梁崔氏佢手指指,指住我全身,然後再做咗個類似係唔要嘅手勢。

喺呢刻我好清楚佢想我點做,無錯就係要我除晒啲衫落嚟。但我之前已經諗清楚,寧願畀德叔疲勞轟炸都唔要受呢種折磨,於是我打算放棄呢次計劃,跟住馬上離開呢度。

當所有嘢都以為睇通晒,我又點會諗到件事經已嚟到一個唔輪到我去選擇嘅地步吖。

事關梁崔氏棋高一著,居然估到我會臨陣退縮,於是早我一步將呢間屋嘅門鎖實晒,從而令我無處可逃!

不過做到咁樣對佢嚟講都仲未夠呀,佢為咗令我就範,可以話係無所不用其極,點解咁講?大家睇落去就知。





「我諗你應該知道呢樣係咩嚟㗎?」

係,梁崔氏佢用電鑽指住我,逼我除衫。既然已經到咗咁嘅情況,我仲可以點呀,咪唯有真係開始除囉。

我慢慢將身上嘅衣物一件一件咁除出嚟,雖然過程中佢有催我快手啲,但最後佢把電鑽都係無鑽落嚟。最終……我真係喺佢面前除晒,一件不漏咁除晒。

「做老師一定好忙無時間運動頂喇,全身一啲肌肉都...無嘅!」

!!!佢一手渣咗落我屎忽度,但我唔敢嗌出嚟,我連喊都唔敢呀。





「本來你呢啲又老又賤嘅肥肉我梁老太真係一啲興趣都無,但見係兩個女求我嘅,咁我先至順吓佢哋意,你都唔該同我醒醒定定,知道嗎?」

渣渣屎忽只不過係頭盤,緊接落嚟我要承受嘅種種可怕經歷先算得上係梁崔氏嘅主菜。

首先,佢要我紮行晒馬,然後再用一盤好凍好凍嘅水潑埋嚟,我全身都淋到打晒冷震,喺嗰一刻我覺得佢係想攞我命多過想玩我。

「頭先嗰盤水係急凍過嘅日內瓦湖水嚟,你既然咁想要隻燒鴨,當然就要體驗吓佢哋嘅習性啦,好公道喎。」

我明喇,佢根本唔係太想掂我,但同時又想借折磨我嚟刺激一下自己,所以咪諗啲咁嘅嘢出嚟要我唔好過囉。





就係咁,梁崔氏對我赤條條嘅肉體出盡渾身解數,我痛嘅痛過,痕又痕過,囚困喺呢個禁室當中,我覺得自己同馬戲班嘅野獸無咩分別,甚至佢哋比我仲要高尚,我好想離開呢個煉獄。

咁樣除晒衫畀佢玩咗大半個鐘,我去到呢個時候已經係奄奄一息,我唔可以再撐落去喇。

偏偏梁崔氏先後用過冰水、皮鞭、電蚊拍、痕粉仲有係豆豉鯪魚去虐待我之後,佢都仲未肯收手!

「想食我留畀順哥嘅燒鴨?得,咁你食嗰時就食埋自己嘅腸……哎呀,邊個打我……」

「對唔住都要做一次啦,就當我不孝啦嗚~」

我萬萬估唔到,雅緻會喺呢個最後關頭走出嚟幫我,話晒同佢都唔係識咗好耐,不過唔諗咁多喇,都係快啲想辦法離開呢度先。

「呢度反鎖咗,我哋點算好呀?」

「阿岳你等陣先。家姐你係咪搵緊幫手㗎,轉頭媽媽醒返我哋三個都唔掂喇。」





「畀多少少時間我得唔得,本來今晚好地地食餐飯,你就唔知惹個咩人返嚟,好喇依家搞出個大頭佛喇。」

「哦好喇終於講出口喇,兩姊妹喎,咁樣叫兩姊妹,淨係識嫌我麻煩。」

我真係唔明佢哋點解仲要喺呢個時候嘈埋啲無謂嘢,咁好精神倒不如幫我搵條毛巾遮遮自己好過啦,頭先啲衫褲畀佢哋阿媽燒爛晒渣都無得剩呀陰功。

「都係嘅條條揈咁鬼肉酸,嗱呢度有幾張黑膠碟你套住先好過無啦,咿呀叫你拎住佢呀。」

雅芳連珍藏嘅黑膠碟都借埋畀我,雖則咁樣套住勉強遮到重要部位都係有啲尷尬呀,但點講都叫做幫咗我,無論如何都要講聲唔該嘅。

而我亦都喺呢個時候,開始覺得自己有少少鍾意咗呢兩姊妹……

待續...
已有 0 人追稿