【慎入.無厘頭重口味痴線故】好對唔住，我哋醫院嘅報告已經證實咗你。。。。。: 開通

嗰陣流星好英勇㗎，都唔知佢係咪鍾意咗嗰個女仔定係惜英雄重英雄嗰味老套嘢，總之佢就成支箭咁衝埋過去，有勇無謀隨時死路一條。

點知衝動又反而有作用喎，佢一路大叫一路跑，神奇嘅事情亦隨之而嚟，嗰塊畀野牛玩緊嘅隕石碎片居然畀佢吸咗過去，似乎真係要上演英雄救美。

如果結局真係咁嘅話，或者流星都唔駛咁大獲嘅，但事實就係佢嘅異能居然會大開殺戒，咁樣搞法當然好麻煩。

嗰陣流星將隕石碎片吸走固然係嚇人，連啱啱趕過嚟通知選手要撤離嘅部落人睇到都打咗個突，不過更可怕嘅係流星控制唔到嗰股磁力，本來畀佢吸實咗嘅隕石碎片突然間向外爆發出去，唔單止啲野牛，連在場嘅莉安、孔卡仲有過嚟傳話嘅部落人都幾乎畀啲碎石打死晒。

知道闖出大禍嘅流星真係唔識點反應，佢唯有呆咗咁看守住現場啲屍體，可憐嘅部落小朋友喺呢刻已經驚到打晒冷震，非常之無助。





而喺流星爆石事件入面僥倖生還嘅族人無留低幫手不突止，仲即刻返去同三族長老報告呢件事，聽到呢個消息嘅阿基沙長老立即大發雷霆，仲聯同卡岡族、洛迪古族嘅長老齊齊趕去現場了解情況。

就係咁，佢哋發現事發地點屍橫遍野，另外兩個部落痛失咗狩獵好手當然係好心痛啦，據古藉所載洛迪古族長老仲因為悲痛欲絕無耐之後急病死埋添啦。

所以話，阿基沙長老又點會唔嬲呢，之前殺咗咁多喺族入面德高望重嘅老臣子嚟諗住抬起流星，點知攞唔到彩之餘，仲隨時因為呢件事而令到湯耶族呢咁多年嚟同卡岡、洛迪古兩派人嘅和平關係出現變化，演變成部落衝突都唔係話無可能。

於是，阿基沙為咗平息其餘兩族嘅不滿，當機立斷宣佈即場處決流星，而「災星」呢個名亦都係由嗰陣開始出現。

至於流星嘅命運係點，信叔話要賣個關子先，佢想我好好學習呢個傳說人物嘅精神，然後打通前往陰間嘅通道救返德叔上嚟先至講埋佢。





其實咁樣根本就講唔通，流星嘅精神？但個故事佢都未講完，我又可以從中學到啲咩呢？

只係德叔嘅靈魂已經離開咗身體太耐，實在係不宜怠慢，某程度上信叔呢個唔知邊句真邊句假嘅通緝犯直情係浪費緊我時間，所以呢刻唯有將錯就錯，再試多一次啦。

集中……集中呢一點，係啦係呢種感覺啦。

兩個女仔睇到我谷紅晒塊臉仲反晒白眼咁樣，雖然知道我係做緊正經嘢，不過始終都係覺得我呢吓好猥瑣，決定擰開一面唔睇落去，咁都啱嘅你哋唔望我仲自在呀，去啦！

「德叔呢次有救啦，新嘅流星終於都誕生……」





其實我都唔知自己做過啲咩，只係感受到一股暖流真係成碌柱咁由我體內噴咗出後，條通道就係咁無厘頭之下畀我打通咗。

既然通往陰間嘅大門經已打開，咁我都係時候入去，但點解有人拍我膊頭嘅？

「救德叔嘅事就交畀我兩個去做啦，傲信你帶呢兩個女仔去靈堂嗰邊看守住德叔嘅肉身先，千祈唔好畀佢有事。」

呢一刻唐正宇擺晒大佬款咁樣，我當然係唔太服佢啦，不過喺穿過嗰條通道嘅過程中，我先發覺自己對佢原來係有唔少誤解……

佢知道我一直以嚟都對佢殺咗嗰位交通警件事係有所介懷，所以佢趁住落陰間嘅嗰段時間，同我解釋返晒成件事嘅來龍去脈。

根據佢嘅版本，嗰位交通警人稱祥哥，今年四十出頭，當咗差有十幾年日子㗎啦。

起初，祥哥一由學堂出嚟，已經好好彩唔駛做軍裝去行咇，而係有得做CID入重案組學嘢，以佢一出更就有咁好嘅際遇似乎將來實會前途無限。

就係咁，祥哥喺人生最風光嘅時間開始咗佢當差嘅生涯，第一日返工已經跟到一單大案。





最無獨有偶嘅係，原來祥哥有份嘅呢單案居然就係信叔牽涉入去嘅嗰一宗連環強姦案，呢種巧合令件事變得越嚟越唔簡單。

待續...