我已經.....忍無可忍。

隔離屋個人渣,已經第三個星期開到個嗽叭大大聲播歌,重要日日都係播埋啲唔知咩文,嘰哩咕嚕成個邪教咁。

最陰毒係,佢永遠都鍾意夜媽媽十一二點就定時定候播,播到鬼死咁大聲,一直去到凌晨兩,三點先會停。

重有,最最攞命係,朝朝清晨六七點就會岀現啲好似鑽入你個頭咁煩既電讚聲,直到8點幾先會停。而且我每次行過個單位都會聞到臭臭地,唔知真係以為入面藏屍。

如果知道有個咁既鄰居,三個星期前我打死都唔會租呢到。而家約又簽左,呢度租又算平,我真係唔想因爲個鄰居又搬過屋。



呢三個星期,我都用過好多方式去處理。我試過行去拍門同㩒鍾,但次次都冇人開門,唔知條友係咪特登。

我又試過寫紙仔貼係佢門口表示我既不滿,點知過左成三個星期張紙都重係度,我懷疑佢根本就冇撚睇到。

我都試過叫包租婆同佢講下,點知佢話隔離屋果個係個男人黎,以前都好好地,係近排先係咁,話冇搞到岀事就叫我忍下,遲下佢就可能冇事。唉,我就知包租婆有租收,錢已袋,一定係理撚得我..

屌...唔係租平....我真係想即刻走..

只係...三個星期咋...



我已經比佢搞到長期精神不振,神不守舍,黑眼圈重深個熊貓,食咩都冇胃口.....

我唔可以再係咁落去....憑咩我要忍佢....

一日唔解決,睇怕我都永無寧日。

我要反擊...比佢承受翻我呢種滋味....

將所有野...十倍奉還!



首先,我要知道隔離屋係咩底子先。所謂知己知彼百戰百勝,我而家除左從包租婆口中知隔離屋係男人之外,其他野一無所知。


難得今日唔洗翻工,我即刻打比包租婆問清楚,再計劃下一步點做。

我打比包租婆問,點知聽到佢啲打牌聲。佢聽完我問之後,好唔耐煩咁敷衍我,話隔離屋個男人住左兩年左右,入伙後一年就有個女人同佢一齊去住,後來唔知分手定點,得翻佢自己住。之後先開始變左麻煩鄰居。入伙後個男人都準時交租,所以包租婆都冇去理佢或者揾佢。

「碰!喂林小姐,我真係唔係好得閒有咩留翻拜山講啦,拜。」包租婆講完就即刻收我線。

不過...我咁耐都未見過個男人咩樣,都冇聽過佢開門同關門聲。因為我平時開工係朝九晚五,所以有機會佢日日係我走左先岀去,我翻黎前佢已經翻左屋企。

但係.....我連星期六日放假係屋企,都冇聽過隔離屋開門聲。有時我真係好懷疑隔離重有冇人住,但聽到每晚啲噪音就知係人為。

屌...都唔知係咪白卡佬黎。

趁今日放假,我轉登岀去鴨記買左個針孔攝影機,裝左係我門口岀面。無論如何我一定要睇到佢既盧山真面目。



裝好之後,我就係電腦set好個監視畫面,紀錄低佢岀門既moment。

到夜晚11點左右,隔離屋再次好大聲播音樂,屌又係啲聽到心都寒既調子,聽完都成身起雞皮。

唉,唔理啦,聽日放工翻黎睇閉路就知龍與鳳。

終於,等到今日放工。成日心掛掛住呢件事,搞到翻工都心不在焉。從來未試過咁想快啲翻到屋企,畢竟今日個男人既真樣好可能已經錄到。


我快快手搭車翻屋企,落小巴準備到樓下果陣,點知急得濟撞左落個男人度。

「痛...」我摸下撞到既頭,再望向個男人果陣....我完完全全.......嚇到呆住左.....

佢....佢雙眼......



佢雙眼係冇眼球.....

得.......兩個黑洞.........

兩個黑洞彷如絕望既深淵.....令人不寒而慄......

我從未見過.....咁恐怖既畫面......

究竟....佢係人定...怪物.....

個男人呆左呆,再跪係地下周圍摸,我先意識到我撞跌左佢副黑超。

我戰戰兢兢咁執起副鏡.....再慢慢咁遞翻比佢....我啲手汗重濕過馮盈盈....

我發誓...我成世人都未試過...咁近距離望一個......無眼既男人........



個男人接左我手上既眼鏡,戴翻之後就走左。

我之後即刻跑翻屋企,飲左一大杯冰水冷靜下。

每次回想翻見到...果兩個黑洞既畫面....我個心都會震一下....成身起哂雞皮...

無事既....我林美玉平時都算大膽果類....咩saw呀人型蜈蚣我全部都夠膽睇...只係未試過係現實咁近距離接觸呢類人,先會心有餘悸姐...

帽事既....人地係傷殘人士姐我做咩驚到咁....

我抖順條氣之後,即刻去開翻個cctv睇下個男人有冇岀過門口。

「5點半...度門...門左!」



個男人竟然係我上黎前冇耐岀左門!cctv入面,我第一次見佢度門終於打開左.....

我屏住呼吸,目不轉睛咁望實個螢幕.....

要...行岀黎啦.....

.....................

.....................

我.......有冇眼花?唔會掛....

cctv入面影住既......正正係頭先既無眼男人......
已有 0 人追稿