佢知你有心就咩都有得傾喇。」

我都諗住算數㗎喇，點解雅緻、雅芳佢哋要咁做……

「嗯~教書先生喔，唔該你過一過嚟吖。」

今次弊喇，笑淫淫嘅梁崔氏揮晒手咁叫我過去佢度，我決定唔到呀。

「你仲等咩呀，快啲過去喇。阿妹我哋入房先，費事陣間隔夜飯都嘔埋出嚟啦。」

「吓咁樣呀……」

雅緻未講完就已經畀雅芳推咗入房，而我就企咗喺梁崔氏面前，孤立無援嘅我似乎真係會任佢魚肉喇。

「細妹阿Sir，你真係好鍾意我哋啲燒鵝咩？呵~」





「係呀…咁我要點做…你先會畀隻燒鴨我呀？」

「好簡單啫，嘿嘿。」

待續...