【慎入.無厘頭重口味痴線故】好對唔住，我哋醫院嘅報告已經證實咗你。。。。。: 獨裁

完全唔接受民意好自然係會激起反彈，過咗幾日之後又真係有幾位喺部落入面德高望重嘅中堅份子出嚟抗議長老呢次咁專制嘅做法。

佢哋當時帶同幾位一樣都精通打獵而且年滿十歲嘅小獵人嚟到長老面前要求進行比試去決定代表嘅人選，只係佢哋無諗過咁做反而會為自己招置殺機！

原來係阿基沙長老睇到呢幾個老臣子殺氣騰騰咁款行到埋嚟，居然誤會佢哋意圖謀反，於是馬上先下手為強，將一干人等全部處以極刑，連嗰幾個細路都無一倖免咁死喺佢手上。

雖然發生呢件事係唔應該去怪流星嘅，但喺部落人心目中，幾位湯耶老臣子同嗰啲無辜嘅小生命確實係間接因佢而死，對佢嘅印象亦都差晒，咁樣一嚟呢粒福星已經開始有咗殞落嘅徵兆。

或者喺嗰個年代資訊唔太流通，只要無人同流星講過發生咩事，佢事實上係唔會有太大壓力，如果喺正常發揮底下係有力為湯耶族爭光㗎。





不過遺憾嘅係，傳說以及少數散落流傳嘅野史同樣記載流星喺嗰場打獵大賽入面不但無為部落爭光，更甚嘅係為呢一片土地帶嚟咗難以想像嘅傷害……

時間終於嚟到聯族少年狩獵大會嘅呢一日，十歲嘅流星可以講係踩住同族人嘅鮮血嚟到呢度，背負長老嘅期望當然係唔衰得，但係嚟自卡岡族嘅孔卡仲有洛迪古族嘅小女孩獵人莉安都唔係善男信女，要贏實在談何容易。

點樣都好，屬於流星嘅呢一場少年打獵比賽要開始啦，賽事決勝負嘅方式都真係好直接，唔駛太多花巧嘅規則，明買明賣喺日照期間任獵，最終結果就係睇大細睇數量，越大隻嘅獵物當然係越高分啦。

不過大會只係提供咗個啱啱好夠裝一隻大型貓科動物嘅藤籃，換句話講如果選手獵殺咗一隻豹嘅話，就有可能會無位再裝其他獵物住，需要盡快跑返去起點將籃內嘅獵物卸落得分區度先可以繼續打獵，隨時浪費晒啲比賽時間添㗎。

三位選手清楚晒今次比賽嘅形式之後都去到起點各就各位，跟住比賽就正式開始啦！





其實呢場狩獵比賽嘅戰況可以講係眾說紛紜，流傳落嚟嘅版本多不勝數，但係版本再多都好，最後嘅發展似乎都係差唔多。

話說呢個狩獵大賽進行咗大半日之後，本來三位選手互有斬獲之下都令賽況刺激無比，但估唔到就喺呢個時間天色居然驟變，地上嘅動物仲失控狂奔，似乎係有不祥嘅預兆。

好地地一個狩獵大賽搞到風雲色變，相信當時每一個部落人都估唔到會咁樣呀。

而流星得嗰十歲人仔緊係驚啦，佢抬頭望望個天，原來真係有啲唔妥。

聽信叔佢講，嗰時有一粒來自外太空嘅隕石劃破長空，經過燃燒之後雖然已經分散成好多碎石，不過依然有為數唔少嘅隕石碎片墜落地球，為人類帶嚟咗一次好大嘅災難。





講到咁誇張，流星佢哋身處嘅嗰片土地當然一樣唔能夠倖免啦。其中就有一塊直徑大約十六七厘米嘅隕石碎片墜咗落去舉行狩獵大會嘅嗰片大草原度，而事情發展到呢個地步亦都係代表住流星快將惹禍上身啦。

但係老實講，當我知道咗狩獵大會件事最後係咁嗰陣，我覺得流星係好人嚟，唔應該畀人賤待㗎喎。

因為嗰陣嚿隕石就從天上跌咗落嚟，碎片接觸地面後造成嘅爆炸早已引發山火，由於嗰陣時文化水平仲係好落後，三個部落平時撲救普通火災已經無太多好嘅辦法，呢個時候面對山火嘅挑戰自然係無計可施。

於是，三族長老緊急磋商之後，決定即時中止今次比賽，仲派各自嘅族人去盡快搵返佢哋嘅小獵人，只可惜事情無咁易就可以解決得到……

講緊嘅係嗰啲隕石跌咗落嚟之後除咗係帶嚟火災，仲成為咗一眾草原猛獸嘅玩具。

大家可以想像得到，平時啲人養寵物養啲貓貓狗狗，都會畀啲波波佢哋去追，跑吓跑吓都不知幾開心。

之不過呢次喺草原上跑嚟跑去嘅唔係細細隻嘅貓狗，而係好大隻嘅美洲野牛，真係撞一撞條命都凍過水㗎。

咁呢批野牛望到已經冷卻咗，圓圓地唔再熱辣辣嘅隕石碎片，即時發晒狂，附近仲火燒緊都唔理咁多，一隻二隻爭住埋去要玩，你撞吓我我又撞吓你，爭得非常之激烈。





而就喺流星差唔多撤離出危險區域嘅時候，佢聽到不遠處有人叫救命！佢擰轉頭一睇，發覺原來係女獵人莉安畀幾隻野牛圍住，生命危在旦夕。

其實喺咁嘅環境，流星自身難保之下就算真係見死不救相信都無人會怪佢，偏偏佢選擇咗彰顯人性光輝，點知最後結果非佢所想，仲令佢成為咗湯耶族嘅公敵，可以講係人算不如天算。

所以接住落嚟我哋終於要講到呢個傳說嘅一大重點，就係流星到底係點樣得到控制磁力嘅異能。

待續...