【慎入.無厘頭重口味痴線故】好對唔住，我哋醫院嘅報告已經證實咗你。。。。。: 22

三位年齡介乎十七至二十嘅妙齡少女喺同朋友影貼紙相期間被歹徒殘忍拖出繼而侵犯，疑問仲巧妙咁避開咗閉路電視鏡頭，加重咗警方嘅調查難度。

據講呢單案件本身就由另一隊重案組跟開，不過隨住案情嘅深入，隔離組都需要聯合埋祥哥嗰一隊人大家一齊去參與調查工作。

重案組嘅一眾探員配合鑑證科嘅同事連夜搜查，終於喺其中一位女受害者身上嘅衣服搵到一組唔屬於佢本人嘅皮膚組織，令調查取得突破性嘅進展。

因為呢一組皮膚組織嘅基因喺警方數據庫係有存檔，經查明後證實係屬於一個有非禮紀錄嘅中國藉男子，由存檔顯示佢個名就係洪傲信。

然後再比對埋受害者體內驗出嘅DNA都係屬於同一個人，喺呢種證據支持底下，警方只能夠將疑犯鎖定為信叔呢一個人。





既然有咁重大嘅發現，重案組當然要即刻出動拉人，至於祥哥本來係獲安排留返喺差館做後勤，點知呢位新紮師兄竟然咁熱血，再三請求行動嘅指揮官畀佢出去，而又咁啱得咁橋，有一個原定要參與拘捕行動嘅探員突然急性胃潰瘍送咗入醫院，於是祥哥就好好彩得到呢個咁難得嘅機會。

當行動簡佈會正式結束，祥哥同成班重案組嘅師兄準備就緒，馬上起程前往目標疑犯居住嘅單位拉人。

換句話講，後生嘅信叔好快要畀人拉喇，不過當時嘅佢究竟仲係辣手摧花嘅強姦犯定係已經變咗無辜食死貓嘅新信叔呢？

但無論如何，警方都只會相信手上嘅證據，所以嗰陣信叔係嫌疑犯，佢哋就要去拉人。

為咗將信叔緝捕歸案，重案組成班探員嚟到佢位於土瓜灣嘅一個舊樓單位度捉人，睇怕佢真係插翼都難飛。





「警察，屋內人士請立即開門。」

重案祖阿頭江Sir拍極門都係無人應，正當佢哋以為今次要暫時收隊之際，竟然都喺最後時刻畀佢哋見到信叔嘅出現。

嗰陣信叔啱啱由外面返嚟，估唔到咁黑仔同啲差佬撞到正，殺到埋身緊係即刻撇啦。

江Sir見到疑犯就喺附近，當然唔會輕易放過佢啦，所以咪追實佢唔放囉，至於咩都唔識嘅祥哥依然貫徹佢衝動嘅性格，其他警員留喺原地等下一步指示，而佢就諗都唔諗追埋一份。

佢哋幾個唔跟江Sir去追個犯當然係有原因，其實好簡單，全因江Sir係一個好要面嘅阿頭，呢種時候緊係畀佢捉到個犯去立功啦，點知祥哥咁唔熟性，竟然阻住阿Sir搵食，佢哋睇到呢幕都替個新仔擔心，怕佢之後會無運行畀阿頭針對呀。





只係人算不如天算，試問又有幾多人會諗到，最後喺嗰次行動出事嘅居然會係江Sir而唔係祥哥呢，而更加令人出奇嘅係祥哥仲成為咗成件事嘅關鍵人物。

話說嗰陣佢兩個追緊信叔㗎嘛，咁追追吓信叔就由後樓梯方向逃去，咁江Sir同祥哥亦都緊隨，點知就喺呢個時候，發生咗一宗人為嘅罕見意外，從此改變咗事態嘅走向。

而且祥哥親眼目擊一切，雖然江Sir只係一時錯手至會推咗個阿婆落樓梯，但佢好清楚就算係意外都好，作為一個誠實嘅人，更何況係一個警察，就點都要向上級如實稟報先啱數。

只係江Sir又點會咁容易畀件事東窗事發呢，如果畀上頭知道呢單嘢唔係單純嘅意外而係佢錯手造成，唔止要革扯仲好可能要坐監添呀。

江Sir唔想坐監，佢唔想咩前途都無晒，佢要成為警界之星，於是老套都要講句，只有死人先可以守到秘密，所以呢個時候信叔走甩咗江Sir亦一於少理，將祥哥解決先係最緊要。

「有事慢慢講，你殺埋我你一樣走唔甩㗎咋。」

江Sir一步一步行埋去祥哥嗰度，擺明係要對佢不利。

「咁就要視乎我係點樣殺你。」





原來江Sir打算去搶祥哥嘅警槍，再用嗰枝槍去打死祥哥，製造佢自殺嘅假象，咁樣嘅話江Sir就可以置身事外。

所以到咗呢個時候，祥哥嘅處境真係十分之凶險，佢只好撳實自己個槍袋，盡量唔畀江Sir搶走把佩槍。

無奈嘅係，祥哥身形同江Sir爭咗成截，根本就唔夠佢大力，結果喺多番糾纏之後，都係畀佢搶到支槍，咁真係大件事喇。

一個大好嘅機會擺喺面前，江Sir當然唔會放過，佢馬上舉起嗰支搶返嚟嘅槍諗住話打死祥哥，點知……

「你都咪郁！」

「咩話，你係喺幾時…」

原來祥哥頭先趁住江Sir掛住搶佢支槍，喺對方唔為意底下調返轉搶走咗江Sir支槍，因為講打嘅話佢知自己一定唔夠打，咁就唯有智取，先至可以保命。





而祥哥隱藏嘅黑暗面亦喺呢件事上面初次顯露出嚟。

因為喺江Sir呢種禮崩樂壞嘅人面前，佢終於察覺到如果要喺警界出人頭地嘅話，少不免要耍手段花心計，於是江Sir亦順理成章咁成為咗呢一局博弈下嘅犧牲品。

待續...